ⵉⵙⵏⵓⴱⴳ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵢⴰⵜ ⵜⵔⴰⴱⴱⵓⵜ ⵜⴰⴱⵕⵍⴰⵎⴰⵏⵉⵜ ⵏ ⴼⵕⴰⵏⵙⴰ ⵙ ⵜⵉⵎⵎⵓⵖⵔⴰ ⵏ ⵜⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ
ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⴰⵙⵙ ⵏ ⵓⴽⵡⴰⵙ 29 ⵉⵏⵏⴰⵢⵔ 2026 ⴳ ⵕⵕⴱⴰⵟ, ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵜⴰⴼⵔⴰⵏⵙⵉⵙⵜ, ⵎⴰⵙⵙⴰ ⵢⴰⵢⵉⵍ ⴱⵔⵓⵏ-ⴱⵉⴼⵉ (Yaël Braun-Pivet), ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴰⴼⵔⴰⵏⵙⵉⵙ, ⵎⴰⵙⵙ ⵊⵉⵔⴰⵔ ⵍⴰⵔⵛⵉ (Gérard Larcher), ⵍⵍⵉ ⵉⵙⴽⵔⵏ ⵢⴰⵜ ⵜⵔⵣⵣⵉⴼⵜ ⵜⴰⵎⴰⴷⴷⵓⴷⵜ ⵉ ⵜⴳⵍⴷⵉⵜ ⴷ ⵢⴰⵏ ⵜⵔⴰⴱⴱⵓⵜ ⵜⴰⴱⵔⵍⴰⵎⴰⵏⵉⵜ ⵉⵛⵛⴰⵔⵏ, ⵃⵎⴰ ⴰⴷ ⴷⵔⵓⵏ ⴳ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⵉⵙⵙ ⵙⵎⵎⵓⵙⵜ ⵏ ⵓⵙⴳⵔⴰⵡ ⴰⴱⵔⵍⴰⵎⴰⵏⵉ ⴰⵎⵖⵔⵉⴱⵉ-ⴰⴼⵔⴰⵏⵙⵉⵙ ⵍⵍⵉ ⵔⴰⴷ ⵉⵜⵜⵓⵙⴽⵉⵔ ⴳ ⵡⵓⵙⵙⴰⵏ ⵏ 29 ⴷ 30 ⵉⵏⵏⴰⵢⵔ ⴰⴷ ⴳ ⵕⵕⴱⴰⵟ, ⴳ ⵓⵙⴰⵜⵉ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⵏⴳⵔ ⵜⵎⵔⵙⴰⵍ ⵜⵉⵣⵔⴼⴰⵏⵉⵏ ⴳ ⵜⵎⵉⵣⴰⵔ ⵙ ⵙⵏⴰⵜ, ⴷ ⵓⵙⴷⵔⴼⵉ ⵏ ⵜⵣⴷⴰⵢⵉⵏ ⵏ ⵜⴷⴷⵓⴽⴽⵯⵍⴰ ⴷ ⵓⵎⵢⴰⵡⴰⵙ ⴰⵙⵉⵏⵔⴰⵏ.
ⵃⴰⴹⵕⵏ ⴳ ⵓⵏⵎⵓⵇⵇⴰⵔ ⴰⴷ : ⵎⴰⵙⵙ ⴰⵎⴰⵡⵙⴰⵙ ⵏ ⵓⵇⵡⵡⵓⵎ ⴷ ⵡⴰⵎⴰⵏ, ⵎⴰⵙⵙ ⵏⵉⵣⴰⵔ ⴱⴰⵔⴰⴽⴰ, ⴷ ⵓⵎⴰⵡⵙⴰⵙ ⵏ ⵜⵄⵄⵓⵔⵎⴰ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ, ⵎⴰⵙⵙ ⵎⵓⵃⵎⵎⴰⴷ ⵍⵎⵀⴷⵉ ⴱⵏⵙⵄⵉⴷ, ⴷ ⵓⵎⴰⵡⵙⴰⵙ ⴰⵎⴰⵔⵉ ⵉⵥⵍⵉⵏ ⵙ ⵜⵣⴷⴰⵢⵉⵏ ⴷ ⵓⴱⵕⵍⴰⵎⴰⵏ, ⴰⵎⵙⵉⵡⵍ ⵙ ⵢⵉⵙⵎ ⵏ ⵜⵏⴱⴰⴹⵜ, ⵎⴰⵙⵙ ⵎⵓⵚⵟⴰⴼⴰ ⴱⴰⵢⵜⴰⵙ, ⴷ ⵓⵎⵙⵇⴰⴷ ⵏ ⴼⵔⴰⵏⵙⴰ ⴳ ⵍⵎⵖⵔⵉⴱ ⵎⴰⵙⵙ ⴽⵔⵉⵙⵜⵓⴼ ⵍⵓⴽⵓⵔⵜⵢⵉ.
ⴳ ⵓⵙⵏⵜⵉ ⵏ ⵓⵏⵎⵓⵇⵇⴰⵔ, ⵙⵎⵖⵔⵏ ⵉⵏⵎⵖⵓⵔⵏ ⵙ ⵜⵣⴷⴰⵢⵉⵏ ⵏ ⵜⴷⴷⵓⴽⴽⵯⵍⴰ ⵜⵓⵥⵍⴰⵢⵜ ⴷ ⵜⵣⴰⵢⴽⵓⵜ ⵍⵍⵉ ⵉⵣⴷⵉⵏ ⵜⴰⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⴷⵓⴷⴰⵏⵜ ⵏ ⴼⵕⴰⵏⵙⴰ, ⵍⵍⵉ ⵉⵙⵏⴼⵍⵏ ⴳ ⴽⵟⵓⴱⵕ 2024, ⵙ ⵓⵙⴳⵎⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ ⴷ ⵓⵏⵙⵙⵉⵅⴼ ⵏ ⵜⴳⴷⵓⴷⴰⵏⵜ ⵜⴰⴼⵔⴰⵏⵙⵉⵙⵜ, ⵎⴰⵙⵙ ⵉⵎⴰⵏⵓⵢⵉⵍ ⵎⴰⴽⵔⵓⵏ, ⴼ ⴰⵙⵉⵡⴹ ⵉⵥⵍⵉⵏ ⵙ "ⵜⵎⴷⵔⴰⵡⵜ ⵜⵓⵥⵍⴰⵢⵜ ⵉⴷⵓⵙⵏ", ⴷ ⵜⵙⵙⵉⵅⴼⵜ ⵏⵏⵙⵏ ⵉ ⵜⴼⵓⴳⵍⴰ ⵏ ⵓⵙⴳⵎⴹ ⵏ ⵜⵎⵢⴰⵇⵇⴰⵏⵉⵏ ⵏ ⵓⵙⵙⴰⵔⵓ ⵙ ⵡⴰⵜⵉⴳ ⵏ 10 ⵎⵍⵢⴰⵕ ⵏ ⵢⵓⵕⵓ, ⵉⵥⵍⵉⵏ ⵙ ⵎⵏⵏⴰⵡ ⵏ ⵉⴳⵔⴰⵏ ⵉⵙⵜⵔⴰⵜⵉⵊⵉⵢⵏ.
ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙ ⵜⵥⵉⵍ ⵜⵓⵙⵏⵜ ⵏ ⵜⴳⴷⵓⴷⴰⵏⵜ ⵜⴰⴼⵔⴰⵏⵙⵉⵙⵜ ⵙ ⵜⴳⵍⴷⴰ ⵏ ⵜⴳⵍⴷⵉⵜ ⴼ ⵜⵏⵣⵔⵓⴼⵜ ⵜⴰⵎⵖⵔⵉⴱⵉⵜ, ⴷ ⵜⵎⵢⴰⴹⴼⴰ ⵏ ⵜⵔⵣⵣⵉⴼⵉⵏ ⵏ ⵉⵎⵙⵜⴳⴳⴰⵔⵏ ⵉⴼⵔⴰⵏⵙⵉⵙⵏ ⵉ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ, ⴰⵔ ⵉⵎⴰⵍ ⴰⴷⴼⵔⵉⵔ ⵏ ⴼⵔⴰⵏⵙⴰ ⵉ ⵜⵡⵓⵔⵉ ⵏ ⵓⵙⵏⴱⴹ ⴰⵢⵎⴰⵏ ⴳ ⵓⵙⴰⵜⵉ ⵏ ⵜⵎⵢⴰⵏⵜ ⵜⴰⴽⴰⵍⴰⵏⵜ ⵜⴰⵎⵖⵔⵉⴱⵉⵜ, ⴰⵎ ⵓⵙⵉⵍⵓ ⴰⵢⵡⴰⵏ ⵉ ⵓⴼⵙⵙⴰⵢ ⵏ ⵓⵎⵏⴰⵣⴰⵖ ⴰⴷ ⴰⵏⵎⵏⴰⴹ. ⴰⵔ ⵉⵙⵔⵓⵙ ⴰⵡⴷ ⵢⴰⵏ ⵓⵎⵏⴰⴷ ⴰⵎⴰⵢⵏⵓ ⵉ ⵓⵎⵢⴰⵡⴰⵙ ⴷ ⵓⵣⴷⴷⵓⵢ ⴼ ⵜⵖⴰⵡⵙⵉⵡⵉⵏ ⵜⵉⵏⵎⵏⴰⴹⵉⵏ ⴷ ⵜⵉⴳⵔⴰⵖⵍⴰⵏⵉⵏ, ⴷ ⵓⵙⴷⵓⵙ ⵏ ⵜⵎⴷⵔⴰⵡⵜ ⵜⴰⴷⴰⵎⵙⴰⵏⵜ ⵏⴳⵔ ⵜⵎⵉⵣⴰⵔ ⵙ ⵙⵏⴰⵜ.
ⵉⴳⴰ ⵓⵏⵎⵓⵇⵇⴰⵔ ⴰⴷ ⵢⴰⵜ ⵜⵎⵍⴷⴰ ⵉ ⵓⵙⵎⵍ ⴼ ⵜⴰⵡⵓⵔⵉ ⵏ ⵓⵙⵏⵎⴰⵍⴰ ⵏ ⵓⵙⴳⵔⴰⵡ ⴰⴱⴰⵕⵍⴰⵎⴰⵏⵉ ⴰⵎⵖⵔⵉⴱⵉ-ⴰⴼⵔⴰⵏⵙⵉⵙ ⴷ ⵢⴰⵏ ⵓⵙⴰⵢⵔⴰⵔ ⴰⵙⵜⵔⴰⵜⵉⵊⵉ ⵉ ⵓⵎⵙⴰⵡⴰⵍ ⴷ ⵓⵎⵛⵛⴰⵡⴰⵕ, ⴷ ⵓⵎⵔⴰⵔⴰ ⵏ ⵜⴰⵏⵏⴰⵢⵉⵏ ⵏ ⵏⴳⵔ ⵉⴱⵕⵍⴰⵎⴰⵏⵉⵢⵏ ⵉⵎⵖⵔⵉⴱⵉⵢⵏ ⴷ ⵉⴼⵔⴰⵏⵙⵉⵙⵏ, ⵎⵉ ⵉⴳⴰ ⵓⵡⵜⵜⴰⵙ ⵏ ⴰⵣⴷⴷⵓⵢ ⵏ ⵜⴰⵏⵏⴰⵢⵉⵏ ⴷ ⵓⵙⵎⵎⵙⵍⵙ ⴼ ⵜⵖⴰⵡⵙⵉⵡⵉⵏ ⵉⵛⵛⴰⵔⵏ.
