ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵢⴰⵏ ⵓⴳⵔⴰⵡ ⵏ ⵓⴹⴼⴼⵓⵕ ⵏ ⵓⵣⵣⴳⵉⵔ ⵏ ⵜⴽⵕⴹⴰ ⵏ ⵓⴱⵔⵉⴷ ⴳ ⵉⴳⵔ ⵏ ⵓⵙⵡⵓⵔⵉ

ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵓⵏⴰⴱⴰⴹ ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⴰⵙⵙ ⵏ ⵓⵙⵉⵎⵡⴰⵙ 10 ⵉⴱⵔⵉⵔ 2026, ⵢⴰⵏ ⵓⴳⵔⴰⵡ ⵉⵜⵜⵓⵥⵍⴰⵢⵏ ⵉ ⵓⴹⴼⴼⵓⵕ ⵏ ⵓⵣⵣⴳⵉⵔ ⵏ ⵜⴽⵕⴹⴰ ⵏ ⵓⴱⵔⵉⴷ ⴳ ⵉⴳⵔ ⵏ ⵓⵙⵡⵓⵔⵉ, ⵍⵍⵉⵖ ⵉⵍⵍⴰ ⵓⵙⵙⴰⴳⵯ ⵙ ⵓⵙⵡⵓⴷⴷⵓ ⵉⵜⵜⵓⵙⴽⴰⵔⵏ ⴳ ⵉⴳⵔⴰⵏ ⵉⵎⴰⵡⵙⴰⵙⵏ ⴷ ⵓⵙⴽⴰⵔ ⵏ ⵉⵣⵎⴰⵣ ⴳ ⵓⴳⴰⴷⴰⵣ ⵏ ⵜⵡⵓⵔⵉ.
ⴳ ⵓⴳⵔⴰⵡ ⴰⴷ, ⵉⵍⵍⴰ ⵓⵙⵉⵙⴼⵡ ⵅⴼ ⵓⵙⴼⴰⵍⴽⵉ ⵉⵎⴰⵏⵏ ⴳ ⵡⴰⴷⴷⴰⴷ ⵏ ⵓⴳⴰⴷⴰⵣ ⵏ ⵜⵡⵓⵔⵉ ⴳ ⵜⴳⵍⴷⵉⵜ, ⵉⵜⵜⵓⵙⴷⵓⵙⵏ ⵙ ⵉⵎⴹⴰⵏⵏ ⵉⴼⵓⵍⴽⵉⵏ, ⵍⵍⵉⵖ ⵜⵓⵍⵉ ⵜⴷⴰⵎⵙⴰ ⵜⴰⵏⴰⵎⵓⵔⵜ ⴰⵙⴽⴰⵔ ⵏ 850.000 ⵏ ⵡⴰⵏⵙⴰ ⵏ ⵜⵡⵓⵔⵉ ⴳ ⵉⴳⵔⴰⵏ ⵓⵔ ⵉⴳⵉⵏ ⵉⵏⴼⵍⴰⵃⵏ, ⵙ ⵢⴰⵏ ⵓⵙⵖⵍ ⵏ 170.000 ⵏ ⵡⴰⵏⵙⴰ ⴳ ⵓⵙⴳⴳⵯⴰⵙ ⴳⵔ 2021 ⴷ 2025. ⵉⵖ ⵉⵇⵇⵉⵎ ⵓⵎⵓⵙⵙⵓ ⴰⴷ ⵉⵜⵜⵓⵣⵎⵎⴻⵎⵏ ⴳ ⵓⵙⴳⴳⵯⴰⵙ ⵏ 2025, ⵏⵏⴰ ⵉⵙⵙⵏⵏ ⴰⵙⴽⴰⵔ ⵏ 233.000 ⵏ ⵡⴰⵏⵙⴰ ⵏ ⵜⵡⵓⵔⵉ, ⵉⵜⵜⵓⵕⵊⴰ ⴰⴷ ⵉⵜⵜⵓⵙⴽⴰⵔ ⵓⴳⴳⴰⵔ ⵏ ⵢⴰⵏ ⵓⵎⵍⵢⵓⵏ ⵏ ⵡⴰⵏⵙⴰ ⵏ ⵜⵡⵓⵔⵉ ⴳ ⵜⴳⵉⵔⴰ ⵏ ⵓⵙⴳⴳⵯⴰⵙ ⵏ 2026, ⵎⵇⵇⴰⵔ ⵍⵍⴰⵏ ⵡⴰⵏⵙⵉⵡⵏ ⵏⵏⴰ ⵉⵜⵜⵓⵜⵜⵓⵏ ⴳ ⵢⵉⴳⵔ ⴰⵏⴼⵍⴰⵃ ⵙ ⵓⵙⵔⴰⴳ ⵏ ⵜⵖⴰⵔⵜ.
ⵙⵎⵏⵉⴷⵏ ⵢⵉⴳⵔⴰⵏ ⵉⵎⵙⵜⴳⴳⴰⵔⵏ ⴳ ⵓⴳⵔⴰⵡ ⴰⴷ, ⵜⵉⴼⵙⵏⵉⵡⵉⵏ ⴼ ⵓⵙⵡⵓⴷⴷⵓ ⵉⵜⵜⵓⵙⴽⴰⵔⵏ ⴳ ⵓⵣⵣⴳⵉⵔ ⵏ ⵉⵖⴰⵡⴰⵙⵏ ⵉⵎⵢⴰⵏⴰⵡⵏ ⵉⵣⴷⵉⵏ ⴷ ⵜⴽⵕⴹⴰ ⵏ ⵓⴱⵔⵉⴷ ⵏ ⵢⵉⴳⵔ ⵏ ⵓⵙⵡⵓⵔⵉ, ⵙⵍⴰⵡⴰⵏ ⴰⴽⴽⵯ ⴳ ⵢⵉⴳⵔⴰⵏ ⵏ ⵜⴼⵍⵍⴰⵃⵜ ⴷ ⵜⵎⴰⵍⵍⴰⵢⵜ. ⵍⵍⵉⵖ ⵙⵙⵏⵏ ⵉⵎⵓⵙⵙⵓⵜⵏ ⵉⵏⴼⵍⴰⵃⵏ ⵢⴰⵏ ⵓⵙⴼⴰⵍⴽⵉ ⴳ ⵉⵎⵉⵔ ⴰⴷ, ⵏⵏⴰ ⵉⵙⵙⵏⵏ ⴰⵙⴽⴰⵔ ⵏ 365 ⵏ ⵓⵎⵍⵢⵓⵏ ⵏ ⵡⴰⵙⵙ ⵏ ⵜⵡⵓⵔⵉ, ⵙ ⵢⴰⵜ ⵜⴳⵎⵉⴹⵉ ⵏ 7% ⵉⵎⵙⴰⵙⴰⵏ ⴷ ⵉⵎⵉⵔ ⴰⵏⴼⵍⴰⵃ ⵉⵣⵔⵉⵏ. ⵙ ⵜⵡⴰⵍⴰ ⵏⵏⵙ, ⵉⵙⴽⵔ ⵢⵉⴳⵔ ⴰⵎⴰⵍⵍⴰⵢ ⵜⴰⵢⴰⴼⵓⵜⵉⵏ ⵉⵣⵔⵉⵏ ⵜⵉⵔⵊⴰⵡⵉⵏ ⵏ ⵓⵙⴳⴳⵯⴰⵙ ⵏ 2026, ⵙ ⵓⵙⵏⵜⵉ ⵏⵏⵙ ⵉ 92.000 ⵏ ⵡⴰⵏⵙⴰ ⵏ ⵜⵡⵓⵔⵉ, ⴳ ⵓⵎⴷⵢⴰ ⵏ 80.000 ⵏ ⵡⴰⵏⵙⴰ.
ⴳ ⵜⵖⴰⵔⴰⵜⵙ ⵏ ⵓⵏⴰⴳⵔⴰⵡ ⵏ ⵡⴰⵏⵏⴰⵍ ⵉⵥⵍⵉⵏ ⵙ ⵜⵎⵙⵙⵏⵜⵉⵢⵉⵏ ⵎⵥⵥⵉⵢⵏ ⴱⴰⵀⵔⴰ ⴷ ⵜⵎⵥⵥⵢⴰⵏⵉⵏ ⴷ ⵜⵏⴰⵎⵎⴰⵙⵉⵏ, ⵉⵜⵜⵓⵙⵔⵙ 170 ⵏ ⵓⵜⵜⵔ ⵏ ⵓⵙⵏⵜⵉ, ⵉⵥⵍⵉⵏ ⵙ ⵜⵎⴳⵓⵔⵉ ⴷ ⵓⵙⵏⵓⴱⴳ ⴷ ⵓⵙⵜⵛⵓ, ⵍⵍⵉⵖ ⵉⵜⵜⵓⵎⵙⴰⵙⴰ ⴼ 21 ⵏ ⵓⵙⵏⵜⵉ ⵏⵏⴰ ⵉⵎⵎⴰⵍⵏ ⵉⵙⵙⴰⵔⵓⵜⵏ ⵙ ⵡⴰⵜⵉⴳ ⵏ 312 ⵏ ⵓⵎⵍⵢⵓⵏ ⵏ ⴷⴷⵔⵀⵎ, ⴷ ⵓⵙⵉⵍⵢ ⵏ 49 ⵏ ⵓⵎⵍⵢⵓⵏ ⵏ ⴷⴷⵔⵀⵎ ⴳ ⵓⵙⴰⵜⵉ ⵏ ⵡⴰⵏⵏⴰⵍ ⵉ ⵉⵙⵏⵜⴰⵢ ⴰⴷ.
ⵎⴽⵍⵍⵉ ⵉⵜⵜⵓⵙⵎⵏⵉⴷ  ⵜⵎⵙⴽⴰⵔ ⵏⵏⴰ ⵉⵔⴰⵏ ⴰⴷ ⵙⵡⵓⴷⴷⵓⵏⵜ ⵜⵉⵎⵍⴷⴰⵡⵉⵏ ⵉⴼⵓⵍⴽⵉⵏ ⵉ ⵜⴷⵔⴰⵡⵜ ⵏ ⵜⵎⵙⵙⵏⵜⵉⵢⵉⵏ ⵎⵥⵥⵉⵢⵏ ⴱⴰⵀⵔⴰ ⴷ ⵜⵎⵥⵥⵢⴰⵏⵉⵏ ⴷ ⵜⵏⴰⵎⵎⴰⵙⵉⵏ ⴳ ⵢⵉⴳⵔⴰⵏ ⵏ ⵓⵙⵉⵍⵢ ⴷ ⵜⵣⴷⴷⵓⵖⵜ, ⴳ ⵓⵙⵀⵔⵙ ⵏ ⵓⵙⵡⵓⵔⵉ ⴳ ⵓⵙⵡⵉⵔ ⴰⵏⴰⴽⴰⵍ, ⴷ ⵓⵙⴼⵙⵙⵉ ⵏ ⵓⴽⵛⵛⵓⵎ ⵏⵏⵙⵏⵜ ⵙ ⵉⵙⵉⴽⴽⵍⵏ ⵉⴳⴷⵓⴷⴰⵏⵏ.
ⴱⴷⴷⵏ ⴰⵡⴷ ⵅⴼ ⵓⵕⵥⵥⵓⵎ ⵏ ⵉⵖⴰⵡⴰⵙⵏ ⵏ ⵓⵙⴷⵓⵙ ⵏ ⵓⵙⵡⵓⵔⵉ ⴳ ⵉⴳⵔⴰⵏ ⵉⵎⴰⵢⵏⵓⵜⵏ ⵉ ⵉⵄⵔⵔⵉⵎⵏ ⵓⵔ ⵉⵟⵟⵉⴼⵏ ⵜⵉⵙⵍⴽⵉⵏⵉⵏ, ⵙ ⵉⵖⴰⵡⴰⵙⵏ ⵏ "ⴰⵙⵉⴷⴼ" ⴷ "ⴰⵙⵀⵔⵙ". ⴷ ⵓⵙⵏⵜⵉ ⵏ ⵓⵖⴰⵡⴰⵙ ⵏ "ⴰⵙⴽⴽⵉⵍ", ⵉⵔⴰⵏ ⴰⴷ ⵉⵙⵙⵉⴹⵉⵚ ⴰⵙⵎⵓⵜⵜⴳ ⵙ ⵜⵙⴽⴽⵉⵍⵜ ⵜⴰⵣⵣⵓⵍⴰⵏⵜ ⴳ ⵢⵉⴳⵔⴰⵏ ⵉⵎⵢⴰⵏⴰⵡⵏ ⵏ ⵓⴼⴰⵔⵙ ⴷ ⵜⵏⴰⴼⵓⵜⵉⵏ, ⴷ ⵓⵙⵉⴷⴼ ⵏ 100.000 ⵏ ⵓⵎⵙⵎⵓⵜⵜⴳ ⴳ ⵓⵙⴳⴳⵯⴰⵙ ⴳ ⵡⴰⵎⵎⴰⵙ ⵏ ⵓⵙⵏⴼⵍ ⴰⴷⴰⵎⵙⴰⵏ ⴷ ⵓⵏⴰⵎⵓⵏ ⵏⵏⴰ ⵜⵙⵙⵏ ⵜⴳⵍⴷⵉⵜ. ⵎⴽⵍⵍⵉ ⵉⵜⵜⵓⵙⴼⴰⵡ ⴼ ⵜⵎⵙⴽⴰⵔ ⵏ ⵓⵏⴰⴱⴰⴹ ⵉ ⵓⵙⴱⴷⴷⵉ ⵏ ⵓⵙⵔⵓⵢ ⴰⵏⵎⵍⴰⵏ ⴷ ⵓⵙⵉⴷⵔⵓⵙ ⵏ ⵉⵎⴹⴰⵏⵏ ⵏ ⵉⵏⵍⵎⴰⴷⵏ ⵉⴼⴼⵖⵏ ⵙⴳ ⵜⵖⵓⵔⵉ, ⵙ ⵓⵙⴷⵓⵙ ⵏ ⵜⵉⵏⵎⴰⵍ ⵏ "ⵜⵏⴰⵔⴰ" ⴷ ⵓⵙⵉⵡⵙ ⵏ ⵜⵎⵉⴹⵉ ⵏ ⵜⵉⵏⵎⴰⵍ ⵏ ⵜⵎⵍⴷⴰ ⵜⵉⵙⵙ ⵙⵏⴰⵜ.
ⴳ ⵓⵙⴰⵜⵉ ⵏ ⵓⵖⴰⵡⴰⵙ ⵉⵣⴷⵉⵏ ⴷ ⵜⵙⴷⴰⵍⵉⵏ, ⵉⵜⵜⵓⵣⵎⵎⴻⵎ ⵓⵙⵏⵜⵉ ⵏ 40 ⵏ ⵜⵙⵓⵏⴰⵏⵜ ⵜⴰⵎⴷⵢⴰⵡⵜ, ⴰⴼⴰⴷ ⴰⴷ ⵜⵜⵓⵙⴷⵓⵙ ⵙ 20 ⵢⴰⴹⵏ, ⵉⴷⴷⴰ ⴷ ⵓⵖⴰⵡⴰⵙ ⴰⴷ ⴰⴼⴰⴷ ⴰⴷ ⵉⵙⵙⵉⴽⴽⵙ ⵜⵉⵎⴰⴳⴳⴰⵢⵉⵏ ⴷⴰⵜ ⵏ ⵓⵙⵉⴷⴼ ⵏ ⵜⵎⵖⴰⵔⵉⵏ ⵙ ⵓⴳⴰⴷⴰⵣ ⵏ ⵜⵡⵓⵔⵉ, ⴳ ⵎⴰⴷ ⵉⵣⴷⵉⵏ ⴷ ⵓⵙⵡⵓⴷⴷⵓ ⵏ ⵡⴰⵣⵣⴰⵏⵏ, ⴷ ⵜⵉⴽⴽⵉ ⵏ ⵜⵎⵍⴷⴰ ⵉ ⵜⵎⵖⴰⵔⵜ ⵜⴰⵎⵙⵡⵓⵔⵉⵜ ⴰⴼⴰⴷ ⴰⴷ ⵜⵙⵎⵙⴰⵙⴰ ⴳⵔ ⵜⵎⵙⵜⴳⴳⴰⵔⵉⵏ ⵏⵏⵙ ⵜⵉⵣⵣⵓⵍⴰⵏⵉⵏ ⴷ ⵜⵎⵙⵜⴳⴳⴰⵔⵉⵏ ⵏⵏⵙ ⵜⵉⵡⵊⴰⵡⴰⵏⵉⵏ.
ⵙ ⵜⴼⴰⵡⵜ ⵏ ⵉⵎⴰⵜⴰⵔⵏ ⴰⴷ ⵉⴼⵓⵍⴽⵉⵏ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵏⴰⴱⴰⴹ ⵎⴰⵙ ⴷ ⴰⵣⵣⴳⵉⵔ ⵏ ⵉⵖⴰⵡⴰⵙⵏ ⵉⵜⵜⵓⵙⵎⵔⵙⵏ ⴳ ⵜⴽⵕⴹⴰ ⵏ ⵓⴱⵔⵉⴷ ⵏ ⵢⵉⴳⵔ ⵏ ⵓⵙⵡⵓⵔⵉ ⵉⵜⵜⴷⴷⵓ ⴳ ⵓⴱⵔⵉⴷ ⵉⴼⵓⵍⴽⵉⵏ, ⵉⵙⴰⵡⵍ ⴼ ⵢⵉⴳⵔⴰⵏ ⵉⵎⵢⴰⵏⴰⵡⵏ ⴰⴷ ⵙⴷⵓⵙⵏ ⴰⵎⵢⴰⵡⴰⵙ, ⴷ ⵓⴹⴼⴼⵓⵕ ⵏ ⵓⵣⵣⵔⴱ ⵏ ⵓⵣⵣⴳⵉⵔ ⵏ ⵉⵖⴰⵡⴰⵙⵏ ⵙ ⵉⵡⵜⵜⴰⵙⵏ ⴷ ⵉⵣⵎⴰⵣ ⵉⵜⵜⵓⵙⵜⴰⵢⵏ, ⵙⵍⴰⵡⴰⵏ ⴰⴽⴽⵯ ⵡⵉⵏⵏⴰ ⵉⵣⴷⵉⵏ ⴷ ⵉⵄⵔⵔⵉⵎⵏ ⴷ ⵜⵎⵖⴰⵔⵉⵏ ⴷ ⵜⵎⵙⵙⵏⵜⵉⵢⵉⵏ ⵎⵥⵥⵉⵢⵏ ⴱⴰⵀⵔⴰ ⴷ ⵜⵎⵥⵥⵢⴰⵏⵉⵏ ⴷ ⵜⵏⴰⵎⵎⴰⵙⵉⵏ ⴳ ⵡⴰⵎⴰⴹⴰⵍ ⴰⴼⴰⵔⴰⵏ.