ⴰⴳⵔⴰⵡ ⵏ ⵓⵙⵇⵇⵉⵎ ⵏ ⵜⵏⴱⴰⴹⵜ ⴰⵙⵙ ⵏ ⵓⴽⵡⴰⵙ 2 ⵢⵓⵍⵢⵓⵣ 2026

• ⴳ ⵜⵣⵡⵉⵔⵉ ⵉⵙⵏⵜⵉ ⵓⵙⵇⵇⵉⵎ ⵏ ⵜⵏⴱⴰⴹⵜ ⵜⵉⵡⵓⵔⵉⵡⵉⵏ ⵏⵏⵙ ⵙ ⵓⵎⴹⴰⴽⴰⵕ ⴷ ⵓⵙⵖⵥⵏ ⴰⵙⵏⵜⵉ ⵏ ⵓⵙⵍⴳⵏ ⵓⵟⵟⵓⵏ 046.26 ⵉⵥⵍⵉⵏ ⵙ ⵓⵏⴳⵔⴰⵡ ⴰⵏⴰⵎⵓⵔ ⵏ ⵓⵙⵉⴹⵏ, ⵉⵙⵎⵏⵉⴷ ⵜ ⵎⴰⵙⵙ ⴰⵎⴰⵡⵙⴰⵙ ⵏ ⵓⴳⵯⵏⵙ.
  ⵉⵡⵜⵙ ⵓⵙⵍⴳⵏ ⴰⴷ ⵍⵍⵉ ⵉⴽⵛⵛⵎⵏ ⴳ ⵓⵙⴰⵜⵉ ⵏ ⵓⴹⴼⵓⵕ ⵏ ⵓⵙⵏⵙ ⵏ ⵉⵏⴰⴹⵏ ⵉⴳⵍⴷⴰⵏⵏ ⵢⴰⵜⵜⵓⵢⵏ, ⵙ ⵓⵎⴰⵜⴰ ⴰⴷ ⵉⵙⵔⵙ ⵢⴰⵏ ⵓⵙⴰⵜⵉ ⴰⵣⵔⴼⴰⵏ ⴰⵎⴰⵢⵏⵓ ⵉⵥⵍⵉⵏ ⵙ ⵓⵏⴳⵔⴰⵡ ⴰⵏⴰⵎⵓⵔ ⵏ ⵓⵙⵉⴹⵏ, ⵙ ⵓⵙⵡⵜⵜⵓ ⵏ ⵉⴼⵔⴷⵉⵙⵏ ⵏ ⵓⵏⴳⵔⴰⵡ ⴰⵏⴰⵎⵓⵔ ⵏ ⵓⵙⵉⴹⵏ ⴷ ⵜⵡⵓⵔⵉⵡⵉⵏ ⵏⵏⵙ ; ⴷ ⵉⵍⵓⴳⵏⵏ ⵏ ⵓⵙⵓⴷⵙ ⵏ ⵓⵏⴳⵔⴰⵡ ⴰⵏⴰⵎⵓⵔ ⵏ ⵓⵙⵉⴹⵏ ⴷ ⵉⵎⵏⵣⴰⵢⵏ ⵉⴷⵙⵍⴰⵏⵏ ⵏ ⵉⵙⵉⴹⵏⵏ ⵉⵎⴰⴷⴷⵓⴷⵏ.
  ⵎⴽⵍⵍⵉ ⵉⵜⵜⵓⵙⴽⴰⵔ ⵓⵙⵏⴼⴰⵕ ⵏ ⵓⵙⵍⴳⵏ ⴰⴷ ⴳ ⵜⵖⵔⴰⵙⵜ ⵏ ⵓⵙⵏⴼⵍⵓⵍ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵓⵏⵖⵎⵉⵙ ⴰⵙⵉⴹⵏⴰⵏ, ⴰⵛⴽⵓ ⵉⴳⴰ ⵢⴰⵜ ⵜⵙⵇⵇⵉⵎⵜ ⵏ ⵓⵙⴳⴳⴰⴷ ⵉⵟⵟⴰⴼⵏ ⴰⵡⴷⵎ ⴰⵏⴰⵡⴰⵢ ⴷ ⵜⵉⵎⴰⵏⵉⵜ ⵜⴰⵥⵕⴼⴰⵏⵜ, ⴰⵔ ⵜⵜⴰⵙⵉ ⵜⴰⵎⴰⵙⴰⵢⵜ ⵙ ⵡⵓⴷⵎ ⵉⵥⵍⵉⵏ, ⴰⴷ ⵜⴹⵓⴼ ⴰⵣⵔⴰⴽ ⵏ ⵉⵎⵏⵣⴰⵢⵏ ⵉⴷⵙⵍⴰⵏⵏ ⵏ ⵉⵙⵉⴹⵏⵏ ⵉⵎⴰⴷⴷⵓⴷⵏ, ⴷ ⵜⵡⵓⵔⵉ ⵉⵖⵓⴷⴰⵏ ⵏ ⵓⵏⴳⵔⴰⵡ ⴰⵏⴰⵎⵓⵔ ⵏ ⵓⵙⵉⴹⵏ, ⴷ ⵓⵙⴼⴰⵍⴽⵢ ⵏ ⵜⵖⴰⵔⴰ ⵏ ⵜⵡⵓⵔⵉ ⵏⵏⵙ, ⵉⵎⵙⴰⵙⴰⵏ ⴷ ⵉⴹⵕⵉⵚⵏ ⵏ ⵓⵎⵏⵏⵉ 159 ⵙⴳ ⵓⴷⵓⵙⵜⵓⵔ.
• ⴹⴰⵕⴰⵜ ⵏ ⵎⴰⵢⴰⴷ, ⵉⵎⴹⴰⴽⴰⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⵉⵙⵖⵥⵏ ⴰⵙⵏⵜⵉ ⵏ ⵓⵙⵍⴳⵏ ⵓⵟⵟⵓⵏ 047.26 ⵉⵥⵍⵉⵏ ⵙ ⵜⵎⵓⵔⴰⵢⵜ ⵜⴰⵏⴰⴼⵍⵍⴰⵜ ⵏ ⵓⵙⵖⵉⵡⵙ, ⵉⵙⵎⵏⵉⴷ ⵜ ⴰⵡⴷ ⵏⵜⵜⴰ ⵎⴰⵙⵙ ⴰⵎⴰⵡⵙⴰⵙ ⵏ ⵓⴳⵯⵏⵙ.
  ⵉⵡⵜⵙ ⵓⵙⵏⴼⴰⵕ ⵏ ⵓⵙⵍⴳⵏ ⴰⴷ ⴰⴷ ⵉⵙⵖⵥⵏ ⵢⴰⵏ ⵓⵙⴳⴳⴷ ⴰⴷⵙⵍⴰⵏ ⵉ ⵜⵎⵙⵜⴳⴳⴰⵔⵜ ⵜⴰⵏⴰⴼⵍⵍⴰⵜ ⵏ ⵓⵙⵖⵉⵡⵙ, ⵙ ⵓⵙⵏⴼⵍ ⵏ ⵜⵎⵙⵜⴳⴳⴰⵔⵜ ⵜⴰⵏⴰⴼⵍⵍⴰⵜ ⵏ ⵓⵙⵖⵉⵡⵙ, ⵖⵔ ⵢⴰⵜ ⵜⵙⵇⵇⵉⵎⵜ ⵏ ⵜⵏⴱⴰⴹⵜ ⵉⵖⵓⴷⴰⵏ, ⵙ ⵎⴰ ⵉⵎⵙⴰⵙⴰⵏ ⴷ ⵉⴹⵕⵉⵚⵏ ⵏ ⵓⵎⵏⵏⵉ 159 ⵙⴳ ⵓⴷⵓⵙⵜⵓⵔ, ⵜⵟⵟⴰⴼ ⴰⵡⴷⵎ ⴰⵏⴰⵡⴰⵢ ⴷ ⵜⵉⵎⴰⵏⵉⵜ ⵜⴰⵎⵙⵙⵓⴳⵓⵔⵜ ⴷ ⵜⵥⵕⴼⴰⵏⵜ, ⴰⵔ ⵜⵜⴰⵙⵉ ⵜⴰⵎⴰⵙⴰⵢⵜ ⵙ ⵓⴳⴳⴰⵔ ⵏ ⵜⵡⵓⵔⵉⵡⵉⵏ ⵏ ⵓⴼⴰⵔⵙ ⴷ ⵓⵙⴼⵙⵔ ⵏ ⵓⵏⵖⵎⵉⵙ ⴰⵙⵉⴹⵏⴰⵏ ⴷ ⵓⵙⵓⵊⴷ ⵏ ⵉⵎⴹⴰⵏⵏ ⵉⵏⴰⵎⵓⵔⵏ ⴷ ⵉⵏⵎⵏⴰⴹⵏ ⴷ ⵉⵢⴰⴼⵓⵜⵏ, ⴰⴷ ⵜⵙⴽⵔ ⵜⵉⵡⵓⵔⵉⵡⵉⵏ ⵜⵉⵎⴰⵢⵏⵓⵜⵉⵏ ⵉⴳⴰⵏ ⴰⵙⵏⴰⵍ ⵏ ⵓⵙⵎⵙⴰⵙⴰ ⴰⵙⵜⵔⴰⵜⵉⵊⵉ ⵏ ⵜⵙⵔⵜⵉⵜⵉⵏ ⵏ ⵜⵏⴼⴰⵍⵉⵜ ⵙ ⵎⴰ ⵉⵎⵙⴰⵙⴰⵏ ⴷ ⵓⴷⵎⴰⵡ ⵏ ⵜⵏⴼⴰⵍⵉⵜ ⴰⵎⴰⵢⵏⵓ, ⵙ ⵓⵙⵏⵙ ⵏ ⵉⵙⴰⵖⵓⵍⵏ ⵉⵜⵜⵓⵙⵡⵓⵜⵜⵓⵏ, ⴷ ⵉⵎⴰⵙⵙⵏ ⵉⵎⴰⵢⵏⵓⵜⵏ ⵏ ⵓⴹⴼⵓⵕ ⴷ ⵓⵙⵉⵜⴳ, ⵙ ⵓⵙⵉ ⵏ ⵓⵙⵡⵉⵔ ⴰⵏⵎⵏⴰⴹ ⴷ ⵡⴰⴽⴰⵍⴰⵏ ⴳ ⵓⵙⴰⵜⵉ ⵏ ⵜⵡⵓⵔⵉⵡⵉⵏ ⵏⵏⴰ ⴰⵙ ⵉⵜⵜⵓⴼⴽⴰⵏ.
• ⵉⵣⵔⵉ ⵓⵙⵇⵇⵉⵎ ⵏ ⵜⵏⴱⴰⴹⵜ ⵖⵔ ⵓⵎⴹⴰⴽⴰⵕ ⴷ ⵓⵙⵖⵥⵏ ⴰⵙⵏⵜⵉ ⵏ ⵓⵙⵍⴳⵏ ⵓⵟⵟⵓⵏ 051.26 ⵉⵥⵍⵉⵏ ⵙ ⵓⵙⵓⴷⵙ ⵏ ⵜⵡⵓⵔⵉ ⵏ ⵍⵄⴷⵓⵍ, ⵉⵙⵎⵏⵉⴷ ⵜ ⵎⴰⵙⵙ ⴰⵎⴰⵡⵙⴰⵙ ⵏ ⵜⵣⵔⴼⵜ.
  ⵉⵡⵜⵙ ⵓⵙⵏⴼⴰⵕ ⵏ ⵓⵙⵍⴳⵏ ⴰⴷ ⴰⴷ ⵉⵙⵜⵜⴼ ⵉⵢⴰⴼⵓⵜⵏ ⵉⵣⵔⴼⴰⵏⵏ ⵉⴹⴼⵕⵏ ⴰⵖⵜⵜⴰⵙ ⵏ ⵜⵙⵏⴱⴹⴰⵢⵜ ⵜⴰⴷⵓⵙⵜⵓⵔⵉⵜ ⵅⴼ ⵓⵙⵍⴳⵏ ⵓⵟⵟⵓⵏ 16.22 ⵉⵥⵍⵉⵏ ⵙ ⵓⵙⵓⴷⵙ ⵏ ⵜⵡⵓⵔⵉ ⵍⵄⴷⵓⵍ, ⵉⵎⵙⴰⵙⴰⵏ ⴷ ⵉⴹⵕⵉⵚⵏ ⵏ ⵓⵎⵏⵏⵉ 134 ⵙⴳ ⵓⴷⵓⵙⵜⵓⵔ.
   

ⵉⴽⵎⵎⵍ ⵓⵙⵇⵇⵉⵎ ⵏ ⵜⵏⴱⴰⴹⵜ ⵜⵉⵡⵓⵔⵉⵡⵉⵏ ⵏⵏⵙ ⵙ ⵓⵙⵖⵎⵙ ⵏ ⵢⴰⵜ ⵜⵎⵢⴰⵇⵇⴰⵏⵜ ⴳⵔ ⵜⵏⴱⴰⴹⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⵏⴱⴰⴹⵜ ⵏ ⵜⴳⴷⵓⴷⴰ ⵏ ⵎⵉⵚⵕ ⵜⴰⵄⵕⴰⴱⵜ ⴳ ⵢⵉⴳⵔ ⴰⴷⵉⵡⴰⵏⴰⵏ, ⵉⵜⵜⵓⵙⴳⵎⴹⵏ ⴳ ⵍⵇⴰⵀⵉⵕⴰ ⴳ 6 ⵉⴱⵔⵉⵔ 2026, ⴷ ⵓⵙⵏⴼⴰⵕ ⵏ ⵓⵙⵍⴳⵏ ⵓⵟⵟⵓⵏ 37.26 ⵉⵙⵖⵥⵏⵏ ⵅⴼ ⵜⵎⵢⴰⵇⵇⴰⵏⵜ ⴰⴷ, ⵉⵙⵎⵏⵉⴷ ⵜⵏ ⵎⴰⵙⵙ ⴰⵎⴰⵡⵙⴰⵙ ⵏ ⵜⵎⴳⵓⵔⵉ ⴷ ⵜⵙⴱⴱⴰⴱⵜ, ⴳ ⵓⵏⵙⴰ ⵏ ⵎⴰⵙⵙ ⴰⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⵉⴱⵉⵢⵏ ⵣⴷⵖⵏⵉⵏ ⴳ ⴱⵕⵕⴰ.

ⵉⵙⵎⴷ ⵓⵙⵇⵇⵉⵎ ⵏ ⵜⵏⴱⴰⴹⵜ ⵜⵉⵡⵓⵔⵉⵡⵉⵏ ⵏⵏⵙ ⵙ ⵓⵎⴹⴰⴽⴰⵕ ⴷ ⵓⵙⵖⵥⵏ ⵅⴼ ⵉⵙⵓⵎⴰⵔ ⵏ ⵓⵙⵜⴰⵢ ⴳ ⵉⵏⵙⴰⵏ ⵢⴰⵜⵜⵓⵢⵏ ⵉⵎⵙⴰⵙⴰⵏ ⴷ ⵓⵎⵏⵏⵉ 92 ⵙⴳ ⵓⴷⵓⵙⵜⵓⵔ.

• ⵉⵜⵜⵓⵙⴽⴰⵔ ⴳ ⵓⵙⵡⵉⵔ ⵏ ⵜⵎⴰⵡⴰⵙⵜ ⵏ ⵓⵙⵉⴷⴼ ⴰⴷⵎⵙⴰⵏ ⴷ ⵜⵎⵙⵙⵏⵜⵉⵜ ⵉⵎⵥⵥⵉⵢⵏ ⴷ ⵜⵡⵓⵔⵉ ⴷ ⵜⵙⵓⴳⴰⵔ, ⵉⵜⵜⵓⵙⵏⵎⴰⵍⴰ :
  • ⵎⴰⵙⵙ ⵢⴰⵃⵢⴰ ⵄⵓⴽⴰⵛ, ⴰⵏⵎⵀⴰⵍ ⵏ ⵓⵙⵡⵓⵔⵉ ;
• ⴳ ⵓⵙⵡⵉⵔ ⵏ ⵜⵎⴰⵡⴰⵙⵜ ⵉⵜⵜⵓⵙⵎⴰⴳⵍⵏ ⴷⴰⵔ ⵓⵏⵙⵙⵓⵎⵏⵏⵉ ⵏ ⵜⵏⴱⴰⴹⵜ ⵉⵜⵜⵓⵙⵎⴰⴳⵍⵏ ⵙ ⵓⵎⴰⵜⵜⵉ ⴰⵎⵓⵟⵟⵓⵏ ⴷ ⵓⵙⴳⴳⴷ ⵏ ⵜⵎⵙⵙⵓⴳⵓⵔⵜ, ⵉⵜⵜⵓⵙⵏⵎⴰⵍⴰ :
  • ⵎⴰⵙⵙ ⵎⵓⵃⵎⵎⴰⴷ ⴰⵎⵉⵏ ⵍⴰⵃⵔⵛ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵓⵎⴰⵜⵜⵉ ⴰⵎⵓⵟⵟⵓⵏ.