ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⴰⴳⵔⴰⵡ ⵏ ⵜⵙⵇⵇⵉⵎⵜ ⵏ ⵜⵏⴰⵔⴰ ⵏ ⵓⵙⴳⴳⴷ ⵏ ⵓⵏⴰⴳⵔⴰⵡ ⴰⴷⴰⵡⵙⴰⵏ ⴰⵏⴰⵎⵓⵔ

ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵓⵏⴰⴱⴰⴹ, ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⴰⵙⵙ ⵏ ⵓⵙⵉⵏⴰⵙ 14 ⵉⴱⵔⵉⵔ 2026 ⴳ ⵕⵕⴱⴰⵟ, ⴰⴳⵔⴰⵡ ⵏ ⵜⵙⵇⵇⵉⵎⵜ ⵏ ⵜⵏⴰⵔⴰ ⵏ ⵓⵙⴳⴳⴷ ⵏ ⵓⵏⴰⴳⵔⴰⵡ ⴰⴷⴰⵡⵙⴰⵏ ⴰⵏⴰⵎⵓⵔ. ⵉⵥⵍⵉ ⵓⴳⵔⴰⵡ ⴰⴷ ⵙ ⵓⴹⴼⴼⵓⵕ ⵏ ⵓⵣⴳⴳⵯⵣ ⵏ ⵉⴼⵔⴷⵉⵙⵏ ⵏ ⵓⵙⵏⵜⵉ ⴰⵙⵜⵔⴰⵜⵉⵊⵉ ⴰⴷ ⵍⵍⵉ ⵉⵎⵙⴰⵙⴰⵏ ⴰⴽⴷ ⵜⴰⵔⴰⵜⵉⵏ ⵜⵉⴳⵍⴷⴰⵏⵉⵏ ⵢⴰⵜⵜⵓⵢⵏ, ⵉⵔⴰⵏ ⴰⴷ ⵙⵔⵙⵏ ⵢⴰⵏ ⵓⵏⴰⴳⵔⴰⵡ ⴰⴷⴰⵡⵙⴰⵏ ⵉⵎⵓⵔⵙⵏ ⵉⴳⴰ ⴰⵙⵓⵍⴰⵏ, ⵉⵙⴷⵓⵙⵏ ⴰⵣⵔⴼ ⵏ ⵓⵙⵉⴷⴼ ⵙ ⵜⵏⵓⴼⴰ ⵜⵉⴷⴰⵡⵙⴰⵏⵉⵏ ⵙ ⵜⵖⴰⵔⴰⵙⵜ ⵉⴼⵓⵍⴽⵉⵏ ⵉ ⵜⵏⴰⵎⵓⵔⵉⵏ ⴷ ⵉⵏⴰⵎⵓⵔⵏ ⵙ ⵓⵎⴰⵜⴰ.
ⵉⵙⵎⴽⵜⵉ ⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵏⴰⴱⴰⴹ, ⴳ ⵜⵣⵡⵉⵔⵉ ⵏ ⵓⴳⵔⴰⵡ ⴰⴷ, ⵉⵥⵉⵕ ⴰⴳⵍⴷⴰⵏ ⵉⵜⵜⴰⵏⵏⴰⵢⵏ ⵍⵍⵉ ⵉⵙⵔⵙⵏ ⵜⵉⵔⵙⴰⵍ ⵜⵉⴷⴰⵡⵙⴰⵏⵉⵏ ⵜⵉⵏⴰⴽⴰⵍⵉⵏ, ⴰⵎ ⵢⴰⵜ ⵜⵎⴰⵡⴰⵙⵜ ⵉ ⵓⵙⵉⴷⴼ ⴳⵔ ⵉⵙⵡⵉⵔⵏ ⵏ ⵜⴼⴰⵡⵜ ⵜⴰⴷⴰⵡⵙⴰⵏⵜ ⴷ ⵓⵣⴳⴳⵯⵣ ⵏ ⵜⵎⵏⴰⴹⵜ ⵜⴰⴷⴰⵡⵙⴰⵏⵜ ⴳ ⵜⴳⵍⴷⵉⵜ, ⵉⵙⴰⵡⵍ ⴼ ⵓⵙⵎⵓⵜⵜⴳ ⵏ ⵢⵉⴳⵔⴰⵏ ⴰⴽⴽⵯ ⴰⴼⴰⴷ ⴰⴷ ⵉⵣⵔⴱ ⵓⵙⵡⵓⵔⵉ ⵏ ⵜⵔⵓⴱⴱⴰ ⵜⵉⴷⴰⵡⵙⴰⵏⵉⵏ ⵜⵉⵏⴰⴽⴰⵍⵉⵏ ⵏⵏⴰ ⵉⵙⵜⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷ ⵜ ⵉⵏⵚⵕ ⵕⴱⴱⵉ, ⵙ ⵓⵙⵜⴰⵢ ⵏ 5 ⵉⵏⵎⵀⴰⵍⵏ ⵉⵎⴰⵜⴰⵢⵏ ⵏⵏⵙⵏⵜ.
ⵉⵙⵙⵉⵎⵖⵓⵔ ⵎⴰⵙⵙ ⴰⵏⵙⵙⵉⵅⴼ ⵏ ⵓⵏⴰⴱⴰⴹ, ⴰⵙⵡⵓⴷⴷⵓ ⵉⴼⵓⵍⴽⵉⵏ ⵏ ⵓⵖⴰⵡⴰⵙ ⵏ ⵓⵙⴰⴷⴼ ⵏ ⵜⵎⵔⵙⴰⵍ ⵏ ⵜⴼⴰⵡⵜ ⵜⴰⴷⴰⵡⵙⴰⵏⵜ ⵜⴰⵎⵣⵡⴰⵔⵓⵜ, ⵙⵍⴰⵀⵡⴰⵏ ⴰⴽⴽⵯ ⴷⴼⴼⵉⵔ ⵏ ⵓⵙⵎⴷ ⵏ ⵓⵙⴰⴷⴼ ⵏ 1400 ⵏ ⵡⴰⵎⵎⴰⵙ ⴰⴷⴰⵡⵙⴰⵏ, ⴷ ⵓⵙⵏⵜⵉ ⴳ ⵓⵣⴳⴳⵯⵣ ⵏ ⵓⴳⵣⵣⵓⵎ ⵡⵉⵙⵙ ⵙⵉⵏ ⵏ ⵓⵖⴰⵡⴰⵙ, ⵉⵙⵙⴽⵜⵉ ⴷ ⵜⵉⴳⴰⵡⵉⵏ ⵏ ⵓⵏⴰⴱⴰⴹ ⵉⵜⵜⵓⵙⴽⴰⵔⵏ ⵉ ⵓⵙⵔⵙ ⵏ ⵜⵉⵔⵙⴰⵍ ⵏ ⵓⵏⴰⴳⵔⴰⵡ ⴰⴷⴰⵡⵙⴰⵏ ⵉⵎⵓⵔⵙⵏ ⴷ ⵓⵣⵔⴼⴰⵏ, ⵉⵙⵔⵙⵏ ⴰⵏⴰⵎⵓⵔ ⴳ ⵡⴰⵎⵎⴰⵙ ⵏ ⵜⵉⵣⵡⵓⵔⴰ ⵏⵏⵙ, ⴰⵣⵣⴳⵉⵔ ⵉ ⵉⵏⴹⵏ ⵉⴳⵍⴷⴰⵏⵏ ⵢⴰⵜⵜⵓⵢⵏ.
ⵉⵜⵜⵓⵙⵎⵏⵉⴷ ⴰⵡⴷ ⴳ ⵓⴳⵔⴰⵡ ⴰⴷ ⴰⵙⵡⵓⴷⴷⵓ ⵉⵜⵜⵓⵙⴽⴰⵔⵏ ⴳ ⵓⵣⴳⴳⵯⵣ ⵏ ⵉⵙⵏⵜⴰⵢ ⵉⵎⵙⴽⴰⵔⵏ, ⵙⵍⴰⵀⵡⴰⵏ ⴰⴽⴽⵯ ⴰⵙⵡⵓⵔⵉ ⵏ ⵜⵔⵓⴱⴱⴰ ⵜⵉⴷⴰⵡⵙⴰⵏⵉⵏ ⵜⵉⵏⴰⴽⴰⵍⵉⵏ, ⵍⵍⵉⵖ ⵉⵜⵜⵓⵣⵎⵎⴻⵎ ⵢⴰⵏ ⵓⵎⵓⵙⵙⵓ ⵉⴼⵓⵍⴽⵉⵏ ⴳ ⵜⵉⵔⵎⵉⵜ ⵜⴰⵎⵣⵡⴰⵔⵓⵜ ⵏⵏⴰ ⵉⴱⴷⴰⵏ ⴳ ⵜⵎⵏⴰⴹⵜ ⵏ ⵟⴰⵏⵊⴰ-ⵜⵉⵟⵟⴰⵡⵉⵏ-ⵍⵃⵓⵙⵉⵎⴰ, ⵙⵍⴰⵀⵡⴰⵏ ⴰⴽⴽⵯ ⴳ ⵓⵙⵡⵉⵔ ⵏ ⵓⵙⵖⵍ ⵏ ⵉⵎⵙⵙⵓⴳⵓⵔⵏ ⵏⵏⴰ ⵉⵎⵎⵓⵖⵔⵏ ⴳ ⵓⵙⴰⵊⵊⵉ, ⴷ ⵓⵙⵉⴳⴳⵍ ⵏ ⵉⵎⵙⵜⴳⴳⴰⵔⵏ ⵉⵎⵙⴰⵙⴰⵏⵏ, ⴷ ⵓⵙⴼⴰⵍⴽⵉ ⵏ ⵓⵎⵢⴰⵡⴰⵙ ⴳⵔ ⵜⵎⵔⵙⴰⵍ ⵜⵉⴷⴰⵡⵙⴰⵏⵉⵏ ⴳ ⵜⵎⵏⴰⴹⵜ.
ⵜⴱⴷⴷ ⵜⵙⵇⵇⵉⵎⵜ ⴼ ⵓⵙⵡⵓⴷⴷⵓ ⵏ ⵉⵙⵏⵜⴰⵢ ⵏ ⵜⵉⵔⵙⴰⵍ ⵜⵉⴷⴰⵡⵙⴰⵏⵉⵏ, ⴳ ⵓⵙⴰⵜⵉ ⴰⴷ, ⵉⵜⵜⵓⵙⴷⴷⵉⴷ ⴼ ⵓⵣⵣⵔⴱ ⵏ ⵓⵣⴳⴳⵯⵣ ⵏ ⵉⵙⵏⵜⴰⵢ ⵉⵙⴳⵏⴰⴼⵏ ⵉⵎⵇⵇⵔⴰⵏⵏ, ⵍⵍⵉⵖ ⵔⴰⴷ ⵜⵥⵕ ⵓⵙⴳⴳⵯⴰⵙ ⵏ 2026, ⴰⵙⵎⴷ ⵏ 15 ⵏ ⵓⵙⵏⵜⵉ ⴰⵙⴳⵏⴰⴼ ⴳ ⵜⵎⵏⴰⴹⵉⵏ ⵏ ⵜⴳⵍⴷⵉⵜ, ⴰⵢⵍⵍⵉ ⵔⴰⴷ ⵉⵙⵙⵉⵣⵡⵔ ⴰⵙⴷⵓⵙ ⵏ ⵓⵙⵏⵎⴰⵍⴰ ⴰⴷⴰⵡⵙⴰⵏ ⵙ ⵡⴰⵜⵜⴰⵢ ⵏ 3.000 ⵏ ⵓⵙⵓ ⵉⵜⵜⵓⵔⵏⴰⵏ, ⴳ ⵓⵙⴰⵜⵉ ⵏ ⵓⴹⴼⴼⵓⵕ ⵏ ⵓⵙⴷⵓⵙ ⵏ ⵜⵉⵔⵙⴰⵍ ⵜⵉⴷⴰⵡⵙⴰⵏⵉⵏ, ⴷ ⵓⴹⵎⴰⵏ ⵏ ⵓⵎⵙⴰⵙⴰ ⴰⵏⴰⴽⴰⵍ ⵉⴼⵓⵍⴽⵉⵏ.
ⵉⵜⵜⵓⵣⵎⵎⴻⵎ ⵓⴹⴼⴼⵓⵕ ⵏ ⵓⵣⴳⴳⵯⵣ ⵏ ⵓⵖⴰⵡⴰⵙ ⵏ ⵓⵙⵏⵜⵉ ⵏ 6 ⵡⴰⵎⵎⴰⵙⵏ ⵉⵙⴳⵏⴰⴼⵏ ⵉⵙⴷⴰⵡⴰⵏⵏ, ⵙ ⵢⴰⵏ ⵓⵙⵙⴰⵔⵓ ⵉⵣⵔⵉⵏ 20.6 ⵎⵍⵢⴰⵔ ⵏ ⵓⴷⵔⵀⴰⵎ, ⵙ ⵢⴰⵜ ⵜⵥⴹⴰⵕⵜ ⵏ 3807 ⵏ ⵜⵡⵓⵊⴰ, ⵍⵍⵉⵖ ⵉⴳⴰ ⵡⴰⵎⵎⴰⵙ ⴰⵙⴳⵏⴰⴼ ⴰⵙⴷⴰⵡⴰⵏ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ ⴳ ⵓⴳⴰⴷⵉⵔ ⵢⴰⵏ ⵓⵎⴷⵢⴰ ⵉⴼⵓⵍⴽⵉⵏ ⴳ ⵉⵙⴳⵏⴰⴼⵏ ⵏ ⵜⴰⵙⵓⵜ ⵜⴰⵎⴰⵢⵏⵓⵜ ⵙ ⵓⵙⴷⵓⵙ ⵏⵏⵙ ⵙ ⵉⵎⴰⵙⵙⵏ ⵉⵇⵏⵉⵢⵉⵏ ⵉⵎⴰⵢⵏⵓⵜⵏ.
ⴳ ⵓⵙⵡⵉⵔ ⵏ ⵜⴼⴰⵡⵜ ⵜⴰⴷⴰⵡⵙⴰⵏⵜ ⵜⴰⵎⵣⵡⴰⵔⵓⵜ, ⵜⴱⴷⴷ ⵜⵙⵇⵇⵉⵎⵜ ⴼ ⵓⵙⵡⵓⴷⴷⵓ ⵏ ⵓⵣⴳⴳⵯⵣ ⵏ ⵓⵖⴰⵡⴰⵙ ⵏ ⵓⵙⴰⴷⴼ ⵏ 1600 ⵏ ⵡⴰⵎⵎⴰⵙ ⴰⴷⴰⵡⵙⴰⵏ ⴰⵎⴰⵢⵏⵓ, ⵙ ⵢⴰⵏ ⵓⵙⴰⵜⵉ ⴰⵥⵕⴼⴰⵏ ⵏ 7 ⵉⵎⵍⵢⴰⵔⵏ ⵏ ⴷⴷⵔⵀⵎ, ⴳ ⵓⴹⴼⴼⵓⵕ ⵏ ⵓⵖⴰⵡⴰⵙ ⵏⵏⴰ ⵉⵙⵙⵉⵣⵡⵔⵏ ⴰⵙⴰⴷⴼ ⵏ 1400 ⵏ ⵡⴰⵎⵎⴰⵙ, ⵍⵍⵉⵖ ⵜⴰⵎⵓ ⵜⵎⵔⵃⴰⵍⵜ ⵜⴰⵎⵣⵡⴰⵔⵓⵜ ⴰⵙⵏⵎⴰⵍⴰ ⵏ 500 ⵏ ⵡⴰⵎⵎⴰⵙ ⴳ ⵓⵙⴳⴳⵯⴰⵙ ⵏ 2026, ⴰⵢⵍⵍⵉ ⵉⵙⴷⵓⵙⵏ ⵜⵉⵏⴰⴼⵓⵜⵉⵏ ⵏ ⵜⴰⵥⵉⵜ ⴷ ⵉⵙⵔⵙⵏ ⵜⴰⵣⵔⴼⵜ ⵜⴰⵏⴰⴽⴰⵍⵜ ⴳ ⵓⵙⵉⴷⴼ ⵙ ⵓⵙⴰⵊⵊⵉ, ⵙⵍⴰⵀⵡⴰⵏ ⴰⴽⴽⵯ ⴳ ⵜⵎⵏⴰⴹⵉⵏ ⵜⵉⴼⴰⵔⴰⵏⵉⵏ.
ⵉⵎⵙⴰⵙⴰ ⴷ ⵓⵙⴳⴳⴷ ⴰⵎⵓⵟⵟⵓⵏ, ⵉⵜⵜⵓⵣⵎⵎⴻⵎ ⵢⴰⵏ ⵓⵙⵡⵓⴷⴷⵓ ⴰⵎⵇⵇⵔⴰⵏ ⴳ ⵎⵏⵏⴰⵡ ⵏ ⵉⵙⵏⵜⴰⵢ ⵉⵎⵙⴽⴰⵔⵏ, ⵍⵍⵉⵖ ⵜⵍⴽⵎ ⵜⴳⵎⵉⴹⵉ ⵏ ⵓⵙⵎⵓⵜⵜⴳ ⵏ ⵉⵙⴼⴽⴰ ⵉⵎⵙⴰⵙⴰⵏ ⴷ ⵓⵙⵏⵜⵉ ⵏ ⵜⴽⵕⴹⴰ ⵜⴰⴷⴰⵡⵙⴰⵏⵜ ⴰⵜⵜⴰⵢ ⵏ 95%, ⵎⴽⵍⵍⵉ ⵉⵜⵜⵓⵙⵎⴷ ⵓⵙⴱⵓⵖⵍⵓ ⵏ ⵢⴰⵜ ⵜⴷⴰⴱⵓⵜ ⵜⴰⵎⵓⵟⵟⵓⵏⵜ ⵜⴰⵏⴰⵎⵓⵔⵜ ⵉⵎⵙⴰⵙⴰⵏ ⵏⵏⴰ ⵉⵙⵎⵓⵏⵏ ⵉⵙⴼⴽⴰ ⵏ ⵢⵉⴳⵔ ⴰⴳⴷⵓⴷⴰⵏ ⴷ ⵓⵙⵍⵉⴳ, ⴰⴼⴰⴷ ⴰⴷ ⵉⵜⵜⵓⵙⵏⵜⵉ ⴳ ⵜⵎⵔⵃⴰⵍⵜ ⵜⴰⵏⴳⴳⴰⵔⵓⵜ ⴷⴰⵜ ⴰⴷ ⵜⵜⵓⵙⵎⵏⵉⴷ ⵉ ⵉⵎⵙⵜⴳⴳⴰⵔⵏ ⴰⴽⴽⵯ, ⴰⵢⵍⵍⵉ ⵉⵙⴷⵓⵙⵏ ⵜⴰⵏⴱⴰⴹⵜ ⵏ ⵓⵏⴰⴳⵔⴰⵡ ⴰⴷⴰⵡⵙⴰⵏ ⴷ ⵉⵙⴼⴰⵍⴽⵉ ⴰⴱⵟⵟⵓ ⵏ ⵉⵙⵓⴳⴰⵎ.
ⵙⵡⵍⵏ ⴰⵡⴷ ⵅⴼ ⵓⵙⵏⵜⵉ ⵏ ⵓⵙⴷⴰⵡ ⴰⵎⵙⵏⵉⵊⵊⵉ ⵉⵎⵓⵏ ⴷ ⵜⴰⴽⴰⵕⴹⴰ ⵜⴰⵙⴰⵊⵊⵉⵜ ⵜⴰⵍⵉⴽⵟⵕⵓⵏⵉⵜ, ⵙ ⵓⵙⴷⴷⵉⴷ ⴼ ⵓⵙⵎⴷ ⵏ ⵓⴳⵣⵣⵓⵎ ⴰⵜⵉⵇⵏⵉ ⴷ ⵓⵙⵎⵓⵜⵜⴳ ⵉ ⵓⵙⵏⵜⵉ ⵏ ⵓⵣⴳⴳⵯⵣ ⵉⵎⵉⴽ ⵙ ⵉⵎⵉⴽ ⴳ ⵓⵙⴳⴳⵯⴰⵙ ⵏ 2026, ⵍⵍⵉ ⵉⴳⴰ ⵓⵡⵜⵜⴰⵙ ⵏⵏⵙ ⴰⵙⴷⵓⵙ ⵏ ⵓⴹⴼⴼⵓⵕ ⵏ ⵓⵙⵉⵊⵊⵉ, ⴷ ⵓⵙⴼⴰⵍⴽⵉ ⵏ ⵓⵎⵢⴰⵡⴰⵙ ⵏ ⵉⴱⵔⵉⴷⵏ ⵏ ⵓⵙⵉⴳⴳⵍ, ⴷ ⵓⵙⴼⵙⵙⵉ ⵏ ⵜⵎⵙⴽⴰⵔ, ⴳ ⵓⵙⴰⵜⵉ ⵏ ⵢⴰⵏ ⵓⵏⴰⴳⵔⴰⵡ ⴰⵎⵓⵟⵟⵓⵏ ⵉⴼⵔⴳⵏ ⴷ ⵓⵣⵔⴼⴰⵏ ⴷ ⵉⵎⵙⴰⵙⴰⵏ ⴳⵔ ⵉⵏⴰⴳⵔⴰⵡⵏ ⴰⴽⴽⵯ.
ⴱⴷⴷⵏ ⴰⵡⴷ ⴼ ⵓⵙⵡⵓⴷⴷⵓ ⵏ ⵓⵙⴱⵓⵖⵍⵓ ⵏ ⵓⵏⴰⴳⵔⴰⵡ ⵏ ⵜⵡⵉⵙⵉ ⵜⴰⴷⴰⵡⵙⴰⵏⵜ ⵜⴰⵖⴰⵡⵍⴰⵏⵜ, ⵙⴳ ⵓⵎⴷⵢⴰ ⴰⵎⵏⴰⴹ ⵍⵍⵉ ⵉⵜⵜⵙⵔⵙⵏ ⴳ ⵓⵙⵡⵉⵔ ⵏ ⵜⵎⵏⴰⴹⵜ ⵏ ⵕⵕⴱⴰⵟ-ⵙⵍⴰ-ⵇⵏⵉⵟⵕⴰ, ⵍⵍⵉⵖ ⵉⵜⵜⵙⴽⴰⵔ ⴰⵙⵉⵡⵙ ⵏ ⵓⵎⴷⵢⴰ ⴰⴷ ⵉⵎⵉⴽ ⵙ ⵉⵎⵉⴽ, ⵙ ⵓⵙⵡⵓⵔⵉ ⵏ ⵜⵔⵓⴱⴱⴰ ⵜⵉⴷⴰⵡⵙⴰⵏⵉⵏ ⵜⵉⵏⴰⴽⴰⵍⵉⵏ ⵢⴰⴹⵏ, ⴰⵢⵍⵍⵉ ⵉⵜⵜⴰⵡⵙⵏ ⴳ ⵓⵙⴼⴰⵍⴽⵉ ⵏ ⵜⵉⵣⵣⵍⴰ ⵏ ⵓⵙⵉⴷⴼ ⴷ ⵜⵖⴰⵔⴰⵙⵜ ⵏ ⵓⵙⵉⴳⴳⵍ ⵙ ⵡⴰⴷⴷⴰⴷⵏ ⵉⵖⴰⵡⵍⴰⵏⵏ, ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴳⵔ ⵉⵎⵙⵜⴳⴳⴰⵔⵏ ⴰⴽⴽⵯ.
ⴳ ⵓⵎⵏⵉⴷ ⴰⴷ ⵏⵉⵜ, ⵜⴻⵜⵜⵓⵙⵎⴰⵢⵏⵓ ⵜⴷⴰⴱⵓⵜ ⵜⴰⵎⵓⵟⵟⵓⵏⵜ "ⴰⵚⵕⴰⴹ ⵏ ⵜⴷⵓⵙⵉ" ⵙ ⵓⵙⵔⵓⵙ ⵏ ⵢⴰⵏ ⵓⵏⴰⴳⵔⴰⵡ ⴰⵏⴰⵎⵓⵔ ⵉⵎⵙⴰⵙⴰⵏ ⵉ ⵓⵙⵡⵓⴷⴷⵓ ⵏ ⵉⵚⵕⴰⴹⵏ ⵏ ⵉⵏⵎⵓⵔⵉⵏ, ⵍⵍⵉ ⵉⵜⵜⵓⵙⴷⵓⵙⵏ ⵙ ⵢⴰⵏ ⵡⴰⵎⵎⴰⵙ ⴰⵏⴰⵎⵓⵔ ⵏ ⵓⵙⵙⴼⵍⴷ ⴷ ⵉⵎⴰⵙⵙⵏ ⵉⵎⴰⵟⵟⵓⵏⵏ ⵉⵎⴰⵢⵏⵓⵜⵏ ⵃⵎⴰ ⴰⴷ ⵢⵉⵍⵉ ⵓⴹⴼⴼⵓⵕ ⵉⵎⵓⵔⵙⵏ ⵉ ⵉⵚⵕⴰⴹⵏ ⴰⴽⴽⵯ. ⵢⵉⵍⵉ ⴰⵡⴷ ⵓⵣⵎⵎⴻⵎ ⵏ ⵓⵙⵡⵓⴷⴷⵓ ⴳ ⵓⵙⵎⴰⵟⵟⵓⵏ ⵏ ⵜⵙⵏⵓⵔⴰⵢⵜ ⵜⴰⵎⵖⵔⵉⴱⵉⵜ ⵏ ⵉⵙⴰⴼⴰⵔⵏ ⴷ ⵉⴼⴰⵔⵙⵏ ⵉⴷⴰⵡⵙⴰⵏⵏ, ⵙ ⵓⵙⵏⵜⵉ ⵏ ⵉⴼⵔⴷⵉⵙⵏ ⵉⵎⵣⵡⵓⵔⴰ ⵏ ⵓⵙⴽⵙⵍ ⴰⵎⵓⵟⵟⵓⵏ ⵉⵎⵓⵏ, ⴷ ⵓⴹⴼⴼⵓⵕ ⵏ ⵓⵙⴱⵓⵖⵍⵓ ⵏ ⵜⵏⵓⴼⴰ ⵏⵏⵙ ⵢⴰⴹⵏ, ⴰⵢⵍⵍⵉ ⵉⵙⴷⵓⵙ ⵜⵙⵓⵙⵖⵜ ⴷ ⵉⵙⴼⴰⵍⴽⵉ ⴰⵙⵡⵓⴷⴷⵓ ⵏ ⵜⵎⵙⴽⴰⵔ ⵉⵎⵙⴰⵙⴰⵏ ⴷ ⵉⵎⵙⵢⵓⴼⴰ ⵉⴷⴰⵡⵙⴰⵏⵏ.