ⵉⵙⵙⵉⵅⴼ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵢⴰⵏ ⵓⴳⵔⴰⵡ ⵏ ⵓⴹⴼⵓⵕ ⵏ ⵓⵙⴳⴳⵯⵣ ⵏ ⵓⵙⴳⴳⴷ ⵏ ⵓⵏⴳⵔⴰⵡ ⵏ ⵓⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵉⵙⵍⵍⵡⵉ

ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⴰⵙⵙ ⵏ ⵓⴽⵕⴰⵙ 11 ⵎⴰⵕⵚ 2026 ⴳ ⵕⵕⴱⴰⵟ, ⵢⴰⵏ ⵓⴳⵔⴰⵡ ⵏ ⵓⴹⴼⵓⵕ ⵏ ⵓⵙⴳⴳⵯⵣ ⵏ ⵓⵙⴳⴳⴷ ⵏ ⵓⵏⴳⵔⴰⵡ ⵏ ⵓⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵉⵙⵍⵍⵡⵉ. ⵉⵥⵍⵉ ⵓⴳⵔⴰⵡ ⴰⴷ ⵙ ⵓⴱⴷⴷⵉ ⵅⴼ ⵜⵎⴰⵜⴰⵔⵉⵏ ⵏ ⵓⵙⵎⵓⵜⵜⴳ ⵉⵜⵜⵓⴳⴰⵏ ⴷ ⵓⵙⴰⵡⵍ ⵅⴼ ⵉⵙⵏⴼⴰⵕⵏ ⵉⵎⵙⴽⵉⵍⵏ ⵉⵎⴰⵍⴰⵏⵏ, ⵎⴰⵢⴰⴷ ⴳ ⵓⵙⴰⵜⵉ ⵏ ⵜⵓⴳⴳⴰⵙ ⵉ ⵜⵓⵚⴽⴰ ⵏ ⵜⵙⴷⴰⵡⵉⵜ ⵜⴰⵏⴰⵎⵓⵔⵜ ⵜⴰⵎⵣⵡⴰⵔⵓⵜ ⵉⵎⵙⴰⵙⵏ ⴰⴽⴷ ⵜⵏⵎⵍⴰⴷⵉⵏ ⵜⵉⴳⵍⴷⴰⵏⵉⵏ ⵜⵉⵏⴰⴼⵍⴰⵢⵉⵏ.
ⴳ ⵓⵙⵏⵜⵉ ⵏ ⵓⴳⵔⴰⵡ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙ ⴷ ⴰⵙⴳⴳⴷ ⵏ ⵓⵏⴳⵔⴰⵡ ⵏ ⵓⵙⵍⵎⴷ ⴰⵏⴰⴼⵍⴰⵢ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵉⵙⵍⵍⵡⵉ ⵉⵎⵙⴰⵙⵏ ⴰⴽⴷ  ⵜⵏⵎⵍⴰⴷⵉⵏ ⵜⵉⴳⵍⴷⴰⵏⵉⵏ ⵜⵉⵏⴰⴼⵍⴰⵢⵉⵏ. ⵉⴳⴰ ⵢⴰⵜ ⵜⴼⵍⴰⵙⵜ ⵏ ⵜⵏⴱⴰⴹⵜ ⵉⵥⵍⵉⵏ ⵙ ⵜⵉⵍⴰⵍⵜ ⵏⵏⵙ ⵜⴰⵅⴰⵜⴰⵔⵜ ⴳ ⵓⵙⵖⵓⴷⵓ ⵏ ⵜⴰⵖⴰⵔⴰ ⵏ  ⵓⵔⴰⵙⵎⴰⵍ ⴰⵏⴼⴳⴰⵏ ⴳ ⵓⵙⵡⵉⵔ ⵏ ⵎⵏⵏⴰⵡ ⵢⵉⴳⵔⴰⵏ ⵉⵏⵎⵓⵔⴰⵏ, ⵍⵍⵉ ⵉⴳⴰⵏ ⵢⴰⵏ ⵙⴳ ⵉⵎⵉⵙⵙⵏ ⵏ ⵜⴳⵎⵉ ⵜⴰⵎⴰⵜⴰⵢⵜ ⴳ ⵜⵎⵓⵔⵜ ⵏⵏⵖ.
ⴳ ⵓⵙⵔⵙ ⵏ ⵓⵙⴳⴳⴷ ⴰⴷ, ⵉⵙⴷⴷⵉⴷ ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⵎⴰⵙ ⵜⵙⵙⵉⵎⵖⵓⵔ ⵜⵏⴱⴰⴹⵜ ⵜⴰⵎⵉⵣⴰⵏⵉⵢⵜ ⵜⴰⵎⴰⵜⴰⵢⵜ ⵏ ⵜⵎⴰⵡⴰⵙⵜ ⵙ ⵓⵙⵖⵍ ⵏ 30% ⵙⴳ 2021 ⴰⵔ 2025, ⵎⴰⵢⴰⴷ ⵢⵓⵊⵊⴰⵏ ⴰⵙⵉⵎⵖⵓⵔ ⵏ ⵡⵓⵟⵟⵓⵏ ⵏ ⵉⴽⴰⴷⵉⵔⵏ ⵉⴱⵉⴷⴰⵖⵓⵊⵉⵢⵏ ⴷ ⵉⴽⴰⴷⵉⵔⵏ ⵉⵎⵙⵙⵓⴳⵓⵔⵏ ⴷ ⵉⵜⵉⵇⵏⵉⵢⵏ ⴷ ⵓⵙⵖⵓⴷⵓ ⵏ ⵡⴰⴷⴷⴰⴷ ⵏⵏⵙⵏ ⴰⵏⴰⵎⵓⵏ, ⴷ ⵓⵙⴼⴰⵍⴽⵉ ⵏ ⵓⴽⵛⵛⵓⵎ ⵖⵔ ⵜⵙⴷⴰⵡⵉⵢⵉⵏ ⴷ ⵓⵙⴷⵓⵙ ⵏ ⵜⵣⵎⵔⵜ ⵏⵏⵙⵏⵜ ⵏ ⵓⵙⵏⵓⴱⴳ.
ⵉⵜⵜⵓⵙⴽⴰⵔ ⵓⴱⴷⴷⵉ ⴳ ⵓⴳⵔⴰⵡ ⵅⴼ ⵉⵙⵏⴼⴰⵕⵏ ⵉⵎⵙⴽⵉⵍⵏ ⵉⵎⴰⵍⴰⵏⵏ, ⵙⵍⴰⵡⴰⵏ ⴰⴽⴽⵯ ⵎⴰ ⵉⵣⴷⵉⵏ ⵙ ⵓⵙⵎⴰⵇⵇⵍ ⵏ ⵜⴽⴰⵕⴹⴰ ⵜⴰⵙⴷⴰⵡⴰⵏⵜ ⴰⴼⴰⴷ ⴰⴷ ⵜⵉⵍⵉ ⵜⵣⵔⴼⵜ ⵜⴰⵏⵙⴰⵡⴰⵏⵜ. ⵢⵉⵍⵉ ⴰⵡⴷ ⵓⵙⵎⵏⵉⴷ ⵏ ⵓⵙⵏⴼⴰⵕ ⵏ ⵓⵙⴽⴽⵉⵔ ⵏ ⵜⵖⵉⵡⴰⵏⵜ ⵏ ⵜⵙⵏⵉⵊⵊⵉⵜ ⴷ ⵜⵙⴰⵙⴼⵔⵜ ⴷ ⵜⵙⵏⵉⵊⵊⵉⵜ ⵏ ⵜⵓⵖⵎⴰⵙ ⴳ ⵇⵏⵉⵟⵕⴰ, ⵎⴰⵢⴰⴷ ⵉⵡⵜⵜⴰⵙ ⵓⵙⴷⵓⵙ ⵏ ⵓⵙⵎⵏⵉⴷ ⵏ ⵓⵙⵎⵓⵜⵜⴳ ⴳ ⵓⵙⵡⵉⵔ ⵏ ⵜⵎⵏⴰⴹⵜ ⴷ ⵜⴷⵔⴰⵡⵜ ⴳ ⵓⵙⵉⴷⵔⵓⵙ ⵏ ⵓⵥⴰⵢⵥ ⵍⵍⵉ ⵜⵙⵙⵏ ⵜⵖⵉⵡⴰⵏⵜ ⵏ ⵜⵙⵏⵉⵊⵊⵉⵜ ⴷ ⵜⵙⴰⵙⴼⵔⵜ ⴳ ⵕⵕⴱⴰⵟ.
ⵉⵍⵍⴰ ⴰⵡⴷ ⵓⵎⴹⴰⴽⴰⵕ ⵅⴼ ⵓⵙⴷⵓⵙ ⵏ ⵓⵣⴷⴷⵓⵖ ⴰⵙⴷⴰⵡⴰⵏ ⵙ ⵓⵙⴱⵓⵖⵍⵓ ⵏ ⵢⴰⵏ ⵡⴰⵎⵓⴷ ⴰⵎⴰⵢⵏⵓ ⵉ ⵜⵓⵚⴽⴰ ⴷ ⵓⵙⵉⵍⵉ ⵏ ⵜⵣⴷⴷⵓⵖⵉⵏ ⵜⵉⵙⴷⴰⵡⴰⵏⵉⵏ ⴳ ⵓⵙⴰⵜⵉ ⵏ ⵜⴷⵔⴰⵡⵜ ⴳⵔ ⵢⵉⴳⵔ ⴰⵎⴰⵜⴰⵢ ⴷ ⵓⵙⵍⵉⴳ, ⵍⵍⵉⵖ ⵜⵜⵓⵙⵏⵜⴰⵏ 5 ⵏ ⵉⵙⵏⴼⴰⵕⵏ ⴳ 5 ⵏ ⵜⵎⴷⵉⵏⵉⵏ ⵜⵉⵙⴷⴰⵡⴰⵏⵉⵏ (ⴰⴳⴰⴷⵉⵔ, ⵊⵊⴷⵉⴷⴰ, ⵡⵊⴷⴰ, ⵏⵏⴰⴹⵓⵕ ⴷ ⴱⵏⵉ ⵎⵍⵍⴰⵍ), ⵙ ⵜⵣⵎⵔⵜ ⵏ ⵓⵣⴷⴷⵓⵖ ⵉⵡⴹⵏ 11 ⵉⴼⴹ ⵏ ⵜⵙⵢⵓⵜ, ⴳ ⵉⵎⵏⵉⴷⵏ ⵏ ⵓⵙⵏⵜⵉ ⵏ ⵜⵔⴽⴽⵎⵜ ⵜⵉⵙⵙ ⵙⵏⴰⵜ ⵏ ⵉⵙⵏⴼⴰⵕⵏ ⵏ ⵓⵣⴷⴷⵓⵖ ⴰⵙⴷⴰⵡⴰⵏ ⴳ ⵡⴰⵢⵢⵓⵔ ⵏ ⵉⴱⵔⵉⵔ ⴷ ⵢⵓⵛⴽⴰⵏ, ⵙ ⵜⵣⵎⵔⵜ ⵏ ⵓⵙⵏⵓⴱⴳ ⵔⴰⴷ ⵢⴰⵡⴹ 100 ⵉⴼⴹ ⵏ ⵜⵙⵢⵓⵜ.
ⵉⵜⵜⵓⵣⵎⵎⴻⵎ ⴳ ⵓⴳⵔⴰⵡ ⴰⴷ ⴰⵡⴷ ⵎⵏⵏⴰⵡⵜ ⵜⵎⴰⵜⴰⵔⵉⵏ ⵍⵍⵉ ⵉⵎⵎⴰⵍⵏ ⴰⵙⴱⵓⵖⵍⵓ ⵏ ⵓⵙⵎⵏⵉⴷ ⴰⵙⴷⴰⵡⴰⵏ ⴷ ⵓⵙⵉⵡⵙ ⵏ ⵓⵙⵏⵓⴱⴳ ⵏⵏⵙ, ⵍⵍⵉⵖ ⵉⵎⵖⵓⵔ ⵡⵓⵟⵟⵓⵏ ⴰⵎⴰⵜⴰⵢ ⵏ ⵉⵎⵃⴹⴰⵕⵏ ⵎⵇⴰⵕⵏⴰ ⴷ ⵢⵉⵎⵉⵔ ⴰⵙⴷⴰⵡⴰⵏ ⵉⵣⵔⵉⵏ ⵙ 4,8% ⵍⵍⵉⵖ ⵉⵣⵔⵉ ⵡⵓⵟⵟⵓⵏ ⵏⵏⵙⵏ 1,3 ⵎⵍⵢⵓⵏ ⵏ ⵓⵎⵃⴹⴰⵕ. ⴳ ⵓⴳⵣⵣⵓⵎ ⵉⵣⴷⵉⵏ ⵙ ⵜⵏⴱⴰⴹⵉⵜ, ⴱⵉⴷⴷⵏ ⴰⵡⴷ ⴳ ⵓⴳⵔⴰⵡ ⵅⴼ ⵓⴹⴼⵓⵕ ⵏ ⵓⵙⴰⴽⴰ ⵏ ⵓⵎⵙⴰⵙⴰ ⵏ ⵜⴳⵔⵓⵎⵎⴰ ⵜⴰⵙⵍⴳⴰⵏⵜ ⴷ ⵉⴹⵕⵉⵚⵏ ⵏ ⵓⵙⵍⴳⵏ ⴰⵙⴰⵜⵉ ⵓⵟⵟⵓⵏ 51.17 ⴷ ⵓⵙⵖⵎⵙ ⵅⴼ ⵜⵍⴳⴰⵎⵜ ⵏ ⵉⴹⵕⵉⵚⵏ ⵉⵎⵙⵏⵎⴰⵍⵏ ⵢⴰⴹⵏⵉⵏ ⵉⴼⴼⵖⵏ ⵏⵖ ⵉⵍⵍⴰⵏ ⴳ ⵓⵙⴰⴽⴰ ⵏ ⵓⵙⵖⵣⵏ. ⵢⵉⵍⵉ ⴰⵡⴷ ⵓⴱⴷⴷⵉ ⵅⴼ ⵓⵙⵎⴰⵜⴰ ⵏ ⵓⵙⵎⵔⵙ ⵏ ⵓⵙⴰⵢⵔⴰⵔ Elogha-sup ⵉ ⵓⵙⵍⵎⴷ ⵏ ⵜⵓⵜⵍⴰⵢⵉⵏ ⴳ ⵜⵙⴷⴰⵡⵉⵢⵉⵏ ⵉⵎⵢⴰⵏⴰⵡⵏ, ⵍⵍⵉ ⵉⵙⵎⵓⵏⵏ ⵜⴰⵏⴳⵍⵉⵣⵉⵜ ⴷ ⵜⴼⵕⴰⵏⵚⵉⵚⵜ ⴷ ⵜⵙⴱⵍⵢⵓⵏⵉⵜ ⴷ ⵜⵄⵕⴰⴱⵜ ⴷ ⵜⵎⴰⵣⵉⵖⵜ. ⵉⴳⴰ ⵢⴰⵏ ⵓⵙⴰⵢⵔⴰⵔ ⵍⵍⵉ ⵙⴱⵓⵖⵍⴰⵏⵜ ⵜⵎⵓⵣⴰⵢⵉⵏ ⵜⵉⵎⵖⵔⵉⴱⵉⵢⵉⵏ.
ⴰⵢⵍⵍⵉ ⵉⵥⵍⵉⵏ ⵙ ⵓⵎⵓⵏ ⵏ ⵜⵙⵜⵔⴰⵜⵉⵊⵉⵢⵉⵏ ⵜⵉⵙⴳⵔⴰⵡⵉⵏ ⵉⵣⴷⵉⵏ ⵙ ⵓⵙⴳⴳⴷ ⴰⴱⵉⴷⴰⵖⵓⵊⵉ, ⵉⵎⵖⵓⵔ ⵡⵓⵟⵟⵓⵏ ⵏ ⵉⵙⵖⵉⵎⵏ ⵉⵕⵥⵎⵏ ⴳ ⵓⵙⴳⴳⵯⴰⵙ ⴰⵙⴷⴰⵡⴰⵏ 2025-2026 ⴰⵔ 10.841 ⵏ ⵓⵙⵖⵉⵎ ⴰⴱⵉⴷⴰⵖⵓⵊⵉ, ⴳ ⵓⵙⴰⵜⵉ ⵏ ⵓⵖⴰⵡⴰⵙ ⵏ ⵓⵙⴷⵓⵙ ⵏ ⵜⵏⵥⵥⵉ ⵏ ⵉⵎⵣⵣⴰⵍⵏ ⵏ ⵢⵉⴳⵔ ⵏ ⵜⴷⵓⵙⵉ ⴳ ⵉⵎⵏⵉⴷⵏ ⵏ 2030. ⴳ ⵎⴰ ⵉⵣⴷⵉⵏ ⵙ ⵓⵙⴳⴳⵣ ⵏ ⵓⵖⴰⵡⴰⵙ ⵏ ⵓⵙⵎⵓⵜⵜⴳ ⵏ ⵉⵙⵍⵎⴰⴷⵏ ⵏ ⵉⵙⴽⴽⵉⵍⵏ ⵏ ⵓⵙⵍⵎⴷ ⴰⵎⵏⵣⵓ ⴷ ⵓⵙⵉⵏⴰⵏ ⴳ ⵉⵎⵏⵉⴷⵏ ⵏ 2025, ⵉⵎⵖⵓⵔ ⵡⵓⵟⵟⵓⵏ ⵏ ⵉⵙⵖⵉⵎⵏ ⵉⴱⵉⴷⴰⵖⵓⵊⵉⵢⵏ ⵉⵕⵥⵎⵏ ⴰⵔ 20.404 ⵏ ⵓⵙⵖⵉⵎ. ⵉⵜⵜⵓⴹⴼⴰⵕ ⵓⵙⴷⵓⵙ ⵏ ⵡⵓⵟⵟⵓⵏⵏ ⵏ ⵉⵎⵙⴷⴰⵡⵏ ⵉⴼⴼⵖⵏ ⴳ ⵜⵙⴷⴰⵡⵉⵢⵉⵏ ⵜⵉⵎⴰⵜⴰⵢⵉⵏ ⵜⵉⵎⵖⵔⵉⴱⵉⵢⵉⵏ ⴳ ⵜⵥⵍⴰⵢⵉⵏ ⵜⵉⵎⵓⵟⵟⵓⵏⵉⵏ ⴳ ⵉⵎⵏⵉⴷⵏ ⵏ 2027, ⵉⵡⴹ ⵡⵓⵟⵟⵓⵏ ⵏ ⵉⵎⵃⴹⴰⵕⵏ ⵉⵎⴰⵢⵏⵓⵜⵏ ⴳ ⵓⵙⴰⵜⵉ ⵏ ⵓⵖⴰⵡⴰⵙ ⴰⴷ 27.190 ⵏ ⵓⵎⵃⴹⴰⵕ.
ⴰⵎⵎⴰ ⴳ ⵓⴳⵣⵣⵓⵎ ⴰⴱⵉⴷⴰⵖⵓⵊⵉ, ⵉⵜⵜⵓⵙⴽⴰⵔ ⵜⵡⵓⵔⵉ ⵅⴼ ⵓⵙⵎⵢⴰⵏⴰⵡ ⵏ ⵓⵙⵎⵏⵉⴷ ⵏ ⵓⵙⵎⵓⵜⵜⴳ ⵙ ⵓⵙⵖⵣⵏ ⵏ ⵎⴰ ⵉⵜⵜⴰⵥⵏ ⵉ 366 ⵏ ⵓⵙⴰⴽⴰ ⴰⵎⴰⵢⵏⵓ, ⴷ ⵓⵙⴱⵓⵖⵍⵓ ⵏ ⵉⵎⴰⴽⴰⵜⵏ ⴷ ⵜⵉⵍⴳⴳⵯⵉⵜⵉⵏ ⴳⵔ ⵜⵉⴳⵔⵓⵎⵎⴰⵡⵉⵏ ⴷ ⵜⵥⵍⴰⵢⵉⵏ ⴷ ⵜⵎⵔⵙⴰⵍ ⵉⵎⵢⴰⵏⴰⵡⵏ ⴷ ⵓⵙⵖⵣⵏ ⵏ ⵉⵔⵟⵟⴰⵍⵏ ⵉⵏⴰⵡⴰⵢⵏ, ⴰⴼⴰⴷ ⴰⴷ ⵜⵉⵍⵉ ⵜⵙⵏⵏⴰⵏⵜ ⴳ ⵓⵙⵡⴰⵍⴰ ⴷ ⵓⵙⵏⴼⵍ ⵏ ⵉⴱⵔⵉⴷⵏ ⵏ ⵜⵖⵓⵔⵉ, ⵎⴰⵢⴰⴷ ⵔⴰⴷ ⵉⵙⴷⵓⵙ ⵜⵉⵎⵍⴷⴰⵡⵉⵏ ⵏ ⵉⵎⵃⴹⴰⵕⵏ ⵉ ⵓⴹⴼⵓⵕ ⵏ ⵉⴱⵔⵉⴷⵏ ⵏⵏⵙⵏ ⵏ ⵜⵖⵓⵔⵉ ⴳ ⵡⴰⴷⴷⴰⴷ ⵏ ⵓⵄⵜⵜⴰⵕ ⵏⵏⵙⵏ ⴷ ⵔⴰⴷ ⵉⵙⵉⴷⵔⵓⵙ ⵙⴳ ⵜⵎⴰⵎⴽⵜ ⵏ ⵜⴼⵍⵉ ⵜⴰⵙⴷⴰⵡⴰⵏⵜ.