ⵢⵓⴳⴳⴰ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴰⵙⴳⵎⴹ ⵏ ⵓⵎⵙⴰⵙⴰ ⵖⴼ ⵜⵢⴰⴼⵓⵜⵉⵏ ⵏ ⵓⵎⵙⴰⵡⴰⵍ ⴰⵏⴰⵎⵓⵏ ⴳ ⵢⵉⴳⵔ ⵏ ⵓⵙⵙⵍⵎⴷ ⴰⵏⴰⴼⵍⵍⴰ

ⵉ ⵓⵎⵙⴰⵙⴰ ⴰⵙⴷⵓⵙ ⵏ ⵡⴰⵍⵍⴰⵏ ⵏ ⵓⵏⴱⴰⴹ, ⴰⵙⵙⵔⵇⴱ ⵏ ⵉⵙⵍⵎⴰⴷⵏ ⵉⵎⵔⵣⴰ ⴳ ⵓⵙⵙⵍⵎⴷ ⴰⵏⴰⴼⵍⵍⴰ, ⴷ ⵓⵙⵎⵀⵍ ⵏ ⵓⵖⴰⵡⴰⵙ ⵏ ⵓⵖⴰⵡⵍ ⵏ ⵓⵙⵏⴼⵍ ⵏ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵏⵓⵍⴼⵓ.
ⵉⵙⵙⵉⵅⴼ ⵎⴰⵙⵙ ⵄⴰⵣⵉⵣ ⴰⵅⵏⵓⵛ, ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⴰⵙⵙ ⵏ ⵓⴽⵡⴰⵙ 20 ⴽⵟⵓⴱⵕ 2022 ⴳ ⵕⵕⴱⴰⵟ, ⵜⵉⵍⴰⵍ ⵏ ⵓⵙⴳⵎⴹ ⴳⵔ ⵜⵏⴱⴰⴹⵜ ⴷ ⵓⵏⵎⴰⵍⵍⵓ ⵜⴰⵏⴰⵎⵓⵔⵜ ⵏ ⵓⵙⵙⵍⵎⴷ ⴰⵏⴰⴼⵍⵍⴰ, ⵉⵡⴰⵜⵙⵏ ⴰⵙⵖⵔⵜ ⴷ ⵓⵙⴼⵓⵍⴽⵉ ⵏ ⵓⵏⴰⴳⵔⴰⵡ ⵏ ⵓⵙⵙⵍⵎⴷ ⴰⵏⴰⴼⵍⵍⴰ ⴳ ⵉⵍⵍⴰ ⴰⴷ ⴰⵙ ⵢⵓⵓⵍ ⵓⴱⵓⵔⵣ ⵏⵏⵙ ⴷ ⵓⵙⴷⵓⵙ ⵏ ⵜⵍⴷⴰⵢⵜ ⵏ ⵜⴰⵣⵣⵓⵍⵜ ⵏ ⵓⵙⵍⵎⴰⴷ ⴰⵎⵔⵣⵓ ⴷ ⵓⵏⵏⵓⵕⵥⵎ ⵖⴼ ⵜⵙⵓⴳⴰⵔ ⵜⵉⵎⵖⵔⴰⴱⵉⵢⵉⵏ ⴳ ⴱⵕⵕⴰ, ⴷ ⵓⴹⵎⴰⵏ ⵏ ⵏ ⵜⴼⴰⴷⵉⵡⵉⵏ ⵉⵖⵓⴷⴰⵏ ⵉ ⵜⵡⵓⵔⵉ ⵏⵏⵙ, ⴷ ⵓⵙⵙⵉⵜⴳ ⵏ ⵜⵣⵎⵎⴰⵔ ⴳ ⵉⴳⵔⴰⵏ ⵏ ⵓⵙⵙⵍⵎⴷ ⴷ ⵓⵔⵣⵣⵓ ⴷ ⵡⵓⵜⵓⵢ, ⴷ ⵓⵙⴷⵓⵙ ⵏ ⵡⴰⵏⵙⴰ ⵏ ⵜⵙⴷⴰⵡⵉⵜⵉⵏ ⴷ ⵓⵥⴹⴰⵕ ⵏⵏⵙⵏⵜ ⴳ ⵓⵙⵉⴷⴼ ⵏ ⵜⵙⵓⴳⴰⵔ. ⵉⵙⵙⴳⵎⴹ ⴰⵎⵙⴰⵙⴰ ⵎⴰⵙⵙ ⵄⴱⴷ ⵍⵍⴰⵟⵉⴼ ⵎⵉⵔⴰⵡⵉ, ⴰⵎⴰⵡⵙⴰⵙ ⵏ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵏⵓⵍⴼⵓ, ⴷ ⵎⴰⵙⵙ ⴼⴰⵡⵣⵉ ⵍⵇⵊⵄ, ⴰⵎⴰⵡⵙⴰⵙ ⴰⵎⴰⵔⴰ ⵖⵓⵔ ⵜⵎⴰⵡⵙⴰⵙⵜ ⵏ ⵜⴷⴰⵎⵙⴰ ⵉⵜⵜⵓⵙⵎⴰⴳⵍⵏ ⵙ ⵜⵎⵙⴰⵙⵜⵍⵜ, ⴷ ⵎⴰⵙⵙ ⵎⵓⵃⵎⵎⴰⴷ ⵊⴰⵎⴰⵍ ⵚⴱⴰⵏⵉ, ⴰⵎⴰⵔⴰ ⴰⵎⴰⵜⴰⵢ ⵏ ⵓⵏⵎⴰⵍⵍⵓ ⴰⵏⴰⵎⵓⵔ ⵏ ⵓⵙⵙⵍⵎⴷ ⴰⵏⴰⴼⵍⵍⴰ.
ⵉⵙⵙⵏⵜⵎ ⵎⴰⵙⵙ ⵄⴰⵣⵉⵣ ⴰⵅⵏⵓⵛ, ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙ ⴷ ⵜⵉⵏⴽⵔⵉ ⵙ ⵢⵉⴳⵔ ⵏ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵙⴷⵓⵙ ⵏ ⵜⵙⵓⴳⴰⵔ ⵏ ⵜⵙⴷⴰⵡⵉⵜ ⵜⴰⵎⵖⵔⵉⴱⵉⵜ, ⵉⵇⵇⵏ ⵙ ⵓⵍⵜⴰⵖ ⵏ ⵉⵙⵍⵎⴰⴷⵏ ⵏ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴳ ⵓⵎⵓⵔⵙ ⵏⵏⵙ, ⵉⵙⵙⵓⵜⴳ ⵙ ⵜⵡⵓⵔⵉ ⵍⵍⵉ ⵜⵜⴳⴳⵏ ⵉⵙⵍⵎⴰⴷⵏ ⵏ ⵓⵙⵙⵍⵎⴷ ⴰⵏⴰⴼⵍⵍⴰ ⴳ ⵓⵙⵎⵖⵔⴱ ⵏ ⵉⵙⵓⵜⴰⵢ.
ⵉⵔⵏⵓ ⵎⴰⵙ  ⵉⵍⴰ ⵓⵖⴰⵡⴰⵙ ⴰⵏⴰⵎⵓⵔ ⵏ ⵓⵖⴰⵡⵍ ⵏ ⵓⵙⵏⴼⵍ ⵏ ⵓⵏⴳⵔⴰⵡ ⵏ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵏⵓⵍⴼⵓ, ⵍⵍⵉ ⴷ ⵜⵙⵔⵙ ⵜⵎⴰⵡⴰⵙⵜ ⵏ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵏⵓⵍⴼⵓ ⵙ ⵜⵖⴰⵔⴰⵙⵜ ⵏ ⵓⴷⵔⴰⵡ, ⵉⵍⴰ ⴰⴼⵔⵉⵙ ⴰⵙⵜⵔⴰⵜⵉⵊⵉ, ⴰⵔ ⴷ ⵉⵜⵜⴰⵡⵉ ⵜⴰⵎⵓⵙⵜ ⵏⵏⵙ ⵙⴳ ⵉⵙⵡⴰⵍⴰⵜⵏ ⵉⵙⵜⵔⴰⵜⵉⵊⵉⵢⵏ ⵏ ⵓⵣⵓⵔⵜ ⴰⵏⴳⵎⵉ ⴰⵎⴰⵢⵏⵓ, ⵉⵎⴽⵉⵏⵏⴰ ⵉⵜⵜⵡⴰⵜⴰⵙ ⴰⵙⵓⵖⵍ ⵏ ⵜⵎⵣⵉⵣⵡⴰⵔ ⵏ ⵓⵖⴰⵡⴰⵙ ⵏ ⵜⵏⴱⴰⴹⵜ, ⵙ ⵓⵥⵍⴰⵢ ⴳ ⵜⵙⴳⴰ ⵉⵇⵇⵏⵏ ⵙ ⵓⵙⴱⵓⵖⵍⵓ ⵏ ⴰⴷⴳⴰⵔ ⴰⵏⴼⴳⴰⵏ.
ⴱⴹⴰⵏ ⵉⵎⵏⵏⵉⵜⵏ ⵏ ⵓⵎⵙⴰⵙⴰ ⴰⴷ ⵖⴼ ⴽⵕⴰⴹ ⵉⵙⴳⵓⵎⵏ ⵉⴷⵙⵍⴰⵏⵏ, ⵇⵇⵏⵏ ⵙ ⵓⵙⴷⵓⵙ ⵏ ⵡⴰⵍⵍⴰⵏ ⵏ ⵓⵏⴱⴰⴹ ⴳ ⵓⵙⵡⵉⵔ ⵏ ⵜⵎⵔⵙⴰⵍ ⵏ ⵓⵙⵙⵍⵎⴷ ⴰⵏⴰⴼⵍⵍⴰ ⵙ ⵓⵙⵏⴼⵍ ⵏ ⵓⵙⵍⴳⵏ 01-00 ⵉⵙⵙⵓⴷⵓⵙⵏ ⴰⵙⵙⵍⵎⴷ ⴰⵏⴰⴼⵍⵍⴰ, ⴷ ⵓⵙⵙⵔⵇⴱ ⵏ ⵉⵙⵍⵎⴰⴷⵏ ⵉⵎⵔⵣⴰ ⴳ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵙⵙⵉⵜⴳ ⵏ ⵜⵣⵎⵎⴰⵔ ⵏⵏⵙⵏ, ⴷ ⵓⵙⵎⵀⵍ ⵏ ⵓⵖⴰⵡⴰⵙ ⵏ ⵓⵖⴰⵡⵍ ⵏ ⵓⵙⵏⴼⵍ ⵏ ⵓⵏⴰⴳⵔⴰⵡ ⵏ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵏⵓⵍⴼⵓ.

 

ⵙ ⵜⵓⵍⵍⵓⵖⵜ ⵏ ⵓⵎⵙⴰⵙⴰ ⴰⴷ, ⵔⴰⴷ ⵉⵜⵜⵓⴳ ⵓⵏⴳⵔⴰⵡ ⴰⵎⴰⵢⵏⵓ ⵉⵥⵍⵉⵏ ⵙ ⵜⵙⵇⵇⵉⵎⵜ ⵏ ⵉⵙⵍⵎⴰⴷⵏ ⵉⵎⵔⵣⴰ ⵉⵜⵜⵓⵙⴽⴰⵏ ⵖⴼ ⵡⵓⴽⵍⴰⵍ ⴷ ⵜⵙⵓⴳⵔⵜ. ⵉⵎⴽⵉⵏⵏⴰ ⵉⵜⵜⵉⵏⵉ ⵓⵎⵙⴰⵙ ⵙ ⵓⵙⵖⵓⴷⵓ ⵏ ⵡⴰⴷⴷⴰⴷ ⴰⵥⵕⴼⴰⵏ ⵏ ⵜⵙⵇⵇⵉⵎⵜ ⵏ ⵉⵙⵍⵎⴰⴷⵏ ⵉⵎⵔⵣⴰ ⴳ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵜⵎⵔⵙⴰⵍ ⵏ ⵓⵙⵎⵓⵜⵜⴳ ⵏ, ⵉⵙⵓⵜⴰⵢ ⵉⵏⴰⴼⵍⵍⴰⵜⵏ, ⴳ ⵡⵓⵖⵓⵍ ⵏ ⵓⵏⴳⵔⴰⵡ ⵏ ⵉⵎⵢⴰⵔⴰⵣⵏ ⴰⵙⵏ ⵉⵜⵜⵓⴼⴽⴰⵏ, ⵍⵍⵉ ⵔⴰⴷ ⵉⵜⵜⵓⵥⵕⴼⵏ ⵖⴼ 3 ⵉⵙⴳⴳⵯⴰⵙⵏ ⵙⴳ ⵉⵏⵏⴰⵢⵔ 2023.
ⵉⵎⴽⵉⵏⵏⴰ ⵔⴰⴷ ⵉⵜⵜⵓⴳ ⵙ ⵢⵉⵙⵎ ⵏ ⵓⵎⵙⴰⵙⴰ ⴰⴷ ⴰⵏⵏⵓⵕⵥⵎ ⵏ ⵓⵙⵎⵀⵍ ⵏ ⵓⵙⵖⵓⴷⵓ ⴰⴱⵉⴷⴰⵖⵓⵊⵉ ⴰⵖⵣⵓⵔⴰⵏ ⴰⴽⴷ ⵓⵙⵏⵜⵉ ⵏ ⵓⵙⴳⴳⵯⴰⵙ ⴰⵙⴷⴰⵡⴰⵏ 2023-2024, ⴰⴽⴷ ⵓⵕⵥⵥⵓⵎ ⵏ ⵜⵣⵓⵏⵉⵡⵉⵏ ⵉⵎⵙⴰⵙⴰⵏ ⴷ ⵜⵎⵣⵉⵣⵡⴰⵔ ⵏ ⵢⵉⴳⵔ ⵏ ⵓⵙⵢⴰⴼⵓ ⴷ ⵜⵎⵥⵍⴰⵢ ⵏ ⵢⵉⴳⵔⴰⵏ ⵉⵏⴰⴽⴰⵍⵏ.
ⵍⵍⴰⵏ ⴳ ⵓⴳⵔⴰⵡ ⴰⴷ ⴳ ⵜⵙⴳⴰ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵉⴷ ⵎⴰⵙⴰ ⴷ ⵉⴷ ⵎⴰⵙⵙ : ⵢⵓⵏⵙ ⵙⴽⵓⵔⵉ, ⴰⵎⴰⵡⵙⴰⵙ ⵏ ⵓⵙⵉⴷⴼ ⴰⴷⵎⵙⴰⵏ ⴷ ⵜⵎⵙⵙⵏⵜⵉⵜ ⵜⴰⵎⵥⵥⵢⴰⵏⵜ, ⴷ ⵜⵡⵓⵔⵉ ⴷ ⵜⵙⵓⴳⴰⵔ, ⴷ ⵄⴱⴷ ⵍⵟⵉⴼ ⵎⵉⵔⴰⵡⵉ, ⴰⵎⴰⵡⵙⴰⵙ ⵏ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵏⵓⵍⴼⵓ, ⴷ ⴼⴰⵡⵣⵉ ⵍⵇⵊⵄ, ⴰⵎⴰⵡⵙⴰⵙ ⴰⵎⴰⵔⵉ ⵖⵓⵔ ⵜⵎⴰⵡⵙⴰⵙⵜ ⵏ ⵜⴷⴰⵎⵙⴰ ⵏ ⵉⵥⵕⴼ, ⵉⵜⵜⵓⵙⵎⴰⴳⵍⵏ ⵙ ⵜⵎⵙⴰⵙⵜⵍⵜ, ⴷ ⵖⵉⵜⴰ ⵎⵥⵡⴰⵕ, ⵜⴰⵎⴰⵡⵙⴰⵙⵜ ⵜⴰⵎⴰⵔⵉⵜ ⵖⵓⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵉⵜⵜⵓⵙⵎⴰⴳⵍⵏ ⵙ ⵓⵎⵎⴰⵜⵜⵉ ⴰⵎⵉⴹⴰⵏ ⴷ ⵓⵙⵖⵓⴷⵓ ⵏ ⵜⵎⵀⵍⴰ, ⴷ ⵉⴳⵙⴰⵙ ⵏ ⵓⵏⵎⴰⵍⵍⵓ ⴰⵏⴰⵎⵓⵔ ⵏ ⵓⵙⵙⵍⵎⴷ ⴰⵏⴰⴼⵍⵍⴰ.