ⵉⵙⵙⵉⵅⴼ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴰⴳⵔⴰⵡ ⵏ ⵓⵙⵎⵏⵉⴷ ⵏ ⵓⵖⴰⵡⴰⵙ ⴰⵙⵜⵔⴰⵜⵉⵊⵉ ⵏ ⵜⵎⵙⵙⵓⵔⵜ ⵜⴰⵏⴰⵎⵓⵔⵜ ⵏ ⵜⵙⴽⵔⴰⵡⵜ ⴷ ⵓⵙⵡⵓⴷⴷⵓ ⵏ ⵜⵓⵚⴽⴰⵡⵉⵏ ⵏ ⵜⵓⵏⵏⵓⵏⵜ

ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⴰⵙⵙ ⵏ ⵡⴰⴽⵕⴰⵙ17 ⴷⵓⵊⴰⵏⴱⵉⵔ 2025 ⴳ ⵕⵕⴱⴰⵟ, ⵙ ⵜⵉⵍⵉⵜ ⵏ ⵓⵎⴰⵡⵙⴰⵙ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵙⵍⵎⴷ ⴰⵎⵏⵣⵓ ⴷ ⵜⵓⵏⵏⵓⵏⵜ ⵎⴰⵙⵙ ⵎⵓⵃⵎⵎⴰⴷ ⵙⴰⵄⴷ ⴱⵕⵕⴰⴷⴰ, ⵢⴰⵏ ⵓⴳⵔⴰⵡ ⵍⵍⵉⵖ ⵉⵍⵍⴰ ⵓⵙⵎⵏⵉⴷ ⵏ ⵓⵖⴰⵡⴰⵙ ⴰⵙⵜⵔⴰⵜⵉⵊⵉ ⵏ ⵜⵎⵙⵙⵓⵔⵜ ⵜⴰⵏⴰⵎⵓⵔⵜ ⵏ ⵜⵙⴽⵔⴰⵡⵜ ⴷ ⵓⵙⵡⵓⴷⴷⵓ ⵏ ⵜⵓⵚⴽⴰⵡⵉⵏ  ⵏ ⵜⵓⵏⵏⵓⵏⵜ  (ⵙⵓⵏⴰⵕⵊⵉⵙ), ⴷ ⵜⴹⴼⵕⵉ ⵏ  ⵉⵙⵏⴼⴰⵕⵏ ⵉⵎⴰⴷⴷⵓⴷⵏ ⵍⵍⵉ ⵅⴼ ⵜⴱⵉⴷⴷ ⵜⵎⵙⵙⵓⵔⵜ ⴳ ⵓⵙⴰⵜⵉ ⵏ ⵓⵙⵎⵓⵜⵜⴳ ⵏ ⵜⵓⵚⴽⴰⵡⵉⵏ  ⵜⵉⵏⴰⴷⴰⵡⵉⵏ ⵏ ⵜⵓⵏⵏⵓⵏⵜ ⵜⵉⵏⴰⵎⵓⵔⵉⵏ.
ⴳ ⵜⵣⵡⵉⵔⵉ ⵏ ⵓⴳⵔⴰⵡ, ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵜⵎⵙⵙⵓⴳⵓⵔⵜ ⵜⴰⵎⴳⵔⴰⵡⵜ ⵏ ⵜⵎⵙⵙⵓⵔⵜ ⵜⴰⵏⴰⵎⵓⵔⵜ ⵏ ⵜⵙⴽⵔⴰⵡⵜ ⴷ ⵓⵙⵡⵓⴷⴷⵓ ⵏ ⵜⵓⵚⴽⴰⵡⵉⵏ  ⵏ ⵜⵓⵏⵏⵓⵏⵜ , ⵎⴰⵙⵙ ⵢⵓⵙⴼ ⴱⵍⵇⴰⵙⵎⵉ, ⵢⴰⵏ ⵓⴼⵙⴰⵔ ⵅⴼ ⵓⵖⴰⵡⴰⵙ ⴰⵙⵜⵔⴰⵜⵉⵊⵉ ⵏ ⵜⵎⵙⵙⵓⵔⵜ ⵉⴱⴷⴷⵏ ⵅⴼ ⵓⵙⵎⵖⵔ ⵏ ⵡⴰⵢⴷⴰ ⵏⵏⵙ ⴷ ⵓⵙⴷⵓⵙ ⵏ ⵉⵙⵓⴳⴰⵎ ⵉⵏⴼⴳⴰⵏⵏ ⵏⵏⵙ, ⴷ ⵓⵙⵉⴳⴳⵍ ⵏ ⵓⵙⴷⵓⵙ ⵏ ⵜⵉⵍⵉⵜ ⵏⵏⵙ ⵜⴰⵏⵎⵏⴰⴹⵜ ⴳ ⵜⵙⴳⴳⵉⵡⵉⵏ ⴰⴽⴽⵯ ⵏ ⵡⴰⵎⵓⵔ, ⵙ ⵜⵖⴰⵔⴰⵙⵜ ⵏ ⵓⵙⴱⵓⵖⵍⵓ ⵏ ⵉⵙⴼⵙⴰⵔⵏ ⵉⵎⴰⵢⵏⵓⵜⵏ ⵉⵜⵜⴳⴳⴰⵏ ⵜⴰⵏⴰⴼⵓⵜ ⵏ ⵉⵎⵣⴷⴰⵖ.
ⵖⵉⴽⵍⵍⵉ ⵉⵡⵉ ⵓⵎⴰⵙⴰⵢ ⵉⵙⵉⵙⴼⵉⵡⵏ ⵅⴼ ⵓⵙⵎⵓⵜⵜⴳ ⵉⵜⵜⵓⵙⴽⴰⵔⵏ ⴳ ⵉⴱⴰⵔⴰⵣⵏ ⵏ ⵜⵓⵏⵏⵓⵏⵜ ⵏ ⵡⴰⴽⴰⵙ ⵏ ⵉⴼⵔⵉⵇⵢⴰ ⵏ ⵜⵎⵜⵜⴰ 2025 ⴷ ⵡⴰⴽⴰⵙ ⵏ ⵓⵎⴰⴹⴰⵍ 2030, ⵉⴱⵉⴷⴷⵉⵏ ⵅⴼ ⵓⵏⴳⵔⴰⵡ ⵏ ⵜⵏⵏⵓⴱⴹⴰ ⵉⵜⵜⵓⵙⵖⵥⴰⵏⵏ, ⴷ ⵉⵎⴰⵙⵙⵏ ⵏ ⵜⴹⴼⵕⵉ ⵜⴰⵜⵉⵇⵏⵉⵜ ⴷ ⵜⵓⵎⵙⵙⵓⴳⵓⵔⵜ ⴷ ⵜⵥⵕⴼⴰⵏⵜ ⵍⵍⵉ ⵉⵜⵜⵓⴹⴼⴰⵕⵏ ⴰⴼⴰⴷ ⴰⴷ ⵜⵜⵓⵙⴽⵔⵏ ⵉⵙⵏⴼⴰⵕⵏ ⵙ ⵎⴽⵍⵍⵉ ⵙ ⴷ ⵉⵇⵇⴰⵏ. ⵖⵉⴽⴽⵉ ⵉⵙⴷⴷⵉⴷ ⵅⴼ ⵓⵎⵙⴰⵙⴰ ⴷ ⵓⵣⴷⴷⵓⵢ ⵍⵍⵉ ⵉⵍⵍⴰⵏ ⴳⵔ "ⵙⵓⵏⴰⵕⵊⵉⵙ" ⴷ ⵢⵉⴳⵔⴰⵏ ⵉⵎⴰⵡⵙⴰⵙⵏ ⴷ ⵉⵎⴷⵔⴰⵡⵏ ⵉⵎⵔⵙⴰⵍⵏ ⴷ ⵡⵉⵏ ⵜⵓⵏⵏⵓⵏⵜ.
ⴳ ⵓⵣⵎⵣⵣⵓ ⴰⴷ, ⵉⵙⴽⵜⵉ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵙ ⵓⵙⵎⴽⵍ ⵉⵥⵍⵉⵏ ⵍⵍⵉ ⵢⴰⴽⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷ ⵜ ⵉⵏⵚⵕ ⵕⴱⴱⵉ, ⵉ ⵢⵉⴳⵔ ⵏ ⵜⵓⵏⵏⵓⵏⵜ ⵙ ⵓⵙⵎⵓⵙⵙⵓ ⵏ ⵉⵙⵓⴳⴰⵎ ⵉⴷⵓⵙⵏ ⵏ ⵓⵙⴽⴰⵔ ⵏ ⵜⵓⵚⴽⴰⵡⵉⵏ ⵏ ⵜⵉⵏⴰⴷⴰⵡⵉⵏ, ⴷ ⵓⵙⵓⵊⴷ ⵏ ⵉⵎⴰⵙⵙⵏ ⵏ ⵜⵓⵏⵏⵓⵏⵜ ⴳ ⵜⵙⴳⴳⵉⵡⵉⵏ ⴰⴽⴽⵯ ⵏ ⵜⴳⵍⴷⵉⵜ, ⵉⵜⵜⵔ ⴰⴷ ⵢⵉⵍⵉ ⵓⵙⵖⴰⵡⵍ ⵏ ⵜⴷⵉⵏⴰⵎⵉⵜ ⵏ ⵜⵡⵓⵔⵉ ⵏ "ⵙⵓⵏⴰⵕⵊⵉⵙ" ⵙ ⵜⵖⵔⴰⵔⴰⵙⵜ ⵏ ⵓⵖⴰⵡⴰⵙ ⴰⴷ ⴰⵙⵜⵔⴰⵜⵉⵊⵉ ⵃⵎⴰ ⴰⴷ ⵜⵉⵍⵉ ⵜⵏⴽⵔⴰ ⵜⴰⵎⴰⵢⵏⵓⵜ ⵍⵍⵉ ⵔⴰⴷ ⵢⴰⵡⵙ ⴳ ⵓⵙⴷⵓⵙ ⵏ ⵜⵓⵚⴽⴰⵡⵉⵏ ⵜⵉⵏⴰⴷⴰⵡⵉⵏ ⵏ ⵜⵓⵏⵏⵓⵏⵜ ⵜⴰⵏⴰⵎⵓⵔⵜ ⴷ ⴰⴷ ⵜⴳ ⵢⴰⵏ ⵓⴼⵔⴷⵉⵙ ⵉⵜⵜⴰⵡⵙⵏ ⴳ ⵜⴳⵎⵉ ⵜⴰⵏⴰⴽⵍⴰⵏⵜ ⵜⴰⵎⵙⵉⴷⴼⵜ.
ⵉⵇⵇⴰⵏ ⴷ ⴰⴷ ⵏⵙⴽⵜⵉ ⵎⴰⵙ ⴷ ⵜⵎⵙⵙⵓⵔⵜ ⵜⴰⵏⴰⵎⵓⵔⵜ ⵏ ⵜⵙⴽⵔⴰⵡⵜ ⴷ ⵓⵙⵡⵓⴷⴷⵓ ⵏ ⵜⵓⵚⴽⴰⵡⵉⵏ  ⵏ ⵜⵓⵏⵏⵓⵏⵜ, ⵍⵍⵉ ⵉⵜⵜⵓⵙⵏⵓⵍⴼⴰⵏ ⴳ ⵓⵙⴳⴳⵯⴰⵙ ⵏ 2008,  ⴰⴷ ⵉⵡⴰⵍⴰⵏ ⵖⵉⵍⴰⴷ ⴰⵙⵡⵓⴷⴷⵓ ⵏ ⵓⴳⴳⴰⵔ ⵏ 78 ⵏ ⵜⵓⵚⴽⴰⵡⵉⵏ ⵜⵉⵏⴰⴷⴰⵡⵉⵏ ⵏ ⵜⵓⵏⵏⵓⵏⵜ ⵉⴱⴹⴰⵏ  ⵅⴼ 6 ⵏ ⵜⵙⴳⴳⵉⵡⵉⵏ ⵏ ⵜⴳⵍⴷⵉⵜ.