ⴰⵙⵉⵡⴹ ⵏ ⵓⴷⵉⵡⴰⵏ ⴰⴳⵍⴷⴰⵏ

 ⵕⵕⴱⴰⵟ - ⴰⵢⴰ ⴷ ⴰⵙⵉⵡⴹ ⵙⴳ ⵓⴷⵉⵡⴰⵏ ⴰⴳⵍⴷⴰⵏ:

"ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ, ⴰⴷ ⵜ ⵉⵙⵙⵔⵏⵓ ⵕⴱⴱⵉ, ⴰⵙⵙⴰ ⵏ ⵓⴽⵔⴰⵙ 28 ⵉⵏⵏⴰⵕ 2026 ⴳ ⵜⴳⴰⴷⵉⵔⵜ ⵜⴰⴳⵍⴷⴰⵏⵜ ⴳ ⴷⴷⴰⵕⵍⴱⵉⴹⴰ, ⵉⵊⵊⵏ ⵓⴳⵔⴰⵡ ⵏ ⵜⵡⵓⵔⵉ ⵉⵥⵍⵉ ⵉ ⵡⵓⴷⴷⵉⵙ ⵏ ⵓⴼⵜⴰⵙ ⴷ ⵓⵎⴳⵓⵔⴰⵏ ⴰⵎⴰⵢⵏⵓ ⴳ ⵏⵏⴰⴹⵓⵕ ⴰⵖⵍⵍⵓⵢ ⵏ ⵓⴳⵔⴰⴽⴰⵍ.

ⵉⵜⵜⴰⵙ ⴷ ⵓⴳⵔⴰⵡ ⴰⴷ, ⵉ ⵉⵜⵜⴰⴷⴼⵏ ⴳ ⵓⵎⵏⵉⴷ ⵏ ⵓⴽⵓⵎⴰⵙⵉ ⵏ ⵓⵙⵡⵓⵔⵉ ⵏ ⵓⴼⵜⴰⵙ ⴰⴷ ⴳ ⵓⵣⴳⵏ ⴰⵎⴳⴳⴰⵔⵓ ⵏ ⵓⵙⴳⴳⵯⴰⵙ ⴰⴷ, ⴳ ⵉⵊⵊⵏ ⵓⵙⴰⵜⵉ ⵏ ⵜⵎⵓⵖⵍⵉ ⴷ ⵜⴰⴳⵍⴷⴰⵏⵜ ⵉⵜⵜⵅⵙⵏ ⴰⴷ ⵜⵇⵇⵏ ⵜⴰⴷⵎⵙⴰ ⵏ ⵜⴳⵍⴷⴰ ⵙ ⵉⵙⴷⴷⵉⵢⵏ ⵏ ⵡⴰⵣⴰⵍ ⵉⵎⴰⴹⵍⴰⵏⵏ, ⵙ ⵜⵎⴳⴳⴰ ⵏ ⵛⴰ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⵏ ⵓⴼⵜⴰⵙ ⵉⴱⴱⵓⵖⵍⴰⵏ.

ⵅⵏⵏⵉ, ⴳ ⵓⴳⵔⴰⵡ ⴰⴷ ⵏ ⵜⵡⵓⵔⵉ, ⵉⵙⵙⵎⵏⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵜⵎⵙⵙⵓⴳⵓⵔⵜ ⵏ ⵏⵏⴰⴹⵓⵕ ⴰⵖⵍⵍⵓⵢ ⵏ ⵓⴳⵔⴰⴽⴰⵍ, ⵎⴰⵙⵙ ⴼⵓⵄⴰⴷ ⵍⴱⵔⵉⵏⵉ, ⵉⵊⵊⵏ ⵓⵙⴼⵙⵔ ⴳⵔ ⵉⴼⴰⵙⵙⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⵅⴼ ⵎⴰⵏⵉ ⵜⵡⵉⴹ ⵜⵡⵓⵔⵉ ⴳ ⵓⵙⵏⴼⴰⵔ ⴷ ⵜⵎⴳⴳⴰ ⵉ ⵉⵜⵜⵡⴰⴳⴳⵏ ⴰⵔ ⵢⵉⴹⴰ.

ⴰⵡⵔⵏⵉ ⵉ ⵓⵎⵓⵔⵙ ⴰⴳⵔⴰⵖⵍⴰⵏ ⵉ ⵉⴳⴳⴰ ⵓⴼⵜⴰⵙ ⵏ ⵟⴰⵏⵊⴰ ⴰⴳⵔⴰⵖⵍⴰⵏ, ⵉ ⵉⴷⵡⵍⵏ ⴷ ⴰⵎⵎⴰⵙ ⵏ ⵓⴼⵜⴰⵙ ⴰⵎⵣⵡⴰⵔ ⴳ ⵡⴰⴼⵔⵉⴽⴰ ⴷ ⵓⴳⵔⴰⴽⴰⵍ, ⵉⵜⵜⴰⵙ ⴷ ⵓⵙⵏⴼⴰⵔ ⴰⴷ ⴰⵎⴰⵢⵏⵓ ⵏⵏⴰⴹⵓⵕ ⴰⵖⵍⵍⵓⵢ ⵏ ⵓⴳⵔⴰⴽⴰⵍ ⴷ ⴰⴽⵎⵎⵍ ⵉ ⵜⴽⴰⵢⵍⴰⵍⵜ ⴰⴷ ⵜⴰⴳⵍⴷⴰⵏⵜ, ⵃⵎⴰ ⴰⴷ ⵉⵎⵎⵔⵙ ⵉⵊⵊⵏ ⵉⴽⵓⵙⵉⵙⵜⵉⵎ ⵏ ⵓⴼⵜⴰⵙ ⴷ ⴰⵏⴰⵎⵓⵔ ⵉⵕⵡⵉⵏ, ⴳ ⵓⵙⵡⵓⵔⵉ ⵏ ⵓⵎⵃⵉⵣⵡⴰⵔ ⵏ ⵜⴷⴰⵎⵙⴰ ⵜⴰⵏⴰⵎⵓⵔⵜ, ⴷ ⵓⵅⵍⴰⵇ ⵏ ⵜⵡⵓⵔⵉⵡⵉⵏ ⴷ ⵜⴳⵎⵉ ⴳ ⵉⴳⵔⴰⵏ ⵏ ⵡⴰⴽⴰⵏ.  

ⵉⵜⵜⴱⴷⴷⴰ ⵓⵙⵉⵏⴰⴳ, ⵉ ⵉⵜⵜⵡⴰⴳⴳⵏ ⴰⵎ ⵉⵊⵊⵏ ⵓⵙⵏⴼⴰⵔ ⵉⵎⵍⴰⴷⴰⵏ, ⵅⴼ ⵓⵡⴷⴷⵉⵙ ⵏ ⵓⴼⵜⴰⵙ ⵙⴳ ⵜⴰⵙⵓⵜ ⴷ ⵜⴰⵎⴰⵢⵏⵉⵜ ⴰⴽⵉⴷⵙ ⵉⵊⵊⵏ ⵜⵏⴱⴷⴰⵜ ⵏ ⵜⵎⴳⵓⵔⵉ ⴷ ⵜⴰⵍⵓⵊⵙⵜⵉⵢ ⴷ ⵜⵏⵣⵎⴰⵔⵜ ⴷ ⵜⴰⵎⵉⵔⵉⵡⵜ, ⵎⴰⵏⵉ ⵉ ⴷ ⵉⵡⵡⴰ ⴰⵔ ⴰⵙⵙⴰ ⵛⴰ ⵏ ⵉⵙⵙⴰⵔⵓⵜⵏ ⴷ ⵉⵎⴰⵜⴰⵢⵏ ⴷ ⵓⵙⵍⵉⴳⵏ ⵡⵡⴹⵏ 51 ⵎⵍⵢⴰⵔ ⴷⵔⵀⵎ.

ⵎⴰ ⴷⴳ ⵓⵙⵡⵉⵔ ⵏ ⵓⴼⵜⴰⵙ, ⵜⵜⵡⴰⴳⴳⵏⵜ ⵎⵕⵕⴰ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⵜⵉⴷⵙⵍⴰⵏⵉⵏ, ⵣⵣⴰⴳⵙⵏⵜ 5.4 ⴽⵍⵎ ⵏ ⵜⵉⵏⵏⵉ ⵉⵜⵜⵕⵥⵥⴰⵏⵜ ⵜⵉⵙⴼⴰⵢ, 4 ⴽⵍⵎ ⵏ ⵙⵉⵔⴰⵜ, ⴷ 4 ⵏ ⵡⴰⵎⵎⴰⵙⵏ ⵏ ⵉⵏⵉⵔⵊⵉ.

ⵅⵎⵉ ⵉ ⵖⴰ ⵉⴽⵓⵎⴰⵙⴰ, ⴰⵜⴰⴼ ⴰⴷ ⵉⴽⵙⵉ 5 ⵎⵍⵢⵓⵏ ⵏ ⵍⵃⴰⵡⵢⴰ, ⴷ 35 ⵎⵍⵢⵓⵏ ⵟⵓⵏ ⵏ ⵙⵙⵍⵄⵜ ⵢⵓⵣⵣⵍⵏ ⴷ ⵜⵏⵏ ⵉⵇⵙⵃⵏ. ⵎⴰ ⴷⴳ ⵓⵙⵡⵉⵔ ⵉⴳⴳⵯⵊⵏ, ⴰⵜⴰⴼ ⴰⴷ ⵉⴽⵙⵉ 12 ⵎⵍⵢⵓⵏ ⵏ ⵍⵃⴰⵡⵢⴰ ⴷ 15 ⵎⵢⵓⵏ ⵟⵓⵏ ⵏ ⵙⵙⵍⵄⵜ ⵉⵜⵜⴰⵣⵣⵍⵏ.

ⴰⵡⵔⵏⵉ ⵉ ⵓⴼⵙⴰⵔ ⴰⵔ, ⵉⵡⵛⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵕⴱⴱⵉ, ⵜⴰⵔⴰⵜⵉⵏ ⵏⵏⵙ ⵢⴰⵜⵜⵓⵢⵏ ⵉ ⵎⵕⵕⴰ ⵉⵎⵍⴰⴷⴰⵏ ⵃⵎⴰ ⴰⴷ ⴽⵙⵉⵏ ⵎⵕⵕⴰ ⵜⵉⵎⴳⴳⴰ ⵉ ⵣⵉ ⵖⴰ ⵉⴽⵓⵎⴰⵙⴰ ⵓⴳⵔⴰⵡ ⴳ ⵎⵉⵏ ⵉⴽⵏⴰⵏ, ⴷ ⵍⵅⴷⵎⵜ ⵅⴼ ⵓⵏⴼⴼⴷ ⵏⵏⵙ ⴰⴷⵖⵢⴰⵏⵏ ⴷ ⵓⵙⵉⴷⴼ ⵏ ⵉⵃⵓⴷⵔⵉⵢⵏ ⴷ ⵓⵙⵅⴷⵎ ⵏⵏⵙⵏ.

ⵎⴰⵎⴽ ⵉⵡⵛⴰ ⴱⴰⴱ ⵏ ⵡⴰⴷⴷⵓⵔ ⵜⴰⵔⴰⵜⵉⵏ ⵏⵏⵙ ⵎⴰⵃⵏⴷ ⴰⴷ ⵙⵜⴰⴼⴷⵏⵜ ⵜⵉⵙⴳⴳⵯⵉⵡⵉⵏ ⵉ ⴷ ⵢⵓⵙⴰⵏ ⴳ ⵡⴰⴽⴰⵍ ⵏ ⵓⴼⵜⴰⵙ ⴰⴷ, ⴰⴽⵉⴷⵙ ⵉⵔⴰⵃ ⵓⵙⵖⵔⵜ ⴰⵖⵔⵎⴰⵏ ⵎⴰⵃⵏⴷ ⴰⴷ ⴽⴽⵔⵏ ⵙ ⵓⴼⵜⴰⵙ ⵏ ⵜⵓⴷⵔⵜ ⵏ ⵜⵎⵏⴰⴹⵜ, ⴰⴷ ⴳⴳⵏ ⵉⵊⵊⵏ ⵓⴼⵜⴰⵙ ⵏ ⵜⵡⵓⵔⵉ ⵉ ⵖⴰ ⵉⴹⵎⵏⵏ ⵜⵉⴳⵎⵉ ⵏ ⵢⵉⵎⴰⵍ ⵏ ⵓⵙⵏⴼⴰⵔ.