ⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵢⴰⵏ ⵓⴳⵔⴰⵡ ⵏ ⵜⴹⴼⵕⵉ ⵏ ⵓⵙⵎⵀⵍ ⵏ ⵓⵙⴳⴳⴷ ⵏ ⵓⵏⴳⵔⴰⵡ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵍⵎⴷ ⴰⵎⵏⵣⵓ
ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⴰⵙⵙ ⵏ ⵓⴽⵔⴰⵙ 25 ⴱⵕⴰⵢⵕ 2026 ⵖ ⵕⵕⴱⴰⵟ, ⵢⴰⵏ ⵓⴳⵔⴰⵡ ⵏ ⵜⴹⴼⵕⵉ ⵏ ⵏ ⵓⵙⵎⵀⵍ ⵏ ⵓⵙⴳⴳⴷ ⵏ ⵓⵏⴳⵔⴰⵡ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵍⵎⴷ ⴰⵎⵏⵣⵓ. ⵉⵜⵜⴰⵡⵥⵍⴰⵢ ⵓⴳⵔⴰⵡ ⵙ ⵓⵙⵜⴰⵍ ⵏ ⵓⵙⵡⵉⵔ ⵏ ⵉⵙⵏⴼⴰⵕⵏ ⵉⴳⴰⵏ ⵉⵎⵣⵡⵓⵔⴰ ⴳ ⵢⵉⴳⵔ ⴰⴷ, ⵍⵍⵉ ⵉⴳⴰⵏ ⵢⴰⵏ ⵓⵙⵉⵣⵡⵔ ⵏ ⵜⵏⴱⴰⴹⴰⵏⵜ, ⵙ ⵓⵣⵣⴳⵉⵔ ⵏ ⵜⵉⵔⴰⵜⵉⵏ ⵜⵉⴳⵍⴷⴰⵏⵉⵏ ⵢⴰⵜⵜⵓⵢⵏ ⵉⵔⴰⵏ ⴰⵙⴳⴳⴷ ⵏ ⵓⵙⵍⵎⴷ.
ⵖ ⵓⵎⵣⵡⴰⵔⵓ ⵏ ⵓⴳⵔⴰⵡ, ⵉⵏⵏⴰ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰ ⵙ ⵉⴳⴰ ⵓⵙⴳⴳⴷ ⵏ ⵓⵏⴳⵔⴰⵡ ⵏ ⵓⵙⵍⵎⴷ ⵢⴰⵏ ⵓⴼⵔⴷⵉⵙ ⴰⴷⵙⵍⴰⵏ ⵖ ⵓⵙⵉⵣⵡⵔ ⵏ ⵜⵏⴱⴰⴹⵜ, ⴰⵛⴽⵓ ⵉⴳⴰ ⵜⴰⵙⴰⵔⵓⵜ ⵏ ⵓⵙⴱⵓⵖⵍⵓ ⵏ ⵜⵏⴳⵎⵉ ⵜⴰⵏⴰⴼⴳⴰⵏⵜ, ⴷ ⵢⴰⵜ ⵜⵎⵙⵙⵉⵍⵉⵜ ⵓⵙⵔⵓⵙ ⵏ ⵜⵔⵙⴰⵍ ⵏ ⵡⴰⵏⴽ ⴰⵏⴰⵎⵓⵏ, ⵎⴽⵍⵍⵉ ⵜ ⵉⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷ ⵜ ⵉⵏⵚⵕ ⵕⴱⴱⵉ. ⵢⴰⵍⵙ ⵉⵏⵏⴰ ⵎⴰ ⵙ ⵜⵙⵓⵊⴰⴷ ⵜⵏⴱⴰⴹⵜ ⵜⵙⵖⵣⴰⵏ ⵜⵉⵥⵕⴼⵉⵏ ⴷ ⵉⵙⵙⴰⵔⵓⵜⵏ ⵍⵍⵉ ⵙ ⴷ ⵉⵇⵇⴰⵏ ⵃⵎⴰ ⴰⴷ ⴰⵡⵙⵏⵜ ⴳ ⵓⵙⵎⵓⵜⵜⴳ ⴷ ⵜⵕⵡⵉ ⵏ ⵜⵉⵏⵎⵍ ⵜⴰⴳⴷⵓⴷⴰⵏⵜ, ⴷ ⴰⴷ ⵜⴳ ⵢⴰⵏ ⵓⴼⵔⴷⵉⵙ ⵍⵍⵉ ⵉⵜⵜⴰⵡⵙⵏ ⴳ ⵓⵙⴰⵎⵓ ⴰⵏⴰⵎⵓⵏ ⴷ ⵓⵏⴳⵉⴷⴷⵉ ⵏ ⵉⵣⵎⴰⵣ.
ⵉⵜⵜⵔ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴰⴷ ⵜⵉⵍⵉ ⵜⴹⴼⵔⵉ ⵏ ⵓⵙⵡⵓⴷⴷⵓ ⵏ ⵜⵡⵓⵔⵉ, ⴷ ⵓⵙⵔⵓⵙ ⵏ ⵢⴰⵜ ⵜⵏⵏⵓⴱⴰⴹⴰ ⵉⴱⴷⴷⵏ ⵅⴼ ⵜⵢⴰⴼⵓⵜ, ⴷ ⵓⵙⴼⴼⵓⵖ ⵏ ⵜⵡⵓⵔⵉ ⵏ ⵓⵙⵡⵉⵏⴳⵎ ⵖ ⵜⵙⵜⵕⴰⵉⵊⵉⵜ ⵜⴰⵏⴰⵎⵓⵔⵜ ⵏ ⵓⵙⵍⵎⴷ ⵍⵍⵉ ⴷ ⵉⴹⴼⴰⵔⵏ ⵏ 2026, ⵎⵓ ⵉⴳⴰ ⵓⵡⵜⵜⴰⵙ ⵏⵏⵙ ⵢⴰⵜ ⵜⵉⵏⵎⵍ ⵜⴰⴳⴷⵓⴷⴰⵏⵜ ⵉⵍⴰⵏ ⵜⵕⵡⵉ ⵉⴳⴰⵏ ⵜⴰⵏⵙⵙⵓⵎⴰⵜ ⴷ ⵜⵓⵙⴷⵉⴼⵜ.
ⵖ ⵓⴳⵔⴰⵡ ⴰⴷ, ⴱⵉⴷⴷⵏ ⵅⴼ ⵓⵙⵎⵓⵜⵜⴳ ⵉⵜⵜⴰⵡⵙⴽⴰⵔⵏ ⵖ ⵎⵏⵏⴰⵡ ⵏ ⵉⵙⵏⴼⴰⵕⵏ ⵉⴳⴰⵏ ⵉⵎⵣⵡⵓⵔⴰ, ⵙⵍⴰⵀⵡⴰⵏ ⴰⴽⴽⵯ ⴰⵙⵎⴰⵜⴰ ⵏ ⵓⵙⵍⵎⴷ ⴰⵎⵏⵣⵓ, ⵍⵍⵉ ⵢⵉⵡⴹⵏ 80%, ⵙ ⵓⵙⵢⴰⴼⴰ ⵏ ⵓⴳⴳⴰⵔ ⵏ 985 ⵏ ⵉⴼⴹ ⵏ ⵓⴼⵔⵓⵅ.
ⵖⵉⴽⵍⵍⵉ ⵉⵍⵍⴰ ⵓⵎⴹⴰⴽⴰⵕ ⵓⵙⵙⵉⴳⵜ ⴳ ⵓⵖⴰⵡⴰⵙ ⵏ "ⵜⵉⵏⵎⴰⵍ ⵏ ⵓⵎⵏⵣⵓⵖ" ⵍⵍⵉ ⵔⴰⴷ ⵢⴰⵎⵥ 80% ⵏ ⵜⵉⵏⵎⴰⵍ ⵜⵉⵎⵣⵡⵓⵔⴰ ⵙⴳ ⵓⵙⴳⴳⵯⴰⵙ ⴰⵏⵎⵍⴰⵏ 2026-2027. ⵢⵓⵛⴽⴰ ⵎⴰⵢⴰⴷ ⴹⴰⵕⴰⵜ ⴰⵙⵜⴰⵍ ⵉⵜⵜⵓⵙⴽⴰⵔⵏ ⵍⵍⵉ ⴷ ⵉⵙⴱⴰⵢⵏ ⵉⵙ ⵉⵍⵍⴰ ⵓⵙⵎⵓⵜⵜⴳ ⴳ ⵓⵙⵡⵉⵔ ⵏ ⵓⵍⵎⵎⵓⴷ ⵏ ⵜⵉⵏⵍⵎⴰⴷⵉⵏ ⴷ ⵉⵏⵍⵎⴰⴷⵏ. ⵎⴰⵢⴰⴷ ⵉⵎⵙⴰⵙⴰ ⴰⴽⴷ ⵓⵡⵜⵜⴰⵙ ⴰⵙⵜⵕⴰⵜⵉⵊⵉ ⴰⵎⵣⵡⴰⵔⵓ ⵏ ⵜⵖⴰⵔⵙⵜ 2022-2026 ⵍⵍⵉ ⵔⴰⴷ ⵢⴰⵡⵙ ⴳ ⵓⵙⴷⵓⵙ ⵏ ⵓⵍⵎⵓⴷⵏ ⵉⴷⵙⴰⵍⵏ ⴰⵔ 70% .
ⴰⵢⵍⵍⵉ ⵉⵥⵍⵉⵏ ⵙ "ⵜⵉⵏⵎⴰⵍ ⵜⵉⵙⵉⵏⴰⵏⵉⵏ ⵏ ⵓⵎⵏⵣⵓⵖ", ⴱⵉⴷⵏ ⵅⴼ ⵅⴼ ⵜⵢⴰⴼⵓⵜ ⵉⵥⵉⵍⵏ ⵍⵍⵉ ⵢⵉⵡⵙⵏ ⴳ ⵓⵙⵉⴷⵔⵓⵙ ⵏ ⵓⴼⵓⵖ ⴳ ⵜⵉⵏⵎⵍ, ⵍⵍⵉⵖ ⴷ ⵢⵓⴳⴳⵣ ⵙⴳ 8,4% ⴰⵔ 4,45% ⵖ ⵜⵎⵔⵙⴰⵍ ⵍⵍⵉ ⵉⵍⴰⵏ ⴰⵖⴰⵡⴰⵙ ⴰⴷ, ⴷ ⵓⵙⴷⵓⵙ ⵏ ⵉⵎⴰⵙⵙⵏ ⵏ ⵡⴰⵏⵏⴰⵍ ⴷ ⵜⵡⵉⵙⵉ ⵜⴰⵏⵉⵎⴰⵏⵜ.
ⵉⵜⵜⵓⵣⵎⵎⴰⵎ ⴰⵡⴷ ⵎⴰⵏⵉ ⵜⵉⵡⴹ ⵜⵡⵓⵔⵉ ⴳ ⵓⵙⴷⵔⵓⵙ ⵏ ⵓⴳⴳⵓⴷⵉ ⵏ ⵉⵏⴰⵍⵎⴷⴰⵏ ⴷ ⵓⵙⴷⵓⵙ ⵏ ⵜⵏⵓⴼⴰ ⵏ ⵡⴰⵏⵏⴰⵍ ⴰⵏⴰⵎⵓⵏ, ⵖ ⵉⵍⵍⴰ ⵡⴰⵙⵙⴰⵢ ⴰⵏⵎⵍⴰⵏ ⴷ ⵓⵣⴷⴷⵓⵖ ⴳ ⵜⵉⵏⵎⵍ ⴷ ⵜⵙⵉⵔⴰⵎ ⵉⵥⵍⵉⵏ ⵙ ⵓⵎⴰⴹⴰⵍ ⴰⴼⴰⵔⴰⵏ ⵃⵎⴰ ⴰⴷ ⵢⵉⵍⵉ ⵓⵏⴳⵉⴷⴷⵉ ⴳ ⵉⵣⵎⴰⵣ. ⵎⴽⵍⵍⵉ ⵓⵙⵎⴰⵜⴰ ⵏ ⵓⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵖ ⵓⵙⵍⵎⴷ ⴰⵎⵣⵡⴰⵔⵓ ⴷ ⵜⵓⵜⵍⴰⵢⵜ ⵜⵉⵏⴳⵍⵉⵣⵜ ⵖ ⵓⵙⵍⵎⴷ ⴰⵙⵉⵏⴰⵏ.
