ⴰⴳⵔⴰⵡ ⵏ ⵓⵙⵇⵇⵉⵎ ⵏ ⵜⵏⴱⴰⴹⵜ ⵏ ⵡⴰⵙⵙ ⵏ ⵓⴽⵡⴰⵙ 19 ⵏⵓⵡⴰⵏⴱⵉⵔ 2026

CG-19-11-2026-3.jpeg

ⵉⵜⵜⴰⵡⵙⴽⴰⵔ ⴰⵙⵙ ⵏ ⵓⴽⵡⴰⵙ ⴰⵙⵙ ⵏ ⵓⴽⵡⴰⵙ 9 ⵊⵓⵎⴰⴷⴰ ⵜⵉⵙⵙ ⵙⵏⴰⵜ 1448, ⵉⵎⵙⴰⵙⴰⵏ ⴷ 19 ⵏⵓⵡⴰⵏⴱⵉⵔ 2026, ⵓⵙⵇⵇⵉⵎ ⵏ ⵜⵏⴱⴰⴹⵜ ⴷⴷⴰⵡ ⵜⵏⵙⵙⵉⵖⵅⴼⵜ ⵏ ⵎⴰⵙⵙⴰ ⴼⴰⵟⵉⵎⴰ ⵣⵣⴰⵀⵕⴰ ⵍⵎⵏⵚⵓⵕⵉ. ⵉⵥⵍⵉ ⵓⴳⵔⴰⵡ ⴰⴷ ⵙ ⵓⵎⴹⴰⴽⴰⵕ ⵅⴼ ⵜⵓⴳⵜ ⵏ ⵉⵙⵏⵜⴰⵢ ⵏ ⵉⴹⵕⵉⵚⵏ ⵓⵙⵍⵉⴳⵏⵏ ⴷ ⵓⵙⵖⵎⵙ ⵙ ⵢⴰⵜ ⵜⵎⵢⴰⵇⵇⴰⵏⵜ ⴷ ⵓⵎⴹⴰⴽⴰⵕ ⵅⴼ ⵜⵉⵙⵓⵎⴰⵔ ⵏ ⵓⵙⵎⴰⵍ ⴳ ⵜⴼⵙⵏⵉⵡⵉⵏ ⵜⵉⵏⴰⴼⵍⵍⴰⵜⵉⵏ ⵙ ⵓⵎⵙⴰⵙⴰ ⴰⴽⴷ ⵓⵎⵏⵏⵉ ⵡⵉⵙ92 ⴳ ⵓⴷⵓⵙⵜⵓⵔ.

  • ⴹⴰⵕⴰⵜ ⵎⴰⵢⴰⴷ, ⵉⵎⴹⴰⴽⴰⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⵉⵙⵖⵥⵏ ⴰⵙⵏⵜⵉ ⵏ ⵓⵎⵕⵙⵓⵎ  ⵓⵟⵟⵓⵏ 2.26.852 ⵉⵙⵏⴼⵍⵏ ⴷ ⵉⵙⵖⵓⴷⴰⵏ ⴰⵎⵕⵙⵓⵎ  ⵓⵟⵟⵓⵏ 2.19.67 ⵍⵍⵉ ⴷ ⵉⴼⴼⵖⵏ ⴳ 17 ⵉⴱⵔⵉⵔ 2019, ⵉⵥⵍⵉⵏ ⵙ  ⵓⵙⵡⵓⴷⴷⵓ ⵏ ⵓⵙⵍⴳⵏ ⵓⵟⵟⵓⵏ 47.18 ⵉⵣⴷⵉⵏ ⴷ ⵓⵙⴳⴷⴷ ⵏ ⵡⴰⵎⵎⴰⵙⵏ ⵉⵏⵎⵏⴰⴹⵏ ⵏ ⵓⵙⵙⴰⵔⵓ ⴷ ⵓⵙⵔⵓⵙ ⵏ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⵉⵎⵓⵏⵏ ⵏ ⵓⵙⵙⴰⵔⵓ, ⵉⵙⵎⵏⵉⴷ ⵜ ⵎⴰⵙⵙ ⴰⵎⴰⵡⵙⴰⵙ ⵏ ⵜⵎⴳⵓⵔⵉ ⴷ ⵜⵙⴱⴱⴰⴱⵜ ⴷ ⵓⵙⵙⴰⵔⵓ ⴷ ⵓⵙⵉⴷⴼ ⴰⴷⴰⵎⵙⴰⵏ.

ⵖⵉⴽⵍⵍⵉ ⵉⵎⴹⴰⴽⴰⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⵉⵙⵖⵥⵏ ⴽⵕⴰⴹ (3) ⵉⵏⵜⴰⵢⵏ ⵏ ⵉⵎⵕⵙⵓⵎⵏ, ⵉⵙⵎⵏⵉⴷ ⵜⵏ ⵎⴰⵙⵙ ⴰⵎⴰⵡⵙⴰⵙ ⵏ ⵓⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵉⵙⵍⵍⵡⵉ. ⵥⵍⵉⵏ ⵉⵎⵕⵙⵓⵎⵏ ⴰⴷ ⵙ :

  • ⴰⵎⵣⵡⴰⵔⵓ : ⴰⵙⵏⵜⵉ ⵏ ⵓⵎⵕⵙⵓⵎ ⵓⵟⵟⵓⵏ 2.26.705, ⵉⵙⵏⴼⵍⵏ ⴷ ⵉⵙⵖⵓⴷⴰⵏ ⵏ ⵉⵎⵕⵙⵓⵎⵏ ⵉⵣⴷⵉⵏ ⴷ ⵉⵏⴳⵔⴰⵡⵏ ⵉⴷⵙⵍⴰⵏⵏ ⵏ ⵜⵔⵓⴱⴱⴰ ⵏ ⵉⵙⵍⵎⴰⴷⵏ ⵉⵎⵔⵣⵓⵜⵏ ;
    ⵉⴳⴰ ⵓⵡⵜⵜⴰⵙ ⵓⵙⵏⵜⵉ ⵏ ⵓⵎⵕⵙⵓⵎ ⴰⴷ, ⵍⵍⵉ ⵉⵜⵜⵓⵙⴽⴰⵔⵏ ⵙ ⵓⵎⵛⵉⵡⴰⵕ ⴰⴽⴷ ⵉⵎⴷⵔⴰⵡⵏ ⵉⵏⴰⵎⵓⵏⵏ ⵉⵎⵥⵍⴰⵢ, ⵍⵍⵉ ⵉⵙⵏⴼⵍⵏ ⵉⵙⵖⵓⴷⴰⵏ ⵏ ⵜⵖⵜⴰⵙⵉⵏ ⵏ ⵉⵏⴳⵔⴰⵡⵏ ⵉⴷⵙⵍⴰⵏⵏ ⵓⵥⵍⵉⵢⵏ ⵏ ⵜⵔⵓⴱⴱⴰ ⵏ ⵉⵙⵍⵎⴰⴷⵏ ⵉⵎⵔⵣⵓⵜⵏ ⴳ ⵓⵙⴰⵜⵉ ⵏ ⵓⵙⵖⵓⴷⵓ ⵏ ⵓⵙⴱⵓⵖⵍⵓ ⵏ ⵓⵙⴰⵜⵉ ⴰⵏⵎⴰⵍⴰ ⵍⵍⵉ ⵉⵙⵓⴷⵓⵙⵏ ⴰⵙⵡⵓⴷⴷⵓ ⵏ ⵉⵙⴰⵔⴰⵜⵏ ⵏⵏⵙⵏ ⵉⵣⵣⵓⵍⴰⵏⵏ ⴷ ⵓⵙⴳⴷⴷ ⵏ ⵎⵏⵏⴰⵡ ⵏ ⵡⴰⴷⴷⴰⴷⵏ ⵓⵥⵍⵉⵢⵏ ⵍⵍⵉ ⴷ ⵉⴼⴼⵖⵏ ⵙⴳ ⵓⵣⵣⵉⴳⵣ ⵏ ⵉⴹⵕⵉⵚⵏ ⵉⵜⵜⵓⵙⵡⵓⵔⵉⵏ.
  • ⵡⵉⵙ ⵙⵉⵏ : ⴰⵙⵏⵜⵉ ⵏ ⵓⵎⵕⵙⵓⵎ ⵓⵟⵟⵓⵏ 2.26.559, ⵉⵥⵍⵉⵏ ⵙ ⵓⵙⵔⵓⵙ ⵏ ⵉⵎⴰⴽⵏ ⵉⵏⵎⴰⵍⴰⵜⵏ ⵉ ⵜⵏⴰⴼⵓⵜ ⵏ ⴽⵔⴰ ⵏ ⵜⵔⵓⴱⴱⴰ ⵏ ⵉⵎⵙⵡⵓⵔⵉⵢⵏ ⵏ ⵜⵎⴰⵡⴰⵙⵜ ⵏ ⵓⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵉⵙⵍⵍⵡⵉ ;
    ⵉⴷⴷⴰ ⴷ ⵓⵙⵏⵜⵉ ⴰⴷ ⴳ ⵓⵙⴰⵜⵉ ⵏ ⵡⴰⵜⵉⴳ ⵍⵍⵉ ⵉⵜⵜⴰⵡⴼⴽⴰⵏ ⵉ ⵓⴼⵔⴷⵉⵙ ⴰⵏⴼⴳⴰⵏ ⵏ ⵜⵎⴰⵡⴰⵙⵜ ⵏ ⵓⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵉⵙⵍⵍⵡⵉ. ⵙⵍⴰⵀⴰⵡⴰⵏ ⴰⴽⴽⵯ ⵙ ⵓⵎⵢⴰⴳ ⵏ ⵜⵎⴰⵡⴰⵙⵜ ⵍⵍⵉ ⵜⴳⴰ ⵢⴰⵜ ⵜⵔⵙⵍⵜ ⵜⴰⴷⵙⵍⴰⵏⵜ ⴳ ⵜⵖⴰⵔⴰⵙⵜ ⵏ ⵓⵎⵓⵙⵙⵓ ⵉⵖⵓⴷⴰⵏ ⵏ ⵜⵎⵙⵙⵓⴳⵓⵔⵜ ⴷ ⵜⵎⵍⵍⵉⵜ ⵏ ⵓⵣⵣⵉⴳⵣ ⵏ ⵉⵙⵏⴼⴰⵕⵏ ⵉⵙⵜⵔⴰⵜⵉⵊⵉⵢⵏ, ⵙ ⵓⵙⵖⵥⵏ ⵏ ⵉⵎⴰⴽⵏ ⵉⵏⵎⴰⵍⴰⵜⵏ ⵉ ⵜⵏⴰⴼⵓⵜ ⵏ ⴽⵔⴰ ⵏ ⵉⵎⵙⵡⵓⵔⵉⵢⵏ ⵏ ⵜⵎⴰⵡⴰⵙⵜ, ⵏⵏⴰ ⵉⵔⴰⵏ ⴰⵙⵖⵓⴷⵓ ⵏ ⵡⴰⴷⴷⴰⴷ ⵏⵏⵙⵏ ⴰⵣⵣⵓⵍⴰⵏ ⴷ ⵓⵏⴰⵎⵓⵏ, ⴷ ⵓⵙⵉⵍⵉ ⵏ ⵜⵉⵣⵉ ⵏ ⵉⵙⴰⵔⴰⵜⵏ ⵏⵏⵙⵏ ⵉⵎⵙⵙⵓⴳⵓⵔⵏ ⴷ ⵉⵣⵣⵓⵍⴰⵏⵏ, ⵙ ⵓⵎⵙⴰⵙⴰ ⴷ ⵜⵎⵓⵙⵙⵓⵜ ⵜⴰⵏⴰⵎⵓⵔⵜ ⵏⵏⴰ ⵉⵡⴰⵜⵙⵏ ⴰⵙⵜⵉⴳ ⵏ ⵉⵙⵓⴳⴰⵎ ⵉⵏⴼⴳⴰⵏⵏ ⴳ ⵜⵎⵙⵙⵓⴳⴰⵔ ⵜⵉⴳⴷⵓⴷⴰⵏⵉⵏ ⴷ ⵓⵙⵙⴱⵖⵙ ⵏⵏⵙⵏ.
  • ⵡⵉⵙ ⴽⵕⴰⴹ : ⴰⵙⵏⵜⵉ ⵏ ⵓⵎⵕⵙⵓⵎ ⵓⵟⵟⵓⵏ 2.26.460, ⵉⵙⵏⴼⵍⵏ ⵉⵙⵖⵓⴷⴰⵏ ⴰⵎⵕⵙⵓⵎ ⵓⵟⵟⵓⵏ 2.12.790 ⵍⵍⵉ ⴷ ⵉⴼⴼⵖⵏ ⴳ 19 ⴱⵕⴰⵢⵕ 2013, ⵉⵥⵍⵉⵏ ⵙ ⵓⵙⵡⵓⵜⵜⵓ ⵏ ⵜⵡⵓⵔⵉⵡⵉⵏ ⴷ ⵓⵙⵏⵎⴰⵍⴰ ⵏ ⵜⵎⴰⵡⴰⵙⵜ ⵏ ⵓⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵎⵓⵜⵜⴳ ⵏ ⵉⵙⴰⵜⵉⵢⵏ ;
    ⵉⴳⴰ ⵓⵡⵜⵜⴰⵙ ⵓⵙⵏⵜⵉ ⴰⴷ ⴰⵙⵎⵙⴰⵙⴰ ⵏ ⵓⵚⴽⴰⵡ ⴰⵏⵎⴰⵍⴰ ⵏ ⵜⵎⴰⵡⴰⵙⵜ ⴷ ⵉⵙⵏⴼⴰⵍⵏ ⵓⵍⴳⵉⵏⵏ ⴷ ⵉⵡⵓⵔⵉⵢⵏ ⵍⵍⵉ ⵉⵍⵍⴰⵏ ⴳ ⵉⴼⵔⴷⵉⵙⵏ ⵏ ⵓⵏⴳⵔⴰⵡ ⵏ ⵓⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ, ⵙ ⵜⵖⵔⴰⵙⵜ ⵏ ⵡⴰⵍⵍⵍⴰⵙ ⵏ ⵓⵙⴽⴰⵏ ⵏ ⴽⵔⴰ ⵏ ⵜⵎⵀⵍⵉⵡⵉⵏ ⴷ ⵓⵙⵔⵓⵙ ⵏ ⵜⵓⵚⴽⵉⵡⵉⵏ ⵜⵉⵎⵙⵙⵓⴳⵓⵔⵉⵏ ⵜⵉⵎⴰⵢⵏⵓⵜⵉⵏ ⵏⵏⴰ ⵉⵜⵜⵔⴰⵔⴰⵏ ⵉ ⵜⵖⴰⵡⵙⵉⵡⵉⵏ ⵏ ⵏ ⵓⵣⵎⵣ ⴰⴷ.
     

ⵉⴹⴼⴰⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⵜⵉⵡⵓⵔⵉⵡⵉⵏ ⵏⵏⵙ ⵙ ⵓⵙⵖⵎⵙ ⵙ ⵢⴰⵏ ⵓⵎⵙⴰⵙⴰ ⴰⵙⴰⵜⵉ ⵏ ⵓⵎⵢⴰⵡⴰⵙ ⴳ ⵢⵉⴳⵔ ⵏ ⵜⴳⵎⵔⵜ ⵜⴰⵢⵍⴰⵏⵜ ⴷ ⵓⵙⵎⴳⵉ ⵏ ⵉⵎⵓⴷⴰⵔ ⵏ ⵡⴰⵎⴰⵏ ⴳⵔ ⵜⵏⴱⴰⴹⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⵏⴱⴰⴹⵜ ⵏ ⵜⴳⴷⵓⴷⴰⵏⵜ ⵏ ⴽⴰⵎⵉⵕⵓⵏ, ⵉⵜⵜⵓⵙⴳⵎⴹⵏ ⴳ ⵎⴽⵏⴰⵙ ⴰⵙⵙ ⵏ 23 ⵉⴱⵔⵉⵔ 2026. ⵖⵉⴽⵍⵍⵉ ⵉⵙⵖⵥⵏ ⵓⵙⵇⵇⵉⵎ ⵏ ⵜⵏⴱⴰⴹⵜ ⴰⵙⵏⵜⵉ ⵏ ⵓⵙⵍⴳⵏ ⵓⵟⵟⵓⵏ 63.26, ⵍⵍⵉ ⵉⵙⵖⵥⵏ ⴰⵎⵙⴰⵙⴰ ⴰⴷ ⵉⵜⵜⵓⴱⴷⴰⵔⵏ. ⵉⵙⵎⵏⵉⴷ ⵜⵏ ⵎⴰⵙⵙ ⴰⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⴰⴱⵉⵢⵏ ⵉⵣⴷⴰⵖ ⴳ ⴱⵕⵕⴰ.

ⵉⵙⵎⴷ ⵓⵙⵇⵇⵉⵎ ⵏ ⵜⵏⴱⴰⴹⵜ ⵜⴰⵡⵓⵔⵉ ⵏⵏⵙ ⵙ ⵓⵎⵔⴰⵔⴰ ⵏ ⵡⴰⵡⴰⵍ ⴷ ⵓⵎⵙⴰⵙⴰ ⵅⴼ ⵉⵙⵓⵎⵓⵔⵏ ⵏ ⵓⵙⵎⴰⵍ ⴳ ⵜⴼⵙⵏⵉⵡⵉⵏ ⵜⵉⵏⴰⴼⵍⵍⴰⵜⵉⵏ ⵙ ⵓⵎⵙⴰⵙⴰ ⴰⴽⴷ ⵓⵎⴰⴳⵔⴰⴷ ⵡⵉⵙ92 ⴳ ⵓⴷⵓⵙⵜⵓⵔ :

  • ⴳ ⵓⵙⵡⵉⵔ ⵏ ⵜⵏⵙⵙⵉⵅⴼⵜ ⵏ ⵜⵏⴱⴰⴹⵜ, ⵉⵜⵜⵓⵙⴳⴷⴷⴰⵍⴰ :
    • ⵎⴰⵙⵙ ⵢⵓⵙⴼ ⵍⵃⴰⵙⴰⵏⵉ, ⴰⵏⴼⵍⵓⵙ ⴰⵎⴰⵜⴰⵢ ⵏ ⵜⵏⵓⴼⴰ ⵏ ⵜⵏⵙⵙⵉⵅⴼⵜ ⵏ ⵜⵏⴱⴰⴹⵜ.
  • ⴳ ⵓⵙⵡⵉⵔ ⵏ ⵜⵎⴰⵡⴰⵙⵜ ⵏ ⵓⵙⵎⵙⴰⵙⴰ ⵏ ⵡⴰⴽⴰⵍ ⴰⵏⴰⵎⵓⵔ ⴷ ⵓⵥⴽⴰⵡ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ, ⵉⵜⵜⵓⵙⴳⴷⴷⴰⵍⴰ :  
    • ⵎⴰⵙⵙ ⵍⵅⴰⵍⵉⵍ ⴱⵍⴽⴰⵎⵍ, ⴰⵏⵎⵀⴰⵍ ⵏ ⵜⵙⵏⵓⵔⴰⵢⵜ ⵜⴰⵖⵔⵎⴰⵏⵜ ⵏ ⵍⵄⵕⴰⵢⵛ - ⵡⴰⵣⵣⴰⵏ.
  • ⴳ ⵓⵙⵡⵉⵔ ⵏ ⵜⵙⵎⵉⵔⵉⵜ ⵜⴰⵎⴰⵜⴰⵢⵜ ⵏ ⵓⵙⵖⵉⵡⵙ, ⵉⵜⵜⵓⵙⴳⴷⴷⴰⵍⴰ:
    • ⵎⴰⵙⵙ ⵅⴰⵍⵉⵍ ⵙⴰⵄⵉⴷ, ⴰⵏⵎⵀⴰⵍ ⵏ ⵜⵉⵏⵎⵍ ⵏ ⵜⵎⴰⵙⵙⴰⵏⵉⵏ ⵏ ⵉⵏⵖⵎⵉⵙⵏ.
       

ⵜⴰⴱⵔⴰⵜ ⵜⴰⵏⵖⵎⴰⵙⵜ