ⵉⵙⵙⵉⵅⴼ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴰⴳⵔⴰⵡ ⵏ ⵜⵙⵇⵇⵉⵎⵜ ⵜⴰⴳⵔⵎⴰⵡⵙⴰⵙⵜ ⵉⵜⵜⵓⵙⵎⴰⴳⵍⵏ ⵙ ⵡⴰⵀⵉⵍ ⵏ ⵡⴰⵍⵍⴰⵙ ⵏ ⵜⵓⵚⴽⴰ ⴷ ⵓⵙⴰⵀⵍ ⴰⵎⴰⵜⴰⵢ ⵏ ⵜⵎⵏⴰⴹⵉⵏ ⵉⵜⵜⵓⵜⵏ ⵙ ⵓⵏⴷⵓⴷⵉ ⵏ ⵍⵃⴰⵡⵣ ⴷ ⵓⴳⵔⴰⵡ ⵡⵉⵙ ⴽⵕⴰⴹ ⵏ ⵓⵙⵇⵇⵉⵎ ⵏ ⵓⵙⵡⵓⴷⴷⵓ ⴰⵙⵜⵔⴰⵜⵉⵊⵉ ⵏ ⵜⵙⵏⵓⵔⴰⵢⵜ ⵏ ⵜⴳⵎⵉ ⵏ ⵡⴰⵟⵍⴰⵚ ⴰⵎⵇⵇⵔⴰⵏ

• ⴰⵙⵎⴷ ⵏ ⵜⵡⵓⵔⵉⵡⵉⵏ ⵏ ⵜⵓⵚⴽⴰ ⴷ ⵓⵙⴰⵀⵍ ⵏ 54.425 ⵏ ⵜⵣⴷⴷⴰⵖⵜ ⴷ ⵓⴳⴳⴰⵔ ⵏ 3.000 ⵏ ⵜⵣⴷⴷⴰⵖⵜ ⴰⵇⵇⴰⵏⵜ ⴳ ⵓⵙⴽⴽⵉⵔ ;
• ⵓⴳⴳⴰⵔ ⵏ 7,2 ⵏ ⵉⵎⵍⵢⴰⵕⵏ ⵏ ⵉⴷⵔⵀⵎⵏ ⴷ ⴰⵜⵉⴳ ⴰⵎⴰⵜⴰⵢ ⵏ ⵡⴰⵏⵏⴰⵍ ⴰⵥⵕⴼⴰⵏ ⵉⵜⵜⵓⴼⴽⴰⵏ ⵉ ⵜⵡⵊⵉⵡⵉⵏ ⵉⵜⵜⵓⵜⵏ ⵙ ⵓⵏⴷⵓⴷⵉ ;
• ⵓⴳⴳⴰⵔ ⵏ 63.000 ⵏ ⵜⵡⵊⴰ ⵜⵙⴱⵖⵔ ⵙⴳ ⵜⵉⵡⵉⵙⵉ ⵜⴰⵖⴰⵡⵍⴰⵏⵜ ⵉⵜⵜⵓⵙⵡⵓⵜⵜⴰⵏ ⴳ 2.500 ⴷⵔⵀⵎ ⵉ ⵡⴰⵢⵢⵓⵔ ;
• ⴰⵙⴰⵀⵍ ⴷ ⵡⴰⵍⵍⴰⵙ ⵏ ⵜⵓⵚⴽⴰ ⵏ 372 ⵏ ⵜⵎⵔⵙⵍⵜ ⵏ ⵓⵙⵍⵎⴷ ⴷ ⵓⵙⵕⵚⵓ ⵏ ⵉⵙⵏⵜⴰⵢ ⵉⵣⴷⵉⵏ ⴷ 1.090 ⵏ ⵜⵎⵔⵙⵍⵜ ⵢⴰⴹⵏ ;
• ⴰⵙⴰⵀⵍ ⴷ ⵡⴰⵍⵍⴰⵙ ⵏ ⵜⵓⵚⴽⴰ ⵏ 110 ⵏ ⵡⴰⵎⵎⴰⵙⵏ ⵉⴷⵓⵙⴰⵏⵏ ⴷ ⵓⵙⵏⵜⵉ ⵏ ⵜⵡⵓⵔⵉⵡⵉⵏ ⴳ 37 ⵏ ⵡⴰⵎⵎⴰⵙ ⴰⴷⵓⵙⴰⵏ ⵢⴰⴹⵏ.
• ⴰⵍⵍⴰⵙ ⵏ ⵓⵕⵥⵥⵓⵎ ⵏ 1.239 ⵏ ⵜⵎⵣⴳⵉⴷⴰ, ⴷ ⵓⴹⴼⴼⵓⵕ ⵏ ⵜⵡⵓⵔⵉⵡⵉⵏ ⵏ ⵓⵙⴳⴳⴷ ⵏ 64 ⵏ ⵡⴰⵏⵙⴰ ⴰⵏⴰⵔⵓⵣ ⴰⵎⵣⵔⴰⵢ.
   

ⵉⵙⵙⵉⵅⴼ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⵄⴰⵣⵉⵣ ⴰⵅⵏⵏⵓⵛ, ⴰⵙⵙ ⵏ ⵓⵙⵉⵏⴰⵙ 17 ⵎⴰⵕⵚ 2026 ⴳ ⵕⵕⴱⴰⵟ, ⴰⴳⵔⴰⵡ ⵏ ⵜⵙⵇⵇⵉⵎⵜ ⵜⴰⴳⵔⵎⴰⵡⵙⴰⵙⵜ ⵉⵜⵜⵓⵙⵎⴰⴳⵍⵏ ⵙ ⵡⴰⵀⵉⵍ ⵏ ⵡⴰⵍⵍⴰⵙ ⵏ ⵜⵓⵚⴽⴰ ⴷ ⵓⵙⴰⵀⵍ ⴰⵎⴰⵜⴰⵢ ⵏ ⵜⵎⵏⴰⴹⵉⵏ ⵉⵜⵜⵓⵜⵏ ⵙ ⵓⵏⴷⵓⴷⵉ ⵏ ⵍⵃⴰⵡⵣ, ⴷ ⵓⴳⵔⴰⵡ ⵡⵉⵙ ⴽⵕⴰⴹ ⵏ ⵓⵙⵇⵇⵉⵎ ⵏ ⵓⵙⵡⵓⴷⴷⵓ ⴰⵙⵜⵔⴰⵜⵉⵊⵉ ⵏ ⵜⵙⵏⵓⵔⴰⵢⵜ ⵏ ⵜⴳⵎⵉ ⵏ ⵡⴰⵟⵍⴰⵚ ⴰⵎⵇⵇⵔⴰⵏ, ⵏⵏⴰ ⵉⵜⵜⵓⵙⴽⴰⵔⵏ ⴰⴼⴰⴷ ⴰⴷ ⵜⴹⴼⵕ ⴰⵙⴽⴽⵉⵔ ⵏ ⵉⵎⴰⴽⴰⵏ ⵉⵎⵢⴰⵏⴰⵡⵏ ⵏ ⵡⴰⵀⵉⵍ, ⵉ ⵓⵙⵎⵀⵍ ⵏ ⵜⵓⵎⵍⴰⵢⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ.
ⴳ ⵜⵣⵡⵉⵔⴰ ⵏ ⵓⴳⵔⴰⵡ ⴰⴷ, ⵉⵙⵙⵉⵎⵖⵓⵔ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵜⴰⴷⵉⵏⴰⵎⵉⵜ ⵉⵜⵜⵓⵙⴽⴰⵔⵏ ⴳ ⵓⵙⵎⵀⵍ ⵏ ⵡⴰⵀⵉⵍ ⴰⴷ ⵙ ⵓⵎⵀⴰⵙ ⵏ ⵉⵙⵡⵓⴷⴷⵓⵜⵏ ⵉⴳⵍⴷⴰⵏⵏ ⵢⴰⵜⵜⵓⵢⵏ, ⵉⵙⴰⵡⵍ ⵅⴼ ⵜⵙⵏⵓⵔⴰⵢⵜ ⴷ ⵉⵎⴷⵔⴰⵡⵏ ⵉⵎⵢⴰⵏⴰⵡⵏ ⴰⴷ ⵙⵙⵉⴳⴳⵓⵜⵏ ⵜⵉⴽⴽⵉ ⵏ ⵜⵡⵓⵔⵉ ⵙ ⵜⵉⵣⵣⵍⴰ ⴷ ⵜⵎⵙⴽⴰⵔⵜ ⵉⵅⵚⵚⴰⵏ, ⴰⴼⴰⴷ ⴰⴷ ⵙⵎⴷⵏ ⵉⵙⵏⵜⴰⵢ ⵉⵖⴰⵎⴰⵏ, ⴷ ⵓⵙⵎⵏⵉⴷ ⵏ ⵜⵎⵔⴰⵔⵓⵜⵉⵏ ⵜⵉⵏⴰⴽⴰⵍⵉⵏ ⴷ ⵜⵉⵎⵙⴽⴰⵔ ⵉ ⵜⵎⵣⴷⴰⵖⵜ ⵉⵜⵜⵓⵜⵏ.
ⴹⴰⵕⴰⵜ ⵏ ⵎⵢⴰⵏⵏ, ⵉⵙⵎⵏⵉⴷ ⵓⵏⵎⵀⴰⵍ ⴰⵎⴰⵜⴰⵢ ⵏ ⵜⵙⵏⵓⵔⴰⵢⵜ ⵏ ⵜⴳⵎⵉ ⵏ ⵡⴰⵟⵍⴰⵚ ⴰⵎⵇⵇⵔⴰⵏ, ⵢⴰⵏ ⵓⵙⴼⵙⵔ ⵏⵏⴰ ⴳ ⵉⵙⴼⴰⵡ ⴰⵙⵎⵓⵔ ⴰⵎⴰⵜⴰⵢ ⵏ ⵡⴰⵀⵉⵍ, ⴷ ⵉⵙⴽⴽⵉⵔⵏ ⵉⴷⵙⵍⴰⵏⵏ ⵉⵜⵜⵓⵙⴽⴰⵔⵏ ⴳ ⵢⵉⴳⵔⴰⵏ ⵉⵎⵢⴰⵏⴰⵡⵏ, ⵙ ⵜⵥⵍⴰⵢⵜ ⴳ ⵓⵙⵡⵉⵔ ⵏ ⵜⵎⵀⵍⵜ ⵏ ⵜⵓⵚⴽⴰ ⴷ ⵓⵙⴰⵀⵍ, ⴰⵏⴷⴰ ⵉⵜⵜⵓⵙⵎⴰⴷ ⵓⵙⴽⴽⵉⵔ ⵏ ⵜⵡⵓⵔⵉⵡⵉⵏ ⴳ 54.425 ⵏ ⵜⵣⴷⴷⴰⵖⵜ, ⴳ ⵎⴰⴷ ⵉⵍⵍⴰ ⵓⴳⴳⴰⵔ ⵏ 3.000 ⵏ ⵜⵣⴷⴷⴰⵖⵜ ⴳ ⵓⵙⴽⴽⵉⵔ.
ⴳ ⵎⴰ ⵉⵥⵍⵉⵏ ⵙ ⵡⴰⵜⵉⴳ ⴰⵎⴰⵜⴰⵢ ⵏ ⵡⴰⵏⵏⴰⵍ ⴰⵥⵕⴼⴰⵏ ⵉⵜⵜⵓⴼⴽⴰⵏ ⵉ ⵜⵡⵊⵉⵡⵉⵏ ⵉⵜⵜⵓⵜⵏ 7,2 ⵏ ⵉⵎⵍⵢⴰⵕⵏ ⵏ ⵉⴷⵔⵀⵎⵏ, ⴷⵉⴳⵙ 4,7 ⵏ ⵉⵎⵍⵢⴰⵕⵏ ⵏ ⵉⴷⵔⵀⵎⵏ ⴷ ⴰⵜⵉⴳ ⵏ ⵡⴰⵏⵏⴰⵍ ⵉⵜⵜⵓⵥⵍⴰⵢⵏ ⵉ ⵜⵓⵚⴽⴰ ⴷ ⵓⵙⴰⵀⵍ ⵏ ⵜⴳⵎⵎⴰ, ⴷ ⵓⴳⴳⴰⵔ ⵏ 2,5 ⵏ ⵉⵎⵍⵢⴰⵕⵏ ⵏ ⵉⴷⵔⵀⵎⵏ ⴷ ⴰⵜⵉⴳ ⵏ ⵜⵉⵡⵉⵙⵉ ⵜⴰⵖⴰⵡⵍⴰⵏⵜ ⵉⵜⵜⵓⵙⵡⵓⵜⵜⴰⵏ ⴳ 2.500 ⴷⵔⵀⵎ ⵉ ⵡⴰⵢⵢⵓⵔ, ⵏⵏⴰ ⵙⴳ ⵙⴱⵖⵔⵏⵜ ⵓⴳⴳⴰⵔ ⵏ 63.000 ⵏ ⵜⵡⵊⴰ.
ⴳ ⵢⵉⴳⵔ ⵏ ⵓⵇⵡⵡⵎ, ⵉⵜⵜⵓⵣⵎⵎⴻⵎ ⵓⵙⵎⵓⵜⵜⴳ ⵏ ⵓⴳⴳⴰⵔ ⵏ 2.5 ⵏ ⵉⵎⵍⵢⴰⵕⵏ ⵏ ⵉⴷⵔⵀⵎⵏ, ⵉⵣⴷⵉⵏ ⵙ ⵓⵎⴰⵜⴰ ⴷ ⵓⵙⵉⵜⵜⵉ ⵏ ⵉⵥⵕⴰⵏ ⴷ ⵡⴰⵍⵍⴰⵙ ⵏ ⵓⵕⵥⵥⵓⵎ ⵏ ⵉⴱⵔⴷⴰⵏ ⴷ ⵉⵖⴰⵔⴰⵙⵏ ⵉⵔⴳⵍⵏ. ⴰⵔ ⵙⵎⵓⵏⵏⵜ ⵜⵡⵓⵔⵉⵡⵉⵏ ⵜⵉⵎⴰⵢⵏⵓⵜⵉⵏ ⴰⵙⴰⵀⵍ ⵏ 288 ⴽⵉⵍⵓⵎⵉⵜⵔ ⵏ ⵉⴱⵔⴷⴰⵏ, ⴷ 49 ⵏ ⵜⵎⵔⵙⵍⵜ ⵜⴰⵏⴰⵥⵓⵕⵜ, ⴷ 8 ⴽⵉⵍⵓⵎⵉⵜⵔ ⵏ ⵜⵎⴰⵜⴰⵔⵉⵏ ⵏ ⵓⴱⵔⵉⴷ, ⴰⵢⴰ ⵙ ⵜⴳⵎⵉⴹⵉ ⵏ ⵓⵙⴽⴽⵉⵔ ⵉⵍⵍⴰⵏ ⴳⵔ 10% ⴷ 90% ⵙ ⵓⵎⵙⴰⵙⴰ ⴷ ⵉⵙⵏⵜⴰⵢ.
ⴳ ⵓⴳⵔⴰⵡ ⴰⴷ ⵏⵉⵜ, ⵉⵜⵜⵓⵙⴰⵡⵍ ⵅⴼ ⵉⵙⴽⴽⵉⵔⵏ ⵉⵜⵜⵓⵙⴽⴰⵔⵏ ⴳ ⵢⵉⴳⵔ ⵏ ⵓⵙⵍⵎⴷ, ⴰⵏⴷⴰ ⵙⵎⵓⵏⵏ ⵉⵙⵏⵜⴰⵢ ⴰⵙⴰⵀⵍ ⴷ ⵡⴰⵍⵍⴰⵙ ⵏ ⵜⵓⵚⴽⴰ ⵏ 1.718 ⵏ ⵜⵎⵔⵙⵍⵜ ⵏ ⵓⵙⵍⵎⴷ, ⵙ ⵢⴰⵜ ⵜⵎⵙⴰⵙⵜⵍⵜ ⵜⴰⵎⴰⵜⴰⵢⵜ ⵉⵣⵔⵉⵏ 3,5 ⵏ ⵉⵎⵍⵢⴰⵕⵏ ⵏ ⵉⴷⵔⵀⵎⵏ. ⴰⵏⴷⴰ ⵉⵜⵜⵓⵙⵎⴰⴷ ⵓⵙⴽⴽⵉⵔ ⵏ ⵜⵡⵓⵔⵉⵡⵉⵏ ⵏ ⵓⵙⴰⵀⵍ ⴷ ⵡⴰⵍⵍⴰⵙ ⵏ ⵜⵓⵚⴽⴰ ⵏ 372 ⵏ ⵜⵎⵔⵙⵍⵜ, ⴷ ⵓⵙⵕⵚⵓ ⵏ ⵉⵙⵏⵜⴰⵢ ⵉⵣⴷⵉⵏ ⴷ ⵓⵙⴰⵀⵍ ⴷ ⵡⴰⵍⵍⴰⵙ ⵏ ⵜⵓⵚⴽⴰ ⵏ 1.090 ⵏ ⵜⵎⵔⵙⵍⵜ ⵢⴰⴹⵏ ⴳ ⵜⵎⵏⴰⴹⵉⵏ ⵏ ⵍⵃⴰⵡⵣ ⴷ ⵜⴰⵔⵓⴷⴰⵏⵜ ⴷ ⴰⵥⵉⵍⴰⵍ ⴷ ⵛⵉⵛⴰⵡⴰ ⴷ ⵡⴰⵔⵣⴰⵣⴰⵜ.
ⴳ ⵓⵙⵡⵉⵔ ⵏ ⵢⵉⴳⵔ ⵏ ⵜⴷⵓⵙⵉ, ⵉⵜⵜⵓⵙⵎⴰⴷ ⵓⵙⴽⴽⵉⵔ ⵏ ⵜⵎⵀⵍⵜ ⵏ ⵓⵙⴰⵀⵍ ⴷ ⵡⴰⵍⵍⴰⵙ ⵏ ⵜⵓⵚⴽⴰ ⵏ 110 ⵏ ⵡⴰⵎⵎⴰⵙⵏ ⵉⴷⵓⵙⴰⵏⵏ, ⴷ ⵓⵙⵏⵜⵉ ⵏ ⵜⵡⵓⵔⵉⵡⵉⵏ ⴳ 37 ⵏ ⵡⴰⵎⵎⴰⵙ ⴰⴷⵓⵙⴰⵏ ⵢⴰⴹⵏ, ⵙ ⵢⴰⵜ ⵜⵎⵙⴰⵙⵜⵍⵜ ⵜⴰⵎⴰⵜⴰⵢⵜ ⵉⵜⵜⵓⵙⵜⴰⵍⵏ ⴳ 562 ⵏ ⵉⵎⵍⵢⵓⵏⵏ ⵏ ⵉⴷⵔⵀⵎⵏ.
ⴳ ⵢⵉⴳⵔ ⵏ ⵜⴼⵍⵍⴰⵃⵜ, ⵉⵜⵜⵓⵙⵎⴰⴷ ⵓⵖⴰⵡⴰⵙ ⵏ ⵜⵡⵓⵔⵉ ⴰⵎⵣⵡⴰⵔⵓ ⵏⵏⴰ ⵙ ⵉⵜⵜⵓⵙⴽⴰⵔ ⵓⴱⵟⵟⵓ ⵏ ⵉⵅⴼⴰⵡⵏ ⵏ ⵉⵎⵓⴷⴰⵔ ⴷ ⵜⵎⵥⵉⵏ ⴼⴰⴱⵓⵕ ⵅⴼ ⵉⴼⵍⵍⴰⵃⵏ, ⴷ ⵓⵙⴳⴳⴷ ⵏ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⵜⵉⴼⵍⵍⴰⵃⵉⵏ ⴷ ⵜⵉⵏ ⵡⴰⵎⴰⵏ. ⵎⴽⵍⵍⵉ ⵉⵜⵜⵓⵙⴰⵀⵍ 14 ⵏ ⵓⵏⴳⵔⴰⵡ ⵉ ⵓⵣⴷⴰⵢ ⵙ ⵓⵥⵟⵟⴰ ⵏ ⵡⴰⵎⴰⵏ ⵉⵎⵉⵎⵏ ⵉ ⵜⵉⵙⵙⵉ.
ⴰⵢⵍⵍⵉ ⵉⵥⵍⵉⵏ ⵙ ⵢⵉⴳⵔ ⵏ ⵜⵎⴰⵍⵍⴰⵢⵜ, ⵉⵜⵜⵓⵙⴰⵡⵍ ⵅⴼ ⵓⵎⵓⵔⵙ ⵏ 235 ⵏ ⵜⵎⵔⵙⵍⵜ ⵏ ⵓⵙⵏⵓⴱⴳ ⴰⵎⴰⵍⵍⴰⵢ ⴳ ⵓⵙⵎⴷ ⵏ ⵜⵡⵓⵔⵉⵡⵉⵏ ⵏ ⵜⵓⵚⴽⴰ ⴷ ⵓⵙⴰⵀⵍ ⵉⵥⵍⵉⵏ ⵙⵉⵙⵏⵜ, ⴰⵢⵏⵏⴰ ⵉⴳⴰⵏ 98% ⵙⴳ ⵜⵎⵔⵙⴰⵍ ⵜⵉⵎⴰⵍⵍⴰⵢⵉⵏ ⵉⵙⴱⵖⵔⵏ ⵙⴳ ⵡⴰⵏⵏⴰⵍ.
ⴳ ⵎⴰ ⵉⵥⵍⵉⵏ ⵙ ⵜⴷⴰⵎⵙⴰ ⵜⴰⵏⴰⵎⵓⵏⵜ ⴷ ⵜⴰⵎⴰⵡⴰⵙⵜ, ⵉⵜⵜⵓⵣⵎⵎⴻⵎ ⵓⵙⴱⵖⵔ ⵏ 180 ⵏ ⵜⵎⵢⴰⵡⴰⵙⵜ ⵙⴳ ⴰⴽⴽⵯ ⵉⴳⵣⵎⴰⵏ ⵏ ⵡⴰⵏⵏⴰⵍ, ⵙ ⵉⵡⵜⵜⴰⵙⵏ ⵏ ⵜⵉⵡⵉⵙⵉ ⵏⵏⵙⵏⵜ ⵅⴼ ⵡⴰⵍⵍⴰⵙ ⵏ ⵜⵓⵚⴽⴰ ⴷ ⵓⵙⴱⵓⵖⵍⵓ ⴷ ⵓⵙⵉⵡⵊⴷ. ⴰⴼⵍⵍⴰ ⵏ ⵓⵙⵔⵓⵙ ⵏ ⵓⴳⵣⵣⵓⵎ ⴰⵎⵣⵡⴰⵔⵓ ⵏ ⵡⴰⵏⵏⴰⵍ ⵉ 1.101 ⵏ ⵜⵙⴰⵡⵔⵜ ⵏ ⵜⵎⴳⵓⵔⵉ ⵜⴰⵇⴱⵓⵔⵜ.
ⵉⵜⵜⵓⵙⴷⴷⵉⴷ ⴳ ⵓⴳⵔⴰⵡ, ⵅⴼ ⵡⴰⵍⵍⴰⵙ ⵏ ⵓⵕⵥⵥⵓⵎ ⵏ 1.239 ⵏ ⵜⵎⵣⴳⵉⴷⴰ ⴹⴰⵕⴰⵜ ⵏ ⵜⴳⵉⵔⴰ ⵏ ⵜⵡⵓⵔⵉⵡⵉⵏ ⵏ ⵜⵓⵚⴽⴰ ⴷ ⵓⵙⴰⵀⵍ, ⴷ ⵓⴹⴼⴼⵓⵕ ⵏ ⵜⵡⵓⵔⵉⵡⵉⵏ ⵏ ⵓⵙⴳⴳⴷ ⵏ 64 ⵏ ⵡⴰⵏⵙⴰ ⴰⵏⴰⵔⵓⵣ ⴰⵎⵣⵔⴰⵢ, ⵙ ⵉⵡⵜⵜⴰⵙⵏ ⵏ ⵓⴼⵔⴰⴳ ⵏ ⵜⴰⵢⵙⵉ ⵜⴰⴷⵍⵙⴰⵏⵜ ⵜⴰⵏⴰⵎⵓⵔⵜ ⴷ ⵓⵙⵉⵜⵜⴳ ⵏⵏⵙ.
ⴳ ⵓⵎⵏⵉⴷ ⵏ ⵓⴳⵔⴰⵡ ⵏ ⵜⵙⵇⵇⵉⵎⵜ ⵜⴰⴳⵔⵎⴰⵡⵙⴰⵙⵜ, ⵉⵜⵜⵓⵙⴽⴰⵔ ⵓⴳⵔⴰⵡ ⵡⵉⵙ ⴽⵕⴰⴹ ⵏ ⵓⵙⵇⵇⵉⵎ ⵏ ⵓⵙⵡⵓⴷⴷⵓ ⴰⵙⵜⵔⴰⵜⵉⵊⵉ ⵏ ⵜⵙⵏⵓⵔⴰⵢⵜ ⵏ ⵜⴳⵎⵉ ⵏ ⵡⴰⵟⵍⴰⵚ ⴰⵎⵇⵇⵔⴰⵏ, ⴰⵏⴷⴰ ⵉⴳⴰ ⵜⴰⵎⵍⴷⴰ ⵉ ⵓⵙⵎⵏⵉⴷ ⵏ ⵜⵢⴰⴼⵓⵜ ⵏ ⵡⴰⵀⵉⵍ ⵏ ⵜⵡⵓⵔⵉ ⵏ ⵓⵙⴳⴳⵯⴰⵙ ⵏ 2025 ⵏⵏⴰ ⵜⵜⴹⴼⴰⵕ ⵜⵙⵏⵓⵔⴰⵢⵜ, ⴰⴼⵍⵍⴰ ⵏ ⵜⵣⵔⴰⵡⵜ ⴷ ⵓⵙⵖⵣⵏ ⵅⴼ ⵉⵙⵏⵜⴰⵢ ⵉⵜⵜⵓⵖⴰⵡⴰⵙⵏ ⵉ ⵓⵙⴳⴳⵯⴰⵙ ⵏ 2026, ⴷ ⵓⵙⵇⴱⵍ ⵏ ⵜⵎⵙⴰⵙⵜⵍⵜ ⵉⵜⵜⵓⵥⵍⴰⵢⵏ ⵉ ⵓⵙⴽⴽⵉⵔ ⵏ ⵉⵙⵏⵜⴰⵢ ⴰⴷ.