ⴰⴳⵔⴰⵡ ⵏ ⵓⵙⵇⵇⵉⵎ ⵏ ⵜⵏⴱⴰⴹⵜ ⵏ ⵡⴰⵙⵙ ⵏ ⵓⴽⵡⴰⵙ 12 ⵎⴰⵕⵚ 2026

ⵉⵜⵜⴰⵡⵙⴽⴰⵔ ⴰⵙⵙ ⵏ ⵓⴽⵡⴰⵙ 22 ⴳ ⵕⴰⵎⴰⴹⴰⵏ ⵏ ⵛⴰⵄⴱⴰⵏ 1447, ⵉⵎⵙⴰⵙⴰⵏ ⴷ 12 ⵎⴰⵕⵚ 2026, ⴰⵙⵇⵇⵉⵎ ⵏ ⵜⵏⴱⴰⴹⵜ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ. ⵉⵥⵍⵉ ⵓⴳⵔⴰⵡ ⴰⴷ ⵙ ⵓⵎⴹⴰⴽⴰⵕ ⵅⴼ ⵜⵓⴳⵜ ⵏ ⵉⵙⵏⵜⴰⵢ ⵏ ⵉⴹⵕⵉⵚⵏ ⵓⵙⵍⵉⴳⵏⵏ ⴷ ⵓⵙⵖⵎⵙ ⵙ ⵢⴰⵜ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⴷ ⵓⵎⴹⴰⴽⴰⵕ ⵅⴼ ⵜⵉⵙⵓⵎⴰⵔ ⵏ ⵓⵙⵎⴰⵍ ⴳ ⵜⴼⵙⵏⵉⵡⵉⵏ ⵜⵉⵏⴰⴼⵍⵍⴰⵜⵉⵏ ⵙ ⵓⵎⵙⴰⵙⴰ ⴰⴽⴷ ⵓⵎⵏⵏⵉ ⵡⵉⵙ92 ⴳ ⵓⴷⵓⵙⵜⵓⵔ.
ⴳ ⵜⵣⵡⵉⵔⵉ ⵏ ⵓⵙⵇⵇⵉⵎ ⵏ ⵜⵏⴱⴰⴹⵜ, ⵉⴱⴷⴷ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵖⵔ ⵓⵙⴱⵓⵖⵍⵓ ⴰⵎⴰⵡⴰⵏ ⵍⵍⵉ ⵉⵣⵎⵎⴻⵎ ⵜⴷⴰⵎⵙⴰ ⵜⴰⵏⴰⵎⵓⵔⵜ, ⵎⵇⵇⴰⵔ ⵉⵍⵍⴰ ⵓⵙⴰⵜⵉ ⴰⴳⵔⴰⵖⵍⴰⵏ ⵉⵜⵜⵡⴰⵙⵙⵏⵏ ⵙ ⵉⵏⴼⴰⵍⵏ ⵉⴷⴰⵎⵙⴰⵏⵏ ⵉⵎⵖⴰⵡⵍⵏ, ⵙ ⵓⵙⵔⴰⴳ ⵏ ⵓⵙⵓⵍ ⵏ ⵡⴰⴷⴷⴰⴷ ⵏ ⵜⵓⵔⴷⴰ ⴳ ⵉⴳⴰⴷⴰⵣⵏ ⵉⵎⴰⴹⵍⴰⵏⵏ ⴷ ⵓⴹⴼⵓⵕ ⵏ ⵜⴰⵙⵙⴰⵙⵉⵏ ⵜⵉⵊⵢⵓⵙⵉⵢⴰⵙⵉⵢⵉⵏ.
ⵉⵙⴼⵔⵓ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙ ⴷ ⵎⴰ ⵙ ⵜⴻⵜⵜⵡⴰⵙⵙⵏ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⴳ ⵓⵙⴰⵜⵉ ⴰⴷ ⵉⵛⵇⵇⴰⵏ ⵉⴳⴰ ⵜⴰⵣⵎⵔⵜ ⵏⵏⵙ ⵅⴼ ⵓⵙⵏⴼⵍ ⵏ ⵉⵏⴰⵔⵓⵣⵏ ⵖⵔ ⵜⵎⵍⴷⴰⵡⵉⵏ ⵏ ⵜⵉⴷⵜ ⵉ ⵓⵙⴳⴳⴷ, ⵙ ⵓⴼⴹⵍ ⵏ ⵓⵏⴼⴰⵡ ⵏ ⵜⵎⵓⵖⵍⵉ ⵜⴰⵙⵜⵔⴰⵜⵉⵊⵉⵜ ⵍⵍⵉ ⵙⵙⴰⵜⵉⵏⵜ ⵜⵏⵎⵍⴰⴷⵉⵏ ⵜⵉⴳⵍⴷⴰⵏⵉⵏ ⵜⵉⵏⴰⴼⵍⴰⵢⵉⵏ, ⴷ ⵙ ⵓⴼⴹⵍ ⵏ ⵉⵙⵜⴰⵢⵏ ⵉⵏⴱⴰⴹⵏ ⵍⵍⵉ ⵉⴱⴷⴷⵏ ⵅⴼ ⵓⵙⵙⵏⵜⵉ ⴰⴷⴰⵎⵙⴰⵏ ⴰⵎ ⵓⴽⵛⵛⵓⵎ ⴰⵙⵉⵍⴰⵏ ⵉ ⵓⵙⵔⵙ ⵏ ⵉⵙⵉⵍⴰⵏ ⵏ ⵓⵡⴰⵏⴽ ⴰⵏⴰⵎⵓⵏ.
ⴳ ⵓⵙⴰⵜⵉ ⴰⴷ, ⵉⵙⴰⵡⵍ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵅⴼ ⵉⵙⵉⵜⴳⵏ ⵉⵎⴰⵡⴰⵏⵏ ⵏ ⵎⵏⵏⴰⵡⵜ ⵜⵙⵏⵓⵔⴰⵢⵉⵏ ⵏ ⵓⵙⵏⵎⵉⵍⵉ ⵜⵉⴳⵔⴰⵖⵍⴰⵏⵉⵏ, ⵜⴰⵎⴳⴳⴰⵔⵓⵜ ⴳⵉⵙⵏⵜ (Moody’s) ⵍⵍⵉ ⵉⴱⵔⵔⵃⵏ ⵙ ⵓⵙⴳⴳⴷ ⵏ ⵉⵎⵏⵉⴷⵏ ⵏ ⵓⵙⵏⵎⵉⵍⵉ ⵏ ⵓⵕⵟⵟⴰⵍ ⵉ ⵍⵎⵖⵔⵉⴱ ⵙⴳ "ⵉⵔⴽⴷ" ⵖⵔ "ⴰⵎⴰⵡⴰⵏ", ⵙ ⵓⴱⴷⴷⵉ ⵅⴼ ⵓⵙⴼⴰⵍⴽⵉ ⵏ ⵉⵎⵏⵉⴷⵏ ⵏ ⵜⴳⵎⵉ ⴷ ⵓⵙⴷⵓⵙ ⵏ ⵜⴷⵉⵏⴰⵎⵉⵜ ⵏ ⵓⵙⵙⴰⵔⵓ ⴷ ⵓⴹⴼⵓⵕ ⵏ ⵉⵙⴳⴳⴷⵏ ⵉⵎⵙⴽⵉⵍⵏ ⵉⵡⴰⵜⵜⵙⵏ ⴰⵙⵎⵢⵉⵡⵏ ⵏ ⵜⴷⴰⵎⵙⴰ ⵜⴰⵏⴰⵎⵓⵔⵜ ⴷ ⵓⵙⴼⴰⵍⴽⵉ ⵏ ⵜⵡⵓⵔⵉ ⵜⴰⵎⵉⵣⴰⵏⵉⵢⵜ.
ⵖⵉⴽⵍⵍⵉ ⵜⵙⴷⴷⵉⴷⵏⵜ ⵜⵎⴰⵜⴰⵔⵉⵏ ⵜⵉⴷⴰⵎⵙⴰⵏⵉⵏ ⵍⵍⵉ ⵙ ⵉⵇⵇⵏ ⵓⵙⴳⴳⵯⴰⵙ ⵏ 2025, ⴰⵎ ⵓⵙⵏⴱⴹ ⴳ ⵓⵙⵡⵉⵔ ⵏ ⵓⵙⵖⵓⴷⵓ ⴳ ⵉⵡⵜⵜⴰ ⵏ 0,8%, ⴷ ⵓⵙⵉⴷⵔⵓⵙ ⵏ ⵓⵣⵓⴳⵣ ⵏ ⵜⵎⵉⵣⴰⵏⵉⵜ ⵖⵔ 3,5%, ⴷ ⵓⵙⵉⴷⵔⵓⵙ ⵏ ⵓⵕⵟⵟⴰⵍ ⵏ ⵜⵅⵣⵉⵏⵜ ⵖⵔ 67,2%, ⴷ ⵓⵡⴹ ⵏ ⵉⵙⵙⴰⵔⵓⵜⵏ ⵉⴱⵕⵕⴰⵏⵉⵢⵏ ⵉⵙⵔⵉⴷⵏ 56 ⵎⵍⵢⴰⵕ ⵏ ⴷⴷⵔⵀⵎ, ⵉ ⵜⵉⴽⴽⵍⵜ ⵜⴰⵎⵣⵡⴰⵔⵓⵜ ⴳ ⵓⵎⵣⵔⵓⵢ ⵏ ⵜⵎⵓⵔⵜ ⵏⵏⵖ.
ⵉⵏⵏⴰ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙ ⵜⵉⵎⴰⵜⴰⵔⵉⵏ ⴰⴷ ⵜⵉⵎⴰⵡⴰⵏⵉⵏ ⴷⵔⵓⵏⵜ ⴳ ⵓⵙⴽⴽⵉⵔ ⵏ ⵜⴳⵎⵉ ⵜⴰⴷⴰⵎⵙⴰⵏⵜ ⵉⵡⴹⵏ 4,8% ⴳ ⵓⵙⴳⴳⵯⴰⵙ ⵏ 2025, ⵉⵙⴷⴷⵉⴷ ⵜⴰⵣⵎⵔⵜ ⵏ ⵜⴷⴰⵎⵙⴰ ⵏⵏⵖ ⵜⴰⵏⴰⵎⵓⵔⵜ ⵅⴼ ⵓⴱⴷⴷⵉ ⵎⵏⵉⴷ ⵏ ⵜⴰⵙⵙⴰⵙⵉⵏ ⵙ ⵓⵔⴽⴽⵓ ⴷ ⵜⵓⵙⵙⵏⴰ.
ⴰⵢⵍⵍⵉ ⵉⵥⵍⵉⵏ ⵙ ⵓⵙⴳⴳⵯⴰⵙ ⵏ 2026, ⵉⵙⴼⵔⵓ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙ ⵉⵔⵊⵓⵜⵏ ⴰⵔ ⵎⵎⴰⵍⵏ ⴰⴹⴼⵓⵕ ⵏ ⵜⴷⴰⵎⵙⴰ ⵜⴰⵏⴰⵎⵓⵔⵜ ⵉ ⵓⵙⵙⵉⴷⵔ ⵏⵏⵙ ⵉ ⵓⵙⴳⴳⵯⴰⵙ ⵡⵉⵙⵙ ⵙⵎⵎⵓⵙ ⵉⵎⴹⴼⴰⵕⵏ, ⵙ ⵓⵙⴷⵓⵙ ⵏ ⵓⵙⴼⴰⵍⴽⵉ ⵏ ⵜⵡⵓⵔⵉ ⵏ ⵢⵉⴳⵔⴰⵏ ⵓⵔ ⵉⴳⵉⵏ ⵉⵏⴼⵍⴰⵃⵏ ⴷ ⵜⴳⵎⵉ ⵜⴰⵎⴰⵥⵍⴰⵢⵜ ⵏ ⵢⵉⴳⵔ ⴰⵏⴼⵍⴰⵃ, ⵍⵍⵉ ⵉⵜⵜⵓⵔⵊⴰⵏ ⴰⴷ ⵉⵙⴽⵔ ⴰⵙⴳⴳⵯⴰⵙ ⴰⴷ ⵢⴰⵜ ⵜⴳⵎⵉ ⵜⴰⵏⴰⵡⴰⵢⵜ ⵔⴰⴷ ⵜⴰⵡⴹ 15%.
ⵉⵙⴼⵔⵓ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙ ⵜⵉⵎⵇⵇⴰ ⵏ ⵓⵏⵥⴰⵕ ⵜⵉⵎⴳⴳⵓⵔⴰ ⵍⵍⵉ ⵜⵙⵙⵏ ⵜⵎⵓⵔⵜ ⵏⵏⵖ, ⴷ ⵍⵍⵉ ⵉⵡⴹⵏ ⵎⵏⵏⴰⵡ ⵉⴷⵖⴰⵔⵏ ⵏ ⵜⴳⵍⴷⵉⵜ ⵔⴰⴷ ⴷⵔⵓⵏⵜ ⴳ ⵓⵙⴼⴰⵍⴽⵉ ⵏ ⵜⵢⴰⴼⵓⵜ ⵏ ⵜⵙⵔⵙⴰⵍ ⵏ ⵓⴼⴰⵔⵙ, ⵉⴳ ⵜⵉⵏ ⵉⵎⵏⴷⵉ ⵏⵖ ⵜⵉⴽⵔⵣⵉⵡⵉⵏ ⵜⵉⵙⵉⵍⴰⵏⵉⵏ ⵏⵖ ⴰⵙⴳⵎⵉ ⵏ ⵉⵎⵓⴷⴰⵔ, ⵎⴰ ⴰⴷ ⵉⵕⵥⵎⵏ ⵉⵎⵏⵉⴷⵏ ⵉⴼⵓⵍⴽⵉⵏ ⵉ ⵓⵙⴷⵓⵙ ⵏ ⵜⴷⵔⴰⵡⵜ ⵏ ⵢⵉⴳⵔ ⴰⵏⴼⵍⴰⵃ ⴳ ⵜⴳⵎⵉ ⵜⴰⴷⴰⵎⵙⴰⵏⵜ ⴷ ⵓⵙⵔⵙ ⵏ ⵜⵉⵍⴰⵍⵜ ⵏⵏⵙ ⴰⵎ ⵉⵎⵉⵙⵙ ⴰⵙⵉⵍⴰⵏ ⵉ ⵜⵏⴼⵔⵓⵜ ⵜⴰⵎⵜⵛⴰⵏⵜ, ⵎⵇⵇⴰⵔ ⵉⵍⵍⴰ ⵓⵏⴳⵉ ⵍⵍⵉ ⵉⵜⵜⵓⵣⵎⵎⴻⵎⵏ ⴳ ⴽⵔⴰ ⵏ ⵜⵎⵏⴰⴹⵉⵏ ⵏ ⵉⵥⵥⵍⵎⴹ ⴷ ⵓⵜⴰⵔⴰⵎ ⴷ ⵎⴰ ⵢⴼⵍ ⵏ ⵉⴹⵉⵚⵏ ⵅⴼ ⴽⵔⴰ ⵏ ⵜⵢⴰⴼⵓⵜⵉⵏ.
ⵉⵙⵎⴷ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙ ⵜⵉⵎⴰⵜⴰⵔⵉⵏ ⴰⴷ ⵜⵉⵎⴰⵡⴰⵏⵉⵏ ⴰⵔ ⵙⴷⵓⵙⵏⵜ ⵜⴰⴼⵍⴰⵙⵜ ⵏ ⵉⵎⵙⵙⴰⵔⵓⵜⵏ ⴳ ⵜⴷⴰⵎⵙⴰ ⵜⴰⵏⴰⵎⵓⵔⵜ, ⵎⴰ ⴰⴷ ⵉⴳⴰⵏ ⵢⴰⵏ ⵓⵙⵎⵓⵙⵙⵓ ⵢⴰⴹⵏ ⵉ ⵜⵏⴱⴰⴹⵜ ⴰⴼⴰⴷ ⴰⴷ ⵜⴹⴼⵕ ⴰⵙⵎⵓⵜⵜⴳ ⵏ ⵜⵓⴳⴳⴰⵙ ⵉⵎⵢⴰⵏⴰⵡⵏ ⵉ ⵓⵙⴷⵓⵙ ⵏ ⵉⵎⵓⵔⴰⵏ ⴰⴷ ⴷ ⵓⵙⵉⵣⵡⵔ ⵏ ⵜⵉⵣⵉ ⵏ ⵉⵙⴳⴳⴷⵏ ⵉⴷⴰⵎⵙⴰⵏⵏ ⴷ ⵉⵏⴰⵎⵓⵏⵏ, ⴷ ⵓⵙⴷⵓⵙ ⵏ ⵜⵣⵎⵔⵜ ⵏⵏⵖ ⵅⴼ ⵓⵎⵏⵉⴷ ⵏ ⵉⵏⴼⴰⵍⵏ ⴷ ⵜⴰⵙⵙⴰⵙⵉⵏ ⵜⵉⴱⵕⵕⴰⵏⵉⵢⵉⵏ ⵍⵍⵉ ⵉⵣⵎⵔⵏ ⴰⴷ ⵙⴽⵔⵏⵜ ⵉⴹⵉⵚ ⵅⴼ ⵜⴷⴰⵎⵙⴰ ⵏⵏⵖ.
ⴹⴰⵕⴰⵜ ⵏ ⵎⴰⵢⴰⴷ, ⵉⴹⴼⴰⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⵢⴰⵏ ⵓⵙⵎⵏⵉⴷ ⵅⴼ ⵉⴹⵉⵚ ⵏ ⵜⵎⵇⵇⴰ ⵏ ⵓⵏⵥⴰⵕ ⵅⴼ ⵜⵡⵓⵔⵉ ⵏ ⵓⵎⵓⵙⵙⵓ ⴰⵏⴼⵍⴰⵃ 2025/2026, ⵉⵙⵎⵏⵉⴷ ⵜ ⵎⴰⵙⵙ ⴰⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵎⵔⵜ ⵜⴰⵢⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ.
ⵉⵙⴰⵡⵍ ⴳ ⵓⵙⵎⵏⵉⴷ ⴰⴷ ⵅⴼ ⵎⵏⵏⴰⵡⵜ ⵜⵎⴰⵜⴰⵔⵉⵏ ⵉⵥⵍⵉⵏ ⵙ ⵓⵏⵥⴰⵕ ⴰⴷ ⵉⵣⵔⵉⵏ ⴳ ⵜⵎⴰⵣⵉⵔⵜ ⵏⵏⵖ ⴳ ⵜⴳⵉⵔⴰ ⴰⴷ, ⵍⵍⵉⵖ ⵢⵉⵡⴹ ⵓⵙⵎⵉⴷⵍ ⴰⵏⴰⵎⵓⵔ ⵏ ⵓⵏⵥⴰⵕ ⴳ ⵜⵉⵣⵉ ⴳⵔ ⴰⵎⵣⵡⴰⵔⵓ ⵏ ⵛⵓⵜⴰⵏⴱⵉⵔ 2025 ⴰⵔ 11 ⵎⴰⵕⵚ 2026 ⴰⵜⵜⴰⵢⵏ ⵏ 462 ⵎⵍⵎⵉⵜⵔ, ⵍⵍⵉⵖ ⵉⵣⵎⵎⴻⵎ ⵢⴰⵏ ⵓⵙⵖⵍ ⵉⵜⵜⵓⵙⵉⵜⴳⵏ ⵙ 56% ⵉⵎⵙⴰⵙⴰⵏ ⴷ ⵓⵙⵎⵉⴷⵍ ⵉⵜⵜⵓⵣⵎⵎⴻⵎⵏ ⴳ ⴽⵕⴰⴹⵜ ⵜⵎⵔⴰⵡⵉⵏ ⵏ ⵉⵙⴳⴳⵯⴰⵙⵏ ⵉⵣⵔⵉⵏ, ⴷ 134% ⵉⵎⵙⴰⵙⴰⵏ ⴷ ⵢⵉⵎⵉⵔ ⵉⵣⵔⵉⵏ. ⵢⵉⵡⴹ ⵓⵏⵥⵕ ⴰⴷ ⴰⵎⴰⵜⴰ ⵏ ⵜⵎⵏⴰⴹⵉⵏ ⵜⵉⵏⴼⵍⴰⵃⵉⵏ ⵙ ⵓⵣⵎⵎⴻⵎ ⵏ ⵜⵙⵎⴰⵇⵇⴰⵍⵉⵏ ⵜⵉⵎⵇⵇⵔⴰⵏⵉⵏ ⵙⵍⴰⵡⴰⵏ ⴰⴽⴽⵯ ⴳ ⵜⵎⵏⴰⴹⵉⵏ ⵏ ⵉⵥⵥⵍⵎⴹ ⴷ ⵙⴰⵢⵙ ⴷ ⵓⵜⴰⵔⴰⵎ ⴷ ⵛⵛⴰⵡⵉⵢⴰ ⴷ ⴷⵓⴽⴽⴰⵍⴰ.
ⴳ ⵓⵙⴰⵜⵉ ⴰⴷ, ⵉⵙⴼⵔⵓ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⴰⵎⴰⵜⴰ ⵏ ⵜⵎⴰⵜⴰⵔⵉⵏ ⵜⵉⵎⵉⵔⴰⵏⵉⵏ ⴰⵔ ⵎⵎⴰⵍⵏⵜ ⴰⵙⵉⵜⴳ ⵏ ⵢⴰⵏ ⵢⵉⵎⵉⵔ ⴰⵏⴼⵍⴰⵃ ⵉⴼⵓⵍⴽⵉⵏ, ⴷ ⵓⵡⵓⵔⵔⵉ ⵏ ⵢⵉⴳⵔ ⴰⵏⴼⵍⴰⵃ ⴰⵔ ⵉⵙⵡⵉⵔⵏ ⵏ ⵡⴰⵜⵉⴳ ⵉⵜⵜⵓⵔⵏⵓⵏ ⵍⵍⵉ ⵉⵜⵜⵓⵣⵎⵎⴻⵎⵏ ⴳ ⵜⴳⵉⵔⴰ ⵏ ⵓⵖⴰⵡⴰⵙ ⵏ ⵍⵎⵖⵔⵉⴱ ⴰⵣⴳⵣⴰⵡ.