ⵉⵙⵙⵉⵅⴼ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴰⵙⵕⵚⵓ ⵏ ⵜⵏⵓⴼⴰ ⵏ ⵓⵙⴳⵏⴰⴼ ⵏ ⵡⴰⴷⴰⵙ ⴳ ⵜⵎⴰⵏⴰⵔ, ⵉⴱⴷⴷ ⴼ ⵓⵙⵎⵏⵉⴷ ⵏ ⵙⵉⵏ ⵉⵙⵏⴼⴰⵕⵏ ⵏ ⵓⵙⴳⵏⴰⴼ ⵉ ⵓⵙⴷⵓⵙ ⵏ ⵓⵙⴰⴽⴰ ⴰⴷⵓⵙⴰⵏ ⴳ ⵜⵙⴳⴰ ⵏ ⵎⵓⴳⴰⴷⵓⵕ

• ⴰⵙⴳⵏⴰⴼ ⵏ ⵡⴰⴷⴰⵙ ⴳ ⵜⵎⴰⵏⴰⵔ ⵔⴰⴷ ⵉⴼⴽ ⵜⵉⵏⵓⴼⴰ ⵏⵏⵙ ⵉ 86 ⵉⴼⴹ ⵏ ⵓⵎⵣⴷⴰⵖ ⵉⵜⵜⵓⴱⴹⴰⵏ ⴼ 15 ⵏ ⵜⴳⵔⴰⵡⵜ ⵜⴰⵏⴰⴽⴰⵍⵜ ;
• ⴰⵙⵕⵚⵓ ⵏ ⵓⵙⵏⴼⴰⵕ ⵏ ⵓⵙⴰⵃⴰ ⴷ ⵓⵙⵉⵡⵙ ⵏ ⵡⴰⵎⵎⴰⵙ ⴰⵙⴳⵏⴰⴼ ⴰⵙⴳⴰⵡⴰⵏ ⵙⵉⴷⵉ ⵎⵓⵃⵎⵎⴷ ⴱⵏ ⵄⴱⴷⵍⵍⴰⵀ ⴳ ⵎⵓⴳⴰⴷⵓⵕ ⵙ ⵢⴰⵜ ⵜⵉⵣⵉ ⵏ ⵓⵙⴽⴰⵔ ⵏ 8 ⵉⵢⵢⵉⵔⵏ ;
• ⴰⵙⵖⵎⴷ ⴼ ⵓⵖⴰⵡⴰⵙ ⵏ ⵓⵙⵡⵓⴷⴷⵓ ⵏ ⵡⴰⵎⵎⴰⵙ ⴰⵙⴳⵏⴰⴼ ⴰⵙⴳⴰⵡⴰⵏ ⴳ ⵎⵓⴳⴰⴷⵓⵕ ⵔⴰⴷ ⵙⵉⵏⵜⵉⵏⵜ ⵜⵡⵓⵔⵉⵡⵉⵏ ⵏⵏⵙ ⵓⵔⵜⴰ ⵜⴳⴳⵔ ⵜⵙⴳⴳⵯⴰⵙⵜ ⴰⴷ.
   

ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⴷ ⵓⵎⴰⵡⵙⴰⵙ ⵏ ⵜⴷⵓⵙⵉ ⴷ ⵓⴼⵔⴰⴳ ⴰⵏⴰⵎⵓⵏ ⵎⴰⵙⵙ ⴰⵎⵉⵏ ⵜⵀⵔⴰⵡⵉ, ⴷ ⵓⵏⴱⴰⴹ ⵏ ⵜⵙⴳⴰ ⵏ ⵎⵓⴳⴰⴷⵓⵕ ⵎⴰⵙⵙ ⵎⵓⵃⵎⵎⴷ ⵔⴰⵛⵉⴷ, ⴰⵙⵙ ⵏ ⵓⵢⵏⴰⵙ 20 ⵢⵓⵍⵢⵓⵣ 2026 ⴳ ⵜⵙⴳⴰ ⵏ ⵎⵓⴳⴰⴷⵓⵕ, ⴰⵙⵕⵚⵓ ⵏ ⵜⵏⵓⴼⴰ ⵏ ⵓⵙⴳⵏⴰⴼ ⵏ ⵡⴰⴷⴰⵙ ⴳ ⵜⴳⵔⴰⵡⵜ ⵏ ⵜⵎⴰⵏⴰⵔ, ⴷ ⵓⴱⴷⴷⴰⴷ ⴼ ⵓⵙⵎⵏⵉⴷ ⵏ ⵙⵉⵏ ⵉⵙⵏⴼⴰⵕⵏ ⵏ ⵓⵙⴳⵏⴰⴼ ⵉⵙⴽⵓⵜⵏ ⵉ ⵓⵙⴷⵓⵙ ⵏ ⵜⵓⵚⴽⵉⵡⵉⵏ ⵜⵉⴷⵓⵙⴰⵏⵉⵏ ⵏ ⵓⵙⴳⵏⴰⴼ ⴳ ⵜⵙⴳⴰ, ⴰⵢⴰⴷ ⵉⵎⵙⴰⵙⴰ ⴷ ⵉⵙⵡⴰⵍⴰⵜⵏ ⵉⴳⵍⴷⴰⵏⵏ ⵉⵏⴰⴼⵍⵍⴰⵜⵏ, ⵉⵔⴰⵏ ⴰⴷ ⵙⵔⵙⵏ ⵢⴰⵏ ⵓⵏⴰⴳⵔⴰⵡ ⴰⴷⵓⵙⴰⵏ ⵉⵎⵓⵔⵙⵏ ⴷ ⵉⵖⵣⵣⵉⴼⵏ ⴷ ⵉⵣⴷⴷⵉⴳⵏ, ⵉⵜⵜⴰⵊⵊⴰⵏ ⴰⴽⵛⵛⵓⵎ ⴰⵎⴰⵖⵓⵙ ⵙ ⵜⵏⵓⴼⴰ ⵜⵉⴷⵓⵙⴰⵏⵉⵏ ⵜⵉⴼⴰⵍⴽⴰⵢⵉⵏ ⵉ ⵜⵏⴰⴼⵓⵜ ⵏ ⵎⴰⵕⵕⴰ ⵜⵉⵏⴰⵎⵓⵔⵉⵏ ⴷ ⵉⵏⴰⵎⵓⵔⵏ.
ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⵎⴰⵙ ⵜⵙⵡⵓⵔⵉ ⵜⵏⴱⴰⴹⵜ ⵙ ⵜⵉⵣⵎⵎⴰⵔ ⵏⵏⵙ ⴰⴼⴰⴷ ⴰⴷ ⵜⵙⵙⵉⵣⵡⵉⵔ ⴰⵙⴰⵃⴰ ⵏ ⵜⵓⵚⴽⵉⵡⵉⵏ ⵜⵉⴷⵓⵙⴰⵏⵉⵏ ⴷ ⵓⵙⴷⵓⵙ ⵏ ⵓⵙⴰⴽⴰ ⴰⴷⵓⵙⴰⵏ, ⴷ ⵓⵙⵇⵕⴱ ⵏ ⵜⵏⵓⴼⴰ ⵏ ⵓⵙⵊⵊⵉ ⵉ ⵜⵏⴰⵎⵓⵔⵉⵏ ⴷ ⵉⵏⴰⵎⵓⵔⵏ, ⴰⴼⴰⴷ ⴰⴷ ⵙⴼⴰⵍⴽⵉⵏ ⵜⵉⴳⵏⴷⴰⵡⵉⵏ ⵏ ⵓⵙⵏⵓⴱⴳ ⵏⵏⵙⵏ ⴷ ⵓⵙⵡⴰⵍⴰ ⵏⵏⵙⵏ, ⴷ ⵓⵙⵖⵍⵉ ⵏ ⵜⴼⴰⵍⴽⴰⵢⵜ ⵏ ⵓⵙⵎⴰⴳⵍ ⵙⵔⵙⵏ, ⴷ ⵓⵙⴽⴰⵔ ⵏ ⵜⵣⴷⴷⵉⴳⵜ ⵜⴰⵏⴰⴽⴰⵍⵜ ⴳ ⵓⴽⵛⵛⵓⵎ ⵙ ⵜⵏⵓⴼⴰ ⵜⵉⴷⵓⵙⴰⵏⵉⵏ, ⵙ ⵓⵎⵙⴰⵙⴰ ⴷ ⵉⵙⵡⴰⵍⴰⵜⵏ ⵉⴼⴰⵍⴽⴰⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷ ⵜ ⵉⵏⵚⵕ ⵕⴱⴱⵉ.
ⴰⵔ ⵉⵙⴽⴰⵔ ⵓⵙⴳⵏⴰⴼ ⵏ ⵡⴰⴷⴰⵙ ⴳ ⵜⵎⴰⵏⴰⵔ ⵢⴰⵜ ⵜⵎⵔⵏⵉⵡⵜ ⵜⴰⴼⴰⵍⴽⴰⵢⵜ ⵉ ⵓⵙⴰⴽⴰ ⴰⴷⵓⵙⴰⵏ ⴳ ⵜⵎⵏⴰⴹⵜ, ⴰⵢⵍⵍⵉ ⵔⴰⴷ ⵉⴷⵔⵓ ⴳ ⵓⵙⴼⴰⵍⴽⵉ ⵏ ⵓⴽⵛⵛⵓⵎ ⵏ ⵉⵎⵣⴷⴰⵖⵏ ⵙ ⵜⵏⵓⴼⴰ ⵜⵉⴷⵓⵙⴰⵏⵉⵏ ⵜⵉⴷⵙⵍⴰⵏⵉⵏ ⴷ ⵜⵉⵏ ⵜⵓⵥⵍⴰⵢⵜ, ⴷ ⵓⵙⵉⴷⵔⵓⵙ ⵏ ⵉⵎⵣⴰⵔⴰⵢⵏ ⵉⵏⴰⴽⴰⵍⵏ ⴳ ⵓⵙⵙⵉⵜⴳ ⵙⴳ ⵓⵙⵊⵊⵉ, ⴷ ⵓⵙⴼⵙⵙⵓⵙ ⵏ ⵜⴰⵎⴰⵔⴰ ⵏ ⵓⵎⵓⴷⴷⵓ ⵏ ⵜⵏⴰⵎⵓⵔⵉⵏ ⴷ ⵉⵏⴰⵎⵓⵔⵏ ⵙ ⵜⵎⵏⴰⴹⵉⵏ ⵢⴰⴹⵏⵉⵏ ⴰⴼⴰⴷ ⴰⴷ ⴰⵎⵥⵏ ⵜⵉⵏⵓⴼⴰ ⵜⵉⴷⵓⵙⴰⵏⵉⵏ.
ⵉⵜⵜⵓⵙⴽⴰⵔ ⵜⵎⵔⵙⵍⵜ ⴰⴷ ⵜⴰⴷⵓⵙⴰⵏⵜ ⴼ ⵢⴰⵜ ⵜⵊⵓⵎⵎⴰ ⵜⴰⵎⴰⵜⴰⵢⵜ ⵉⴳⴳⵓⵜⵏ ⴼ 30 ⵉⴼⴹ ⵏ ⵓⵎⵉⵜⵔⵓ ⴰⵎⴽⴽⵓⵥ, ⵙ ⵢⴰⵏ ⵡⴰⴽⴰⵍ ⴰⵥⵕⴼⴰⵏ ⴰⵎⴰⵜⴰⵢ ⵉⴳⴳⵓⵜⵏ ⴼ 126 ⵏ ⵓⵎⵍⵢⵓⵏ ⵏ ⴷⴷⵔⵀⵎ, ⵔⴰⴷ ⵙⵙⵉⵜⴳⵏ ⵙⴳ ⵜⵏⵓⴼⴰ ⵏⵏⵙ ⵓⴳⴳⴰⵔ ⵏ 86 ⵉⴼⴹ ⵏ ⵓⵎⵣⴷⴰⵖ ⵉⵜⵜⵓⴱⴹⴰⵏ ⵅⴼ 15 ⵏ ⵜⴳⵔⴰⵡⵜ ⵜⴰⵏⴰⴽⴰⵍⵜ. ⴷ ⵓⵙⵎⵓⵏ ⵏ ⵉⵙⵓⴳⴰⵎ ⵉⵏⴼⴳⴰⵏⵏ ⵉⵎⵙⵎⵓⵜⵜⴳⵏ ⴳⵉⵙⵏ 83 ⵏ ⵓⵎⵓⵣⴰⵢ ⵏ ⵜⴷⵓⵙⵉ, ⴰⵢⵍⵍⵉ ⵔⴰⴷ ⵉⵙⵙⵉⵅⴼ ⴰⵙⵎⵏⵉⴷ ⵏ ⵜⵏⵓⴼⴰ ⵜⵉⴷⵓⵙⴰⵏⵉⵏ ⵜⵉⵇⵕⵕⵓⴱⵉⵏ ⴷ ⵜⵉⵏ ⵉⵎⵙⴰⵙⴰⵏ ⴷ ⵉⵙⵉⴳⴳⵉⵍⵏ ⵏ ⵉⵎⵣⴷⴰⵖⵏ.
ⵉⵜⵜⵓⵙⵎⵏⵉⴷ ⴳ ⵜⵎⵍⴷⴰ ⴰⴷ ⵉ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⴰⵙⵏⴼⴰⵕ ⵏ ⵓⵙⴰⵃⴰ ⴷ ⵓⵙⵉⵡⵙ ⵏ ⵡⴰⵎⵎⴰⵙ ⴰⵙⴳⵏⴰⴼ ⴰⵙⴳⴰⵡⴰⵏ ⵙⵉⴷⵉ ⵎⵓⵃⵎⵎⴷ ⴱⵏ ⵄⴱⴷⵍⵍⴰⵀ ⴳ ⵎⵓⴳⴰⴷⵓⵕ, ⴷ ⵜⴰⵡⴰⵍⵜ ⵏ ⵓⵙⴽⴰⵔ ⵏ ⵡⴰⵎⵎⴰⵙ ⴰⵙⴳⵏⴰⴼ ⴰⵙⴳⴰⵡⴰⵏ ⴳ ⵜⵎⴷⵉⵏⵜ ⵍⵍⵉ ⵔⴰⴷ ⵙⵉⵏⵜⵉⵏⵜ ⵜⵡⵓⵔⵉⵡⵉⵏ ⵏⵏⵙ ⵓⵔⵜⴰ ⵜⴳⴳⵔ ⵜⵙⴳⴳⵯⴰⵙⵜ ⴰⴷ.
ⴳ ⵎⴰ ⵉⵥⵍⵉⵏ ⵙ ⵓⵙⵏⴼⴰⵕ ⵏ ⵡⴰⵍⵍⴰⵙ ⵏ ⵓⵙⴰⵃⴰ ⴷ ⵓⵙⵉⵡⵙ ⵏ ⵡⴰⵎⵎⴰⵙ ⴰⵙⴳⵏⴰⴼ ⴰⵙⴳⴰⵡⴰⵏ ⵙⵉⴷⵉ ⵎⵓⵃⵎⵎⴷ ⴱⵏ ⵄⴱⴷⵍⵍⴰⵀ, ⵉⵀⵎⵎⴰ ⵓⴳⵣⵣⵓⵎ ⴰⵎⵣⵡⴰⵔⵓ ⵏⵏⵙ ⵢⴰⵜ ⵜⵊⵓⵎⵎⴰ ⵜⴰⴽⴰⵍⵉⵜ ⵉⴳⴳⵓⵜⵏ ⴼ 31 ⵉⴼⴹ ⵏ ⵓⵎⵉⵜⵔⵓ ⴰⵎⴽⴽⵓⵥ, ⴷ ⵜⵊⵓⵎⵎⴰ ⵉⵜⵜⵓⴱⵏⴰⵏ ⵜⵍⴽⵎ 9 ⵉⴼⴹⵏ ⵏ ⵓⵎⵉⵜⵔⵓ ⴰⵎⴽⴽⵓⵥ, ⵙ ⵢⴰⵏ ⵡⴰⴽⴰⵍ ⴰⵥⵕⴼⴰⵏ ⴰⵎⴰⵜⴰⵢ ⵉⴳⴳⵓⵜⵏ ⴼ 83 ⵏ ⵓⵎⵍⵢⵓⵏ ⵏ ⴷⴷⵔⵀⵎ, ⴷ ⵜⵣⵎⵔⵜ ⵏ ⵓⵙⵏⵓⴱⴳ ⵜⵍⴽⵎ 167 ⵏ ⵓⵙⵓ. ⴷ ⵉⵜⵜⵓⴽⵛⴰⴹ ⴰⴷ ⵜⴰⵎⵥ ⵜⵡⵓⵔⵉ ⴰⵜⵜⴰⵢⵏ ⵏ 8 ⵉⵢⵢⵉⵔⵏ.
ⵔⴰⴷ ⵉⵙⵙⵉⵅⴼ ⵓⵙⵏⴼⴰⵕ ⴰⴷ, ⴹⴰⵕⵜ ⵏ ⵓⵙⵎⴷ ⵏⵏⵙ, ⴰⵙⴷⵓⵙ ⵏ ⵜⵣⵎⵔⵜ ⵏ ⵓⵙⵏⵓⴱⴳ ⴷ ⵓⵙⴼⴰⵍⴽⵉ ⵏ ⵜⴼⴰⵍⴽⴰⵢⵜ ⵏ ⵓⵙⵎⴰⴳⵍ ⴳ ⵡⴰⴳⵏⵙ ⵏ ⵡⴰⵎⵎⴰⵙ ⴰⵙⴳⵏⴰⴼ ⴰⵙⴳⴰⵡⴰⵏ, ⵙ ⵓⵙⵎⵏⵉⴷ ⵏ ⵢⴰⵏ ⵓⵙⴰⴽⴰ ⵏ ⵓⵙⵊⵊⵉ ⵉⵎⵎⵓⵜⵜⴳⵏ ⵉⵙⵎⴰⵏⵏ ⴰⵙⴳⵏⴰⴼ ⴳ ⵜⵙⵏⵉⵊⵊⵉⵜ ⵜⴰⵎⴰⵜⴰⵢⵜ ⴷ ⵜⴰⴽⵔⵔⴰⵣⵜ ⴷ ⵉⵎⴰⴹⴰⵏ ⵏ ⵜⵎⵖⴰⵔⵉⵏ ⴷ ⵜⴰⵔⵡⴰ ⴷ ⵜⵙⵏⵉⵊⵊⵉⵜ ⵏ ⵉⵎⵥⵢⴰⵏⵏ, ⴷ ⵜⵏⵓⴼⴰ ⵏ ⵓⵙⴰⵔⵎ, ⴷ ⵜⴰⵔⵡⴰ, ⴷ ⵓⴼⵔⴰⴳ ⵏ ⵉⵎⵥⵢⴰⵏⵏ ⵉⵍⵓⵍⵏ ⴷⵖⵉ, ⴷ ⵓⵙⵙⴰⵏⵓⵏ ⴰⵎⴰⵙⵙⴰⵔ ⴷ ⵜⴰⴽⵔⵔⴰⵣⵜ ⵏ ⵉⵖⵙⵙⴰⵏ, ⴷ ⵉⵎⴰⵙⵙⵏ ⵉⵜⵉⵇⵏⵉⵢⵏ ⴷ ⵉⵍⵓⵊⵉⵙⵜⵉⴽⵏ ⴷ ⵉⵎⵙⵙⵓⴳⵓⵔⵏ ⵉⴷⵙⵍⴰⵏⵏ.
ⵎⴰⵛⴰ ⴳ ⵎⴰ ⵉⵥⵍⵉⵏ ⵙ ⵓⵙⵏⴼⴰⵕ ⵏ ⵓⵙⴽⴰⵔ ⵏ ⵡⴰⵎⵎⴰⵙ ⴰⵙⴳⵏⴰⴼ ⴰⵙⴳⴰⵡⴰⵏ ⴰⵎⵔⵏⵓ ⴳ ⵎⵓⴳⴰⴷⵓⵕ, ⵉⵜⵜⵓⴽⵛⴰⴹ ⴰⴷ ⵉⵜⵜⵓⵙⴽⴰⵔ ⴼ ⵢⴰⵜ ⵜⵊⵓⵎⵎⴰ ⵜⴰⴽⴰⵍⵉⵜ ⵜⵍⴽⵎ ⴰⵜⵜⴰⵢⵏ ⵏ 10 ⵉⵀⵉⴽⵜⴰⵔⵏ, ⴷ ⵙ ⵢⴰⵜ ⵜⵊⵓⵎⵎⴰ ⵉⵜⵜⵓⵖⵎⵙⵏ ⵜⵍⴽⵎ 48 ⵉⴼⴹ ⵏ ⵓⵎⵉⵜⵔⵓ ⴰⵎⴽⴽⵓⵥ, ⴷ ⵜⵣⵎⵔⵜ ⵏ ⵓⵙⵏⵓⴱⴳ ⵜⵍⴽⵎ 280 ⵏ ⵓⵙⵓ, ⴷ ⵙ ⵢⴰⵏ ⵡⴰⴽⴰⵍ ⴰⵥⵕⴼⴰⵏ ⴰⵎⴰⵜⴰⵢ ⴰⵎⵙⵉⵜⴳ ⵉⵍⴽⵎ 890 ⵏ ⵓⵎⵍⵢⵓⵏ ⵏ ⴷⴷⵔⵀⵎ.
ⵔⴰⴷ ⵉⵜⵜⵓⵙⴽⴰⵔ ⵡⴰⵎⵎⴰⵙ ⴰⵙⴳⵏⴰⴼ ⴰⴷ ⵙⴳ ⵢⴰⵜ ⵜⴳⵔⵓⵎⵎⴰ ⵏ ⵉⴳⵯⴷⵉⵎⵏ ⴷ ⵜⵏⵓⴼⴰ ⵜⵉⴷⵓⵙⴰⵏⵉⵏ ⴷ ⵜⵉⵜⵉⵇⵏⵉⵢⵉⵏ ⴷ ⵜⵉⵎⵙⵙⵓⴳⵓⵔⵉⵏ, ⵜⵙⵎⴰⵏ ⴰⴳⵯⴷⵉⵎ ⴰⵎⵙⵙⵓⴳⵓⵔ, ⴷ ⵓⴳⵯⴷⵉⵎ ⴰⵙⴳⵏⴰⴼ, ⴷ ⵓⴳⵯⴷⵉⵎ ⵉⵜⵜⵎⵓⴷⴷⵓⵏ, ⴷ ⵓⴳⵯⴷⵉⵎ ⴰⴷⵓⵙⴰⵏ ⴰⵜⵉⵇⵏⵉ, ⴷ ⵓⵍⵓⵊⵉⵙⵜⵉⴽ ⴰⴷⵓⵙⴰⵏ ⴰⵜⵉⵇⵏⵉ, ⴷ ⵓⵍⵓⵊⵉⵙⵜⵉⴽ ⴰⵎⴰⵜⴰⵢ, ⴷ ⵢⴰⵏ ⵓⵎⵓⵔⴽⵙ ⴰⴽⵔⵔⴰⵣ ⴷ ⵜⵉⵢⵏⴰⵜⵉⵏ ⵉ ⵓⴼⵔⴰⴳ ⵉⵛⵇⵇⴰⵏ ⴷ ⵓⵙⵙⵉⴷⵔ ⴷ ⵉⵎⵥⵢⴰⵏⵏ ⵉⵍⵓⵍⵏ ⴷⵖⵉ, ⴷ ⵜⵏⵓⴼⴰ ⵉ ⵉⵙⵉⴳⴳⵉⵍⵏ ⵉⴱⵕⵕⴰⵏⵉⵢⵏ, ⴷ ⵓⵣⵏⵣⴰⵕ, ⴷ ⵓⵙⴰⵔⵎ, ⴷ ⵜⵙⴰⵙⴼⵔⵜ, ⴷ ⵜⵉⵖⴰⵡⵍⵉⵡⵉⵏ, ⴰⵢⵍⵍⵉ ⵉⵜⵜⴰⵊⵊⴰⵏ ⵢⴰⵏ ⵓⵙⴰⴽⴰ ⴰⴷⵓⵙⴰⵏ ⵉⵎⵎⵓⵜⵜⴳⵏ ⴷ ⵉⴳⴳⵓⵜⵏ ⵜⵉⵥⵍⴰⵢⵉⵏ.
ⴰⵔ ⴽⵛⵛⵎⵏ ⵉⵙⵏⴼⴰⵕⵏ ⴰⴷ ⵉⴷⵓⵙⴰⵏⵏ ⴳ ⵓⵙⴰⵜⵉ ⵏ ⵜⵓⵇⵇⵏⴰ ⵏ ⵜⵏⴱⴰⴹⵜ ⴼ ⵓⵙⵔⵓⵙ ⵏ ⵓⵙⵏⴼⴰⵕ ⴰⴳⵍⴷⴰⵏ ⵉⵣⴷⵉⵏ ⵙ ⵓⵙⴰⵃⴰ ⵏ ⵓⵏⴰⴳⵔⴰⵡ ⴰⴷⵓⵙⴰⵏ ⴰⵏⴰⵎⵓⵔ ⵙ ⵜⵉⵣⵣⵍⴰ ⴷ ⵜⴼⴰⵍⴽⴰⵢⵜ ⵉⵅⵚⵚⴰⵏ, ⴰⵛⴽⵓ ⵔⴰⴷ ⵜⴷⵔⵓ ⴳ ⵓⵙⴷⵓⵙ ⵏ ⵜⵙⵉⵍⴰ ⵜⴰⴷⵓⵙⴰⵏⵜ ⴳ ⵜⵙⴳⴰ ⵏ ⵎⵓⴳⴰⴷⵓⵕ, ⴷ ⵓⵙⵖⵍⵉ ⵏ ⵜⴼⴰⵍⴽⴰⵢⵜ ⵏ ⵜⵏⵓⴼⴰ ⵜⵉⴷⵓⵙⴰⵏⵉⵏ, ⴷ ⵓⵙⵎⴰⵢⵏⵓ ⵏ ⵜⵓⵚⴽⵉⵡⵉⵏ ⵜⵉⴷⵙⵍⴰⵏⵉⵏ ⴷ ⵉⵎⴰⵙⵙⵏ ⵉⴷⵓⵙⴰⵏⵏ, ⴷ ⵓⵙⴼⴰⵍⴽⵉ ⵏ ⵜⴳⵏⴷⴰⵡⵉⵏ ⵏ ⵓⵙⵎⴰⴳⵍ ⵙ ⵉⵎⵓⴹⴰⵏ, ⴰⵢⵍⵍⵉ ⵉⵎⵙⴰⵙⴰⵏ ⴷ ⵉⵙⵉⴳⴳⵉⵍⵏ ⵏ ⵉⵎⵣⴷⴰⵖⵏ ⴷ ⵉⴹⴼⵕ ⵜⵉⵣⵎⵎⴰⵔ ⵏ ⵜⵏⴱⴰⴹⵜ ⵉ ⵓⵙⵔⵓⵙ ⵏ ⵓⵙⴰⵃⴰ ⵏ ⵓⵏⴰⴳⵔⴰⵡ ⴰⴷⵓⵙⴰⵏ ⴰⵏⴰⵎⵓⵔ ⴼ ⵓⵙⵡⵉⵔ ⴰⵏⴰⴽⴰⵍ.