ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⴰⵙⴼⵓⴳⵍⵓ ⵏ ⵓⵙⴳⵎⴹ ⵏ ⵓⴱⵕⵓⵜⵓⴽⵓⵍ ⵏ ⵓⵎⵙⴰⵙⴰ ⵏⴳⵔ ⵜⴰⵏⴱⴰⴹⵜ ⴷ ⵓⵙⵉⵔⴰ ⴰⵏⴰⵎⵓⵔ ⵉⵣⴰⴳⵯⵣⵏ
ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙⵙ ⵄⴰⵣⵉⵣ ⴰⵅⵏⵏⵓ, ⴰⵙⵙ ⵏ ⵓⴽⵡⴰⵙ 24 ⵢⵓⵍⵢⵓⵣ 2025, ⴰⵙⴼⵓⴳⵍⵓ ⵏ ⵓⵙⴳⵎⴹ ⵏ ⵓⴱⵕⵓⵜⵓⴽⵓⵍ ⵏ ⵓⵎⵙⴰⵙⴰ ⵏⴳⵔ ⵜⴰⵏⴱⴰⴹⵜ ⴷ ⵓⵙⵉⵔⴰ ⴰⵏⴰⵎⵓⵔ ⵉⵣⴰⴳⵯⵣⵏ ⵣⵖ 2025 ⴰⵔ 2030 ⵙ ⵢⴰⵏ ⵡⴰⵜⵉⴳ ⵏ ⵓⵙⵙⴰⵔⵓ ⵏ ⵎⴰ ⵉⵜⵜⴳⴰⵏ 38 ⵎⵍⵢⴰⵕ ⵏ ⵓⴷⵔⵀⴰⵎ.
ⵙ ⵜⵎⵢⴰⵇⵇⴰⵏⵜ ⴰⴷ ⵉⴳⴰⵏ ⵜⴰⵙⵕⴰⵜⵉⵊⵉⵜ, ⵔⴰⴷ ⵢⵉⵍⵉ ⵓⵙⵖⵓⴷⵓ ⵜⵉⵥⴹⴰⵕ ⵏ ⵉⵥⴰⴳⵯⵣⵏ ⵏ ⵎⵕⵕⴰⴽⵯⵛ ⴷ ⵓⴳⴰⴷⵉⵔ ⴷ ⵟⴰⵏⵊⴰ ⴷⴼⴰⵙ ⴷ ⵜⵓⵚⴽⴰ ⵏ ⵢⴰⵏ ⵓⵙⵔⵙ ⴰⵢⵍⴰⵏ ⴰⵎⴰⵢⵏⵓ ⵉⴳⴰⵏ ⵜⴰⴷⴰⴱⵓⵜ ⵏ ⵓⵙⵎⵓⵏ « HUB » ⴷ ⵢⴰⵏ ⵓⵎⴰⵔⵉ ⴰⵢⵍⴰⵏ ⴰⵎⴰⵢⵏⵓ ⵏ ⵓⵣⴰⴳⵯⵣ ⵎⵓⵃⵎⵎⴰⴷ ⵡⵉⵙ ⵙⵎⵎⵓⵙ ⴳ ⴷⴷⴰⵕ ⵍⴱⵉⴹⴰ ⵙ 25 ⵎⵍⵢⴰⵕ ⵏ ⵓⴷⵔⵀⴰⵎ. ⵖⵉⴽⵍⵍⵉ ⵉⵜⵜⵓⵥⵍⴰⵢ 13 ⵎⵍⵢⴰⵕ ⵏ ⵓⴷⵔⵀⴰⵎ ⵉ ⵓⵏⵀⵍⵍⴰ ⴷ ⵓⵙⵎⴰⵢⵏⵓ ⴷ ⵡⵙⵙⴰⵖ ⵏ ⵡⴰⴽⴰⵍ ⵃⵎⴰ ⴰⴷ ⵉⴷⵓⵙ ⵉⴷⴷⵔ ⵓⵥⵟⵟⴰ. ⵖⵉⴽⵍⵍⵉ ⵔⴰⴷ ⵉⵙⵔⵙ ⵓⵙⵉⵔⴰ ⴰⵏⴰⵎⵓⵔ ⵉⵏⵣⴰⴳⵯⵣⵏ ⵜⵉⵏⴼⴰ ⵜⵉⴳⴷⵓⴷⴰⵏⵉⵏ ⵜⵉⵎⴰⵢⵏⵓⵜⵉⵏ ⵖ ⵉⵍⵍⴰ ⵓⴱⵓⵔⵣ ⴷ ⵢⵉⴹⵉⵚ ⵓⵎⵏⵉⴳ.
ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰ ⵙ ⴷ ⵉⴷⴷⴰ ⵓⵎⵙⴰⵙⴰ ⵃⵎⴰ ⴰⴷ ⵢⴰⵡⵙ ⴳ ⵜⴷⵉⵏⴰⵎⵉⵜ ⵏ ⵜⴳⵎⵉ ⴷ ⵓⵙⵓⵊⴷ ⵏ ⵉⴳⵔ ⵡⴰⵙⵙⴰⵢ ⴰⵢⵍⴰⵏ ⴱⴰⵛ ⴰⴷ ⵢⵉⵍⵉ ⴳ ⵓⵙⵡⵉⵔ ⵉⵏⴰⵥⴰⵕⵏ ⵍⵍⵉ ⴷ ⵉⵇⵇⴰⵏ ⵜⴰⵎⴰⵣⵉⵔⵜ ⵏⵏⵖ ⴳ ⵉⵙⴳⴳⵯⴰⵙⵏ ⴰⴷ ⴷ ⵉⴷⴷⴰⵏ ⵙ ⵜⵡⵉⵙⵉ ⵏ ⵉⵥⵉⵕ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵔⴱⴱⵉ, ⵉⵏⵏⴰ ⵎⴰ ⵙ ⵉⴳⴰ ⵓⵎⵙⴰⵙⴰ ⵢⴰⴷ ⵢⴰⵏ ⵓⵣⵎⵎⴰⵣⵍ ⴳ ⵜⵖⵔⴰⵙⵜ ⵃⵎⴰ ⴰⴷ ⵉⴳ ⵍⵎⵖⵔⵉⴱ ⵢⴰⵜ ⵜⴱⴰⴷⵓⵜ ⴷ ⵢⴰⵏ ⵡⴰⵎⵎⴰⵙ ⴰⵢⵍⴰⵏ ⴰⴳⵔⴰⵖⵍⴰⵏ. ⵔⴰⴷ ⵢⴰⵡⵙ ⴰⵡⴷ ⴳ ⵓⵙⴷⵓⵙ ⵏ ⵜⵓⵚⴽⴰ ⵜⴰⵏⴰⴷⴰⵡⵜ ⵏ ⵜⴳⵍⴷⵉⵜ ⵉⴳⴰⵏ ⵜⴰⵎⴰⵢⵏⵓⵜ ⵍⵍⵉ ⵔⴰⴷ ⵉⵙⴱⵓⵖⵍⵓ ⵜⴷⴰⵎⵙⴰ ⴷ ⵓⵎⵙⴰⵙⴰ ⴰⵏⵎⵏⴰⴹ ⴷ ⵓⵙⵉⴷⴼ ⴰⵏⴰⵎⵓⵏ ⵙ ⵓⵙⵡⵓⴷⴷⵓ ⵏ ⵜⵔⴰⵜⵉⵏ ⵜⵉⴳⵍⴷⴰⵏⵉⵏ ⵢⴰⵜⵜⵓⵢⵏ.
ⵔⴰⴷ ⵢⴰⵡⵙ ⵓⵎⵙⴰⵙⴰ ⴳ ⵓⵙⴷⵓⵙ ⵏ ⵜⵉⵔⵙⴰⵍ ⵏ ⵡⴰⵏⴰⵡ ⴰⵙⵓⵍⴰⵏ ⵏ ⵉⵣⴰⴳⵯⵣⵏ ⵍⵍⵉ ⴷ ⵢⵓⵛⴽⴰⵏ ⴷ ⵜⵙⵜⵕⴰⵜⵉⵊⵉⵜ ⵜⴰⵏⴰⵎⵓⵔⵜ ⵏ ⵓⵙⵉⵔⴰ ⴰⵏⴰⵎⵓⵔ « ⵉⵣⴰⴳⵯⵣⵏ 2030 » ⵍⵍⵉ ⵔⴰⴷ ⵉⴹⴼⵓⵔ ⴰⵖⴰⵡⴰⵙ ⴰⵏⴳⵎⴰⵏ ⵏ ⵜⵎⵙⵙⵓⵔⵜ ⵜⴰⵢⵍⴰⵏⵜ ⵜⴰⴳⵍⴷⴰⵏⵜ ⵜⴰⵎⵖⵔⵉⴱⵉⵜ ⴰⴷ ⵜⴳⵉⴷⴷⵉ ⴷ ⵓⴱⵓⵖⵍⵓ ⵏ ⵓⵎⵓⵙⵙⵓ ⵏ ⵡⴰⵙⵙⴰⵢ ⴰⵢⵍⴰⵏ. ⵢⵉⵍⵉ ⴰⵡⴷ ⵓⵙⴱⵓⵖⵍⵓ ⵏ ⵜⵓⵚⴽⴰ ⵜⴰⵏⴰⴷⴰⵡⵜ ⵏ ⵉⵣⴰⴳⵯⵣⵏ ⵍⵍⵉ ⵔⴰⴷ ⵢⴰⵡⵙ ⴳ ⵜⵏⴽⵔⴰ ⵜⴰⴷⵙⵍⴰⵏⵜ ⴳ ⵜⵓⴳⵜ ⵏ ⵉⴳⵔⴰⵏ ⵙⵍⴰⵀⵡⴰⵏ ⴰⴽⴽⵯ ⵡⵉⵏ ⵜⴰⵎⴰⵍⵍⴰⵢⵜ ⴷ ⵎⴰ ⵉⵥⵍⵉⵏ ⵙ ⵓⵙⵏⵎⴰⵍⴰ ⵏ ⵎⵓⴹⵢⴰⵍ ⴷ ⵍⵎⵖⵔⵉⴱ ⵏ ⴹⴰⵕⴰⵜ 2030.
ⵉⵙⴳⵎⴹ ⴰⴱⵕⵓⵜⵓⴽⵓⵍ ⵏ ⵓⵎⵙⴰⵙⴰ, ⵍⵍⵉ ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵜⴰⵎⴰⵡⵙⴰⵙⵜ ⵏ ⵜⵎⴰⵍⵍⴰⵢⵜ ⴷ ⵜⵏⵉⴹⵉ ⴷ ⵜⴷⴰⵎⵙⴰ ⵜⴰⵏⴰⵎⵓⵏⵜ ⴷ ⵜⵡⵉⵣⴰ ⴷ ⵓⵎⴰⵡⵙⴰⵙ ⵏ ⵡⴰⵙⵙⴰⵢ ⴷ ⵓⵍⵓⵊⵉⵙⵜⵉⴽ ⴷ ⵓⵎⵡⵙⴰⵙ ⴰⵎⴰⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵜⵎⵙⴰⵙⵍⵜ ⴷ ⵓⵏⵎⵀⴰⵍ ⵏ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏⵓⵙⵡⵓⴷⴷⵓ ⴰⵙⵜⵕⴰⵜⵉⵊⵉ ⵏ ⵜⵡⵉⵙⵉⵡⵉⵏ ⵏ ⵡⴰⵏⴽ ⴷ ⵓⴹⴼⵉⵕ ⵏ ⵜⵡⵓⵔⵉ ⵏ ⵜⵎⵔⵙⴰⵍ ⴷ ⵜⵎⵙⵙⵏⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵓⵏⵎⵀⴰⵍ ⵏ ⵓⵙⵉⵔⴰ ⴰⵏⴰⵎⵓⵔ ⵏ ⵉⵣⴰⴳⵯⵣⵏ.
