ⴰⴳⵔⴰⵡ ⵏ ⵓⵙⵇⵇⵉⵎ ⵏ ⵜⵏⴱⴰⴹⵜ ⵏ ⵡⴰⵙⵙ ⵏ ⵓⴽⵡⴰⵙ 8 ⵢⵓⵏⵢⵓ 2023
ⵜⴳⴰ ⵜⵏⴱⴰⴹⵜ ⴰⵙⵙ ⵏ ⵓⴽⵡⴰⵙ 12 ¬ⴷⵓⵍⵇⵉⵄⴷⴰ 1444, ⵉⵎⵙⴰⵙⴰⵏ ⴷ 1 ⵢⵓⵏⵢⵓ 2023 ⴰⴳⵔⴰⵡ ⵏ ⵜⵏⴱⴰⴹⵜ, ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵄⴰⵣⵉⵣ ⴰⵅⴰⵏⵏⵓⵛ, ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⵉⵥⵍⵉ ⵙ ⵜⵏⴽⴷⴰ ⵏ ⵙⵉⵏ ⵉⴼⵙⴰⵔⵏ ⵉⴳⵔⴰⵏⵏ, ⴰⵎⵣⵡⴰⵔⵓ ⵅⴼ ⵓⵎⵍⴰⵏ ⴷ ⵓⵎⴰⵢⵏⵓ ⴳ ⵉⵔⵉⵎⵏ ⵏ ⵍⴱⴰⴽⴰⵍⵓⵕⵢⴰ - ⵜⴰⵙⵓⵜⵍⵜ ⵏ 2023, ⵡⵉⵙ ⵙⵉⵏ ⵅⴼ ⵜⵉⴳⴳⵉⵜⵉ ⵏ ⵓⵙⵙⵓⵊⴷ ⵉ ⵜⴼⴰⵙⴽⴰ, ⴷ ⵓⵎⴷⴰⴽⴰⵔ ⵅⴼ ⵜⵓⴳⵜ ⵉⵙⵖⵏⴰ ⵏ ⵉⴹⵕⵉⵚⵏ ⵉⵣⵔⴼⴰⵏⵏ, ⴷ ⵉⵙⵓⵎⵓⵔⵏ ⵏ ⵓⵙⵎⴰⵍ ⴳ ⵜⴼⵙⵏⵉⵡⵉⵏ ⵜⵉⵏⴰⴼⵍⵍⴰⵜⵉⵏ ⵎⴽⴷⴰ ⵉⵜⵜⵉⵏⵉ ⵓⵎⴰⴳⵔⴰⴷ 92 ⵏ ⵓⴷⵓⵙⵜⵓⵔ.
ⴳ ⵜⵉⵣⵡⵉⵔⵉ, ⵉⴹⴼⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⴰⴼⵙⴰⵔ ⵅⴼ ⵓⵎⵍⴰⵏ ⴷ ⵓⵎⴰⵢⵏⵓ ⵅⴼ ⵉⵔⵉⵎⵏ ⵏ ⵍⴱⴰⴽⴰⵍⵓⵕⵢⴰ - ⵜⴰⵙⵓⵍⵜⵍⵜ ⵏ 2023, ⵉⵙⵏⴽⴷ ⵜ ⵎⴰⵙⵙ ⵛⴰⴽⵉⴱ ⴱⵏⵎⵓⵙⴰ, ⴰⵎⴰⵡⵙⴰⵙ ⵏⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵙⵍⵎⴷ ⴰⵎⵏⵣⵓ ⴷ ⵜⵓⵏⵏⵓⵏⵜ.
ⵢⵉⵡⵉ ⴷ ⵎⴰⵙⵙ ⴰⵎⴰⵡⵙⴰⵙ ⴳ ⵡⴰⵡⴰⵍ ⵏⵏⵙ ⵉⵍⴰ ⴰⵏⵛⵜ ⵏ ⵉⵎⵏⴽⴰⴷⵏ ⴷ ⵜⵎⵏⴽⴰⴷⵉⵏ ⵢⴰⵇⵇⵔⴰⵏ ⴰⵙⴳⴳⴰⵙ ⴰ ⵢⵉⵡⴹ ⵏⵏ 426 ⵏ ⵉⴼⴹ, ⵉⵎⵎⴰⵔⵏⵉ ⵙ 62530, ⵎⴰ ⵉⵜⵜⴳⴳⴰⵏ 18°/°, ⵙ ⵓⵙⵎⵣⴰⵣⴰⵍ ⴰⴽⴷ ⵜⵙⵓⵜⵍⵜ 2022. ⵉⴳⴰ ⴷⵉⴳⵙ ⵓⵙⵙⵍⵎⴷ ⴰⵏⵎⵍⴰⵏ ⵓⵙⵍⵉⴳ 10°/° ⵏ ⵜⵉⵎⵎⴰⴷ ⵏ ⵉⵎⵏⴽⴰⴷⵏ ⴰⵇⵇⵔⴰⵏⵉⵏ, ⵉⴳⵓⵍⵓ ⵏⵏ ⵓⵏⵛⵜ ⵏ ⵉⵎⵏⴽⴰⴷⵏ ⵉⵍⴻⵍⵍⵉⵢⵏ ⴷ ⵜⵎⵏⴽⴰⴷⵉⵏ ⵜⵉⵍⴻⵍⵍⵉⵢⵉⵏ 132 ⵏ ⵉⴼⴹ.
ⵉⵙⵉⵡⵍ ⵓⴼⵙⴰⵔ ⵓⵍⴰ ⵅⴼ ⵓⵎⴰⵢⵏⵓ ⵏ ⵓⵙⴳⴳⵯⴰⵙ ⴷⴷⵖ, ⴰⵎⴰⵢⵏⵓ ⴷⴷⵖ ⵉⴳⴰ ⴰⵙⵉⵍⵉ ⵏ ⵓⵙⵡⵉⵔ ⵏ ⵓⵙⴼⵍⵙ ⵏ ⵜⵓⵔⴰⴳⵜ ⵏ ⵍⴱⴰⴽⴰⵍⵓⵕⵢⴰ ⴷ ⵜⵏⴼⵓⵍⵉⵏ ⵏ ⵜⵏⵇⵇⴰⴹ, ⵙ ⵓⴼⴰⵔⵙ ⵏ ⵢⴰⵏ ⵜⵓⵔⴰⴳⵜ ⵉⴼⵍⵙⵏ, ⴷ ⵓⵃⵉⵢⵢⵍ ⵏ ⵢⴰⵜ ⵜⴳⵔⵓⵎⵎⴰ ⵜⴰⵎⵣⵡⴰⵔⵓⵜ ⵏ ⵜⵏⴰⴼⵓⵜⵉⵏ ⵜⵉⵎⵓⵟⵟⵓⵏⵉⵏ ⵏⵏⴰ ⵖⵔⴰ ⵉⵎⵓⵏⵏ ⴰⴽⴷ ⵓⵙⵎⵔⵙ ⵉⴼⵍⵙⵏ ⵏ ⵜⵓⵔⴰⴳⵜ, ⵜⴰⵡⵓⵔⵉ ⵜⴽⵛⵎ ⴳ ⵓⵙⴰⵜⵉⵏ ⵏ ⵓⴹⴼⴰⵕ ⵏ ⵓⵙⵉⴷⴼ ⵏ ⵜⵉⵜⵉⴽⵏⵓⵍⵓⵊⵉⵢⵉⵏ ⵜⵉⵜⵔⴰⵜⵉⵏ ⴳ ⵓⵙⵏⵢⵓⴷⴷⵓ ⴰⴱⵉⴷⴰⴳⵓⵊⵉ, ⵍⵓⵎⵏ ⵡⵉⵏ ⵜⵢⴰⴷⵓⵣⵜ ⴷ ⵢⵉⵔⵉⵎⵏ, ⴰⵢⵍⵍⵉ ⴷ ⵉⵜⵜⵎⵙⴰⵙⴰⵏ ⴰⴽⴷ ⴰⵎⵓⵜⵜⵉ ⴰⵎⵓⵟⵟⵓⵏ, ⴰⵔ ⵉⵙⵙⵔⵅⵓ ⴰⵙⴼⵔⴰⵔ ⵏ ⵜⴱⵔⵉⴷⵉⵏ ⴳ ⵉⵢⵢⴰⵔ ⴰ. ⵎⴽⵍⵍⵉ ⵔⴰⴷ ⵜⴰⵡⵜ ⵜⵎⵀⴰⵍⵜ ⴰⴷ ⴳ ⵓⴼⴰⵔⵙ ⵏ ⵜⵓⵔⴰⴳⵉⵏ ⵉⵍⴰⵏ ⵜⵉⵎⵥⵍⵉⵢⵉⵏ ⵜⵉⵎⵓⵟⵟⵓⵏⵉⵏ ⵜⵉⵏⵎⵢⴰⵖⵉⵏ, ⴷ ⵙⴷⴰⴷⴷⵜ ⴰⵍⴳⴳⵓⴷ ⵏⵏⵙⵏⵜ.
ⵃⵎⴰ ⴰⴷ ⵜⵎⵓⵔⵙ ⵜⵙⵓⵜⵍⵜ ⴷⴷⵖ, ⵜⵜⵡⴰⴳⴳⵏⵜ ⴽⵉⴳⴰⵏ ⵏ ⵜⵉⴳⴳⵉⵜⵉⵏ, ⵉⵜⵜⵓⵙⵓⵊⴷ 1753 ⵏ ⵡⴰⵎⵎⴰⵙ ⵏ ⵢⵉⵔⵉⵎⵏ, ⵎⴰ ⵉⵜⵜⴳⴳⴰⵏ 24600 ⵏ ⵜⴷⴰⵍⴰ ⵏ ⵢⵉⵔⵉⵎ ⴳ ⵎⴰⵕⵕⴰ ⵜⵉⴽⴰⴷⵉⵎⵉⵢⵉⵏ, ⵉⵍⵉⵏ ⵉⵙⵓⴳⴰⵎ ⵉⵏⴼⴳⴰⵏⵏ ⵏⵏⴰ ⴷ ⵉⴽⵯⵎⴰⵏ. ⴰⴼⴰⴷ ⴰⴷ ⵉⴼⵓⵍⴽⵉ ⵓⵃⵉⵢⵢⵍ ⵏ ⵉⵎⵏⴽⴰⴷⵏ ⴷ ⵜⵎⵏⴽⴰⴷⵉⵏ, ⵜⵎⵓⵏ ⴰⴽⵉⴷⵙⵏ ⵜⵡⵉⵙⵉ ⴰⴽⴰ ⴰⴷ ⵙⵙⵓⵊⴷⵏ ⵉ ⵢⵉⵔⵉⵎⵏ ⵏⵏⵙⵏ ⴳ ⵜⵡⵜⵍⵉⵏ ⵉⵖⵓⴷⴰⵏ, ⵜⵜⵢⴰⵣⴰⵏⵜ ⴰⵙⵏ ⴳ ⵓⵙⴰⵡⴰⵢ ⴰⵍⵉⴽⵜⵕⵓⵏ ⵏⵏⵙⵏ ⵜⵓⴳⵜ ⵏ ⵜⵏⴼⵓⵍⵉⵏ ⵏ ⵓⵙⵙⴼⵔⵓ, ⵓⵍⴰ ⴰⵙⵉⴳⵜ ⵏ ⵜⵉⵔⴰⵎ ⵏ ⵡⴰⵏⵏⴰⵍ ⴰⵙⴳⵎⴰⵏ, ⴷ ⵓⵙⴰⵙⵜⵡⴰ ⵏ ⵉⵙⵏⵜⴰⵍ ⴷ ⵜⵡⵜⵍⵉⵏ ⵏ ⵓⵣⵣⵔⴰⵢ ⵏ ⵢⵓⵔⵉⵎⵏ ⵉ ⵉⵎⵏⴽⴰⴷⵏ ⴷ ⵜⵎⵏⴽⴰⴷⵉⵏ ⵉⵍⵍⴰⵏ ⴳ ⵡⴰⴷⴷⴰⴷⵏ ⵉⵥⵍⵉⵏ.
ⴼⴼⵉⵔ ⴰⵙ, ⵉⵙⴽⵏⴷ ⵎⴰⵙⵙ ⵎⵓⵃⵎⵎⴰⴷ ⵚⴰⴹⵉⵇⵉ, ⴰⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵎⵔⵜ ⵜⵉⵍⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ ⵢⴰⵏ ⵓⴼⵙⴰⵔ ⵅⴼ ⵜⵉⴳⴳⵉⵜⵉⵏ ⵏ ⵓⵙⵙⵓⵊⴷ ⵉ ⵜⴼⵓⴳⵍⴰ ⵏ ⵜⴼⴰⵙⴽⴰ. ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ ⴳ ⵓⴼⵙⴰⵔ ⵏⵏⵙ ⵎⴰⵙ ⴷ ⵓⵙⵙⵉⵊⴷ ⴰⴷ ⵉ ⵜⴼⴰⵙⴽⴰ ⵏ ⵓⵙⴳⴳⵯⴰⵙ 1444 ⵉⴳⵓⵍⴰ ⵏⵏ ⵢⴰⵜ ⵜⴼⵔⴽⴰ ⵉⵣⵡⴰⵔ, ⵉⵙ ⵏⵏ ⵢⵉⵡⴹ ⵓⵏⵛⵜ ⵏ ⵉⵅⴼⴰⵡⵏ ⵏ ⵡⵓⵍⵍⵉ ⴷ ⵜⴰⵜⵜⵏ ⵉⵜⵜⵓⵣⵎⵎⴰⵎⵏ ⵖⵓⵔ ⵜⵏⴰⴼⵓⵜⵉⵏ ⵏ ⵓⵙⵉⵔⴰ ⴰⵏⴰⵎⵓⵔ ⵏ ⵓⴼⵔⴰ ⴰⴷⴰⵡⵙⴰⵏ, ⵉⴳⴰⵏ ⵉ ⵜⵖⵔⵙⵉ, 5.4 ⵎⵍⵢⵓⵏ ⵏ ⵢⵉⵅⴼ. ⴰⵎⵓⵅ ⵉⵜⵜⵓⵣⵎⵎⴰⵎ ⵖⵔ ⵓⵙⵉⵔⴰ 214000 ⵏ ⵜⴰⵢⵓⵏⵜ ⵏ ⵜⵏⴽⵔⴰ ⴷ ⵓⵙⴷⵓⵙ ⵏ ⵉⵣⴰⵎⵎⴰⵔⵏ ⵏ ⵜⴼⴰⵙⴽⴰ, ⵉⵍⵉⵏⵜ ⵙⴰⴷⵓ ⵜⵉⴹⴰⴼ ⵢⴰⵜⵜⵓⵢⵏ.
ⵎⴽⵍⵍⵉ ⵉⵏⵏⴰ ⵓⵎⴰⵡⵙⴰⵙ ⵎⴰⵙ ⴷ ⵜⵉⵏⴰⴼⵓⵜⵉⵏ ⵜⵉⴱⴰⵢⵟⴰⵔⵉⵢⵉⵏ ⴰⴱⴷⴰ ⵎⴰⵜⵔⵏⵜ ⴰⴷⴷⴰⴷ ⴰⴷⴰⵡⵙⴰⵏ ⵏ ⵡⵓⵍⵍⵉ ⵉⴷⴷⵖ ⵓⵎⴰⵜⵔ ⴳ ⵉⴷⵖⴰⵔⵏ ⵏ ⵜⴽⵙⵙⴰⴱⵜ ⴷ ⵉⵙⴰⵔⵎⵏ ⴷ ⵓⵖⵓⴷⵓ ⵏ ⵍⵄⵍⴼ. ⵉⵎⵎⴰ ⴰⴷⴷⴰⴷ ⴰⴷⴰⵡⵙⴰⵏ ⵏ ⵓⵛⵜⴰⵍ ⴰⵏⴰⵎⵓⵔ, ⵇⵇⴰ ⵉⵥⵉⵍ ⴽⵉⴳⴰⵏ. ⵃⵎⴰ ⴰⴷ ⴷⵓⵙⵏⵜ ⵜⵓⵚⴽⵉⵡⵉⵏ ⵜⵉⵎⴰⴷⴷⴰⵢⵉⵏ ⵏ ⵉⴷⵖⴰⵔⵏ ⵏ ⵎⵙⵖⵉⵡⵜ ⴷ ⵎⵏⵣⵉⵡⵜ ⵏ ⵉⵏⵓⴳⵓⴹⵏ, ⵔⴰⴷ ⵉⵜⵜⵡⴰⴳ, ⵉⵜⵜⵓⵙⵎⵙⴰⵙⴰ 34 ⵏ ⵓⴳⴰⴷⴰⵣ ⴰⴽⵓⴷⴰⵏ ⵏ ⵜⴼⴰⵙⴽⴰ ⴳ ⵎⴰⵕⵕⴰ ⵜⵉⵎⵏⴰⴹⵉⵏ ⵏ ⵜⵎⵓⵔⵜ ⵏⵏⵖ, ⵔⴰⴷ ⵉⵙⵙ ⵜⵜⴰⴷⴼⵏⵜ ⵅⵙ ⵓⵍⵍⵉ ⴷ ⵜⴰⵜⵜⵏ ⵏⵏⴰ ⵉⵜⵜⵓⵣⵎⵎⴰⵎⵏ ⴳ ⵓⵙⴰⵜⵉ ⵏ ⵜⵎⵀⴰⵍⵜ ⵏ ⵜⵉⴽⴽⵉ ⵏ ⵓⵟⵟⵓⵏⵏ ⵏⵏⴰ ⴹⴼⵕⵏⵜ ⵜⵏⴰⴼⵓⵜⵉⵏ ⵏ ⵓⵙⵉⵔⴰ ⴰⵏⴰⵎⵓⵔ ⵏ ⵓⴼⵔⴰ ⴰⴷⴰⵡⵙⴰⵏ ⵙ ⵜⴰⵡⵙⵉ ⵏ ⵜⵓⴷⴷⵙⵉⵡⵉⵏ ⵜⵉⵣⵣⵓⵍⴰⵏⵉⵏ.
- ⵉⴹⴼⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⵜⵉⵡⵓⵔⵉⵡⵉⵏ ⵏⵏⵙ ⵙ ⵓⵎⴷⴰⴽⴰⵔ ⴷ ⵓⵣⵣⵔⴰⵢ ⵏ ⵓⵙⵖⵏⵓ ⵏ ⵓⵎⵕⵚⵓⵎ ⵡⵉⵙⵙ 2.22.04 ⵏⵏⴰ ⵉⵜⵜⴻⵜⵜⵔⵏ ⵜⵉⵙⵉⵏⵙⵜ ⵏ ⵉⵣⵔⴼ ⵡⵉⵙⵙ 36.21 ⵉⵇⵏⴻⵏ ⵖⴰⵔ ⴰⴷⴷⴰⴷ ⵓⵖⵔⵉⵎ, ⵉⵙⵏⴽⴷ ⵜ ⵎⴰⵙⵙ ⵄⴱⴷⵍⵡⴰⵃⴷ ⵍⴰⴼⵜⵉⵜ, ⴰⵎⴰⵡⵙⴰⵙ ⵏ ⵓⴳⵏⵙ.
- ⴼⴼⵉⵔ ⴰⵙ, ⵉⵎⴷⴰⴽⴰⵔ ⴷ ⵉⵣⵣⵔⵉ ⵓⵙⵇⵇⵉⵎ ⵏ ⵜⵏⴱⴰⴹⵜ ⴰⵙⵖⵏⵓ ⵏ ⵓⵎⵕⵚⵓⵎ ⵡⵉⵙⵙ 2.22.813 ⵉⵥⵍⵉ ⵙ ⵜⵉⴽⴽⵉ ⵏ ⵜⴰⵡⵙⵉⵡⵉⵏ ⵏ ⵓⵇⴰⵕⵉⴹ ⵏ ⵓⵡⴰⵏⴽ ⵅⴼ ⵓⵙⵙⴰⵔⵡ ⴰⵏⴼⵍⴰⵃ ⵏⵏⴰ ⵉⵜⵜⵓⵙⴽⴰⵔⵏ ⴳ ⵉⴽⴰⵍⵉⵡⵏ ⵏ ⵙⵓⵍⴰⵍⴰⵜ, ⴳ ⵓⵙⴰⵜⵉ ⵏ ⵜⵎⵀⴰⵍⵉⵏ ⵏ ⵜⵉⴽⴽⵉ ⵏ ⵜⵉⵍⵉⵜ ⴷ ⵍⴽⵔⴰ ⴷ ⵓⵙⵎⴰⵢⵏⵓ ⵏ ⴹⴰⵢⵄⴰⵜ ⵏ ⵜⴼⵍⵍⴰⵃⵜ, ⵉⵙⵎⵏⵉⴷ ⵜ ⵎⴰⵙⵙ ⵎⵓⵃⵎⵎⴰⴷ ⵚⴰⴹⵉⵇⵉ, ⴰⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴳ ⵜⴳⵎⵔⵜ ⵜⵉⵍⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏⴷ ⵜⴰⴳⴰⵏⵉⵏ.
- ⴰⵡⴰⵔⵏ ⴰⵙ, ⵉⵎⴷⴰⴽⴰⵔ ⵓⵙⵇⵇⵉⵎ ⵏ ⵜⵏⴱⴰⴹⵜ ⵓⴽⴰ ⵉⵣⵣⵔⵉ ⴰⵙⵖⵏⵓ ⵏ ⵓⵎⵕⵚⵓⵎ ⵡⵉⵙⵙ 2.23.340 ⵍⵍⵉⴳ ⵉⵙⵏⴼⵍ ⴰⵎⵕⵚⵓⵎ ⵡⵉⵙⵙ 2.11.151 ⵉ ⴷ ⵉⴼⴼⵖⵏ ⴰⵙⵙ ⵏ 23 ⵊⵓⵎⴰⴷⴰ 2 1432 (27 ⵎⴰⵢ 2011) ⵉⵜⵜⵉⵏⵉⵏ ⵙ ⵓⵙⴽⴰⵔ ⵏ ⵜⵎⵏⴰⴹⵜ ⵜⵉⵍⴻⵍⵍⵉⵜ ⵏ ⵓⵙⵉⴼⴹ ⴳ ⵡⵊⴷⴰ, ⵉⵙⵏⴽⴷ ⵜ ⵎⴰⵙⵙ ⵕⵉⵢⴰⴹ ⵎⵣⵡⴰⵔ, ⴰⵎⴰⵡⵙⴰⵙ ⵏ ⵜⵎⴳⵓⵔⵉ ⴷ ⵜⵙⴱⴱⴰⴱⵜ.
ⴳ ⵓⵏⴳⴳⴰⵔ, ⵉⵎⴷⴰⴽⴰⵔ ⴷ ⵉⵣⵣⵔⵉ ⵓⵙⵇⵇⵉⵎ ⵏ ⵜⵏⴱⴰⴹⵜ ⵉⵙⵓⵎⵓⵔⵏ ⵏ ⵓⵙⵎⴰⵍ ⴳ ⵜⴼⵙⵏⵉⵡⵉⵏ ⵜⵉⵏⴰⴼⵍⵍⴰⵜⵉⵏ ⵎⴽⴷⴰ ⵉⵜⵜⵉⵏⵉ ⵓⵎⴰⴳⵔⴰⴷ 92 ⵏ ⵓⴷⵓⵙⵜⵓⵔ.
- ⴳ ⵜⵎⴰⵡⴰⵙⵜ ⵏ ⵓⵙⵎⵙⴰⵙⴰ ⵏ ⵡⴰⴽⴰⵍ ⴰⵏⴰⵎⵓⵔ ⴷ ⵜⵖⵓⵔⵔⵎⴰ ⴷ ⵜⵣⴷⴷⵓⵖⵜ ⴷ ⵜⵙⵔⵜⵉⵜ ⵏ ⵜⵖⵔⵎⵜ - ⵜⴰⵣⵓⵏⵉ ⵏ ⵓⵙⵎⵙⴰⵙⴰ ⵏ ⵡⴰⴽⴰⵍ ⴰⵏⴰⵎⵓⵔ ⴷ ⵜⵖⵓⵔⵔⵎⴰ, ⵉⵜⵜⵓⵙⵎⴰⵍ
- ⵎⴰⵙⵙ ⵎⵓⵃⵎⵎⴰⴷ ⵜⵉⴳⵔⴰⵜⵉⵏ Farouk;
- ⵎⴰⵙⵙ ⵙⴰⵄⵉⴷ ⵍⵀⴱⵉⵍ ⴰⵏⵎⵀⴰⵍ ⵏ ⵜⵏⵓⵔⴰⵢⵜ ⵜⵓⵖⵔⵉⵎ ⵏ ⵡⵊⴷⴰ ;
- ⵎⴰⵙⵙⴰ ⵉⴱⵜⵉⵙⴰⵎ ⵍⵃⴰⵎⵎⵓⵎⵉ, ⵜⴰⵏⵎⵀⴰⵍⵜ ⵏ ⵜⵏⵓⵔⴰⵢⵜ ⵜⵓⵖⵔⵉⵎⵜ ⵏ ⵜⵔⵓⴷⴰⵏⵜ-ⵜⵉⵣⵏⵉⵜ-ⵟⴰⵟⴰ
- ⴳ ⵜⵎⴰⵡⴰⵙⵜ ⵏ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵏⴼⵍⵓⵍ, ⵉⵜⵜⵓⵙⵎⴰⵍ
- ⵎⴰⵙⵙ ⵄⴱⴷⵔⵔⴰⵃⵉⵎ ⵅⴰⵍⵉⴷⵉ, ⴰⵏⵎⵀⴰⵍ ⵏ ⵜⵉⵏⵎⵍ ⵜⴰⵏⴰⵎⵓⵔⵜ ⵜⴰⵏⴰⴼⵍⵍⴰⵜ ⵏ ⵜⵥⵓⵕⵉ ⴷ ⴷⵉⵥⴰⵢⵏ ⵏ ⵜⴳⵎⵎⵉ ⵜⵓⵎⵍⵉⵍⵜ ;
- ⵎⴰⵙⵙ ⵄⴱⴷⵔⵔⴰⵃⵎⴰⵏ ⵏⵓⵏⵓⵃ, ⴰⵏⵎⵀⴰⵍ ⵏ ⵜⵉⵏⵎⵍ ⵜⴰⵏⴰⴼⵍⵍⴰⵜ ⵏ ⵜⴰⵜⵉⴽⵏⵓⵍⵓⵊⵉⵜ ⴳ ⵙⵍⴰ ;
- ⵎⴰⵙⵙⴰ ⵅⴰⴷⵉⵊⴰ ⵍⵃⴰⵔⵉⵔⵉ, ⵜⴰⵏⵎⵀⴰⵍⵜ ⵏ ⵜⵉⵏⵎⵍ ⵜⴰⵏⴰⴼⵍⵍⴰⵜ ⵏ ⵉⵙⵍⵎⴰⴷⵏ ⴳ ⵎⵔⵔⴰⴽⵛ.
