ⵉⵏⵏⵓⵕⵥⵎ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⴰⵙⵏⵜⵉ ⵏ ⵢⴰⵜ ⵜⵔⴰⴱⴱⵓⵜ ⵏ ⵉⵙⵏⴼⴰⵕⵏ ⵏ ⵜⴳⵎⵉ ⴳ ⵜⴼⵔⴰⵡⵜ

• ⴰⵙⵔⵓⵙ ⵏ ⵓⵥⵕⵓ ⴰⵙⵉⵍⴰⵏ ⵉ ⵜⵓⵚⴽⴰ ⵏ ⵓⵙⴳⵏⴰⴼ ⵢⴰⵥⵏ ⵙ ⵜⵥⴹⴰⵕⵜ ⵏ 45 ⵏ ⵜⵙⵉⵢⵉⵏ ;
• ⴰⵙⵏⵜⵉ ⵏ ⵓⵙⵏⴼⴰⵕ ⵏ ⵜⵓⵚⴽⴰ ⵏ ⵓⴳⴰⴷⴰⵣ ⴰⵏⵉⵎⴰⵍ ⴷ ⵓⴳⴰⴷⴰⵣ ⵏ ⵉⵎⵓⴷⴰⵔ ⴷ ⵜⴳⵣⵣⴰⵔⵜ ⵙ ⵜⵎⴰⵎⴽⵉⵏ ⵜⵉⵜⵔⴰⵔⵉⵏ ;
• ⵓⵙⵔⵓⵙ ⵏ ⵢⴰⵏ ⵓⵙⴰⵢⵔⴰⵔ ⵏ ⵓⵙⴼⵙⵔ ⴷ ⵓⵣⵏⵣⵉ ⵏ ⵢⴰⴼⵓⵜⵏ ⵏ ⵜⵉⵏⴹⵉ ⴷ ⵜⴷⴰⵎⵙⴰ ⵜⴰⵏⴰⵎⵓⵏⵜ ⴷ ⵓⵎⵢⴰⵡⵙ.
   

ⵉⵏⵏⵓⵕⵥⵎ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵄⴰⵣⵉⵣ ⴰⵅⵏⵓⵛ, ⴰⵙⵙ ⵏ ⵓⵢⵏⴰⵙ 27 ⵉⴱⵔⵉⵔ 2026 ⴳ ⵜⴼⵔⴰⵡⵜ, ⴰⵙⵏⵜⵉ ⵏ ⵢⴰⵜ ⵜⵔⴰⴱⴱⵓⵜ ⵏ ⵉⵙⵏⴼⴰⵕⵏ ⵏ ⵜⴳⵎⵉ, ⵙ ⵜⵉⵍⵉⵜ ⵏ ⵓⵎⴰⵡⵙⴰⵙ ⵏ ⵜⴷⵓⵙⵉ ⴷ ⵡⴰⵔⴰⵢ ⴰⵏⴰⵎⵓⵏ ⴷ ⵍⵡⴰⵍⵉ ⵏ ⵜⵎⵏⴰⴹⵜ ⵏ ⵙⵓⵙ ⵎⴰⵙⵙⴰ ⴷ ⵓⵏⵎⵀⴰⵍ ⴰⵎⴰⵜⴰⵢ ⵏ ⵜⵔⴰⴱⴱⵓⵜ ⵜⴰⴷⵓⵙⴰⵏⵜ ⵜⴰⵏⴰⴽⵍⴰⵏⵜ ⵏ ⵜⵎⵏⴰⴹⵜ ⵏ ⵙⵓⵙ ⵎⴰⵙⵙⴰ ⴷ ⵎⵏⵏⴰⵡ ⵉⵎⴳⴳⴰⴳⵏ ⵉⴷⵖⴰⵔⴰⵏⵏ.
ⴽⵛⵎⵏ ⵉⵙⵏⴼⴰⵕⵏ ⴰⴷ ⵏ ⵜⴳⵎⵉ ⴳ ⵓⵙⴰⵜⵉ ⵏ ⵜⵉⵔⴰⵜ ⵏ ⵜⵏⴱⴰⴹⵜ ⵅⴼ ⵓⵙⵎⵓⵜⵜⴳ ⴰⵎⴰⵜⴰⵢ ⵏ ⵉⴳⵔⴰⵏ ⵉⵏⴰⴽⴰⵍⵏⵏ ⴷ ⵓⵙⵉⵍⵍⴼ ⵏ ⵉⵎⵣⴰⵔⴰⵢⵏ ⵉⵏⴰⵎⵓⵏⵏ ⴷ ⵉⵏⴰⴽⴰⵍⵏ, ⵙ ⵓⵎⵙⴰⵙⴰ ⵏ ⵜⴰⵔⴰⵜⵉⵏ ⵜⵉⴳⵍⴷⴰⵏⵉⵏ ⵢⴰⵜⵜⵓⵢⵏ, ⵍⵍⵉ ⵎⵓ ⵉⴳⴰ ⵓⵡⵜⵜⴰⵙ ⵏⵏⵙ ⴰⵙⵇⵔⴱ ⵏ ⵜⵓⴳⴳⴰⵙ ⵜⵉⵅⴰⵜⴰⵔⵉⵏ ⵏ ⵜⴳⵎⵉ ⵏⵏⴰ ⵜⵙⴽⴰⵔ ⵜⵡⴰⵏⴽⵜ ⵉ ⵜⵏⴰⵎⵓⵔⵉⵏ ⴷ ⵉⵏⴰⵎⵓⵔⵏ.
ⴳ ⵢⵉⴳⵔ ⵏ ⵜⴷⵓⵙⵉ, ⵉⵙⵔⵙ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴰⵥⵕⵓ ⴰⵙⵉⵍⴰⵏ ⵏ ⵜⵓⵚⴽⴰ ⵏ ⵓⵙⵏⴼⴰⵕ ⵏ ⵓⵙⴳⵏⴰⴼ ⵏ ⵢⴰⵥⵏ ⴳ ⵜⴼⵔⴰⵡⵜ, ⵏⵏⴰ ⵔⴰⴷ ⵉⵜⵜⵓⵙⴽⴰ ⵅⴼ ⵢⴰⵜ ⵜⵊⵓⵎⵎⴰ ⵏ 4 ⵉⵀⵉⴽⵜⴰⵔⵏ, ⵙ ⵢⴰⵏ ⵓⵥⵕⴼ ⴰⵎⴰⵜⴰⵢ ⵏ 227 ⵉⴷ ⵎⵍⵢⵓⵏ ⵏ ⴷⴷⵔⵀⵎ, ⴷ ⵜⵥⴹⴰⵕⵜ ⵏ 45 ⵏ ⵜⵙⵉⵢⵉⵏ. ⵉⵡⵜⵜⵙ ⵓⵙⵏⴼⴰⵕ ⴰⴷ ⴰⴷ ⵉⵙⵙⵔⵅⴰ ⴰⴽⵛⵛⵓⵎ ⵏ ⵉⵏⴰⵎⵓⵔⵏ ⵙ ⵜⵏⴰⴼⵓⵜⵉⵏ ⵜⵉⴷⵓⵙⴰⵏⵉⵏ ⵜⵉⵙⵉⵍⴰⵏⵉⵏ, ⴷ ⴰⴷ ⴰⵙⵏ ⵉⵙⵙⵉⵅⴼ ⵜⴰⵎⴰⵔⴰ ⴷ ⵓⵙⵇⵇⴰⵎ ⵏ ⵓⵎⵓⴷⴷⵓ ⵙ ⵜⵎⵏⴰⴹⵉⵏ ⵢⴰⴹⵏⵉⵏ ⴰⴼⴰⴷ ⴰⴷ ⴷⴰⵡⴰⵏ, ⵓⵍⴰ ⴰⵙⴷⵓⵙ ⵏ ⵜⴳⵏⴰⴷⵉⵏ ⵏ ⵜⵡⵓⵔⵉ ⵉ ⵉⵎⴰⵣⵣⴰⵍⵏ ⵏ ⵜⴷⵓⵙⵉ, ⴰⴼⴰⴷ ⴰⴷ ⵉⵜⵜⵓⴹⵎⵏ ⵢⴰⵏ ⵓⵙⵉⵍⵍⴼ ⵉⴼⵓⵍⴽⵉⵏ ⴷ ⵢⴰⵏ ⵓⵡⵏⵏⴰⴹ ⴰⵣⵣⵓⵍⴰⵏ ⵉⵙⵙⵔⵖⵓⴷⵏ, ⴷ ⵓⵙⴼⴰⵍⴽⵉ ⴰⵙⵓⵍⴰⵏ ⵏ ⵉⵏⴰⵎⴰⵍⵏ ⵏ ⵜⴷⵓⵙⵉ ⴳ ⵓⵙⵡⵉⵔ ⴰⵏⵎⵏⴰⴹ.
ⵔⴰⴷ ⵉⴼⴽ ⵓⵙⴳⵏⴰⴼ ⵢⴰⵜ ⵜⵔⴰⴱⴱⵓⵜ ⵉⵎⵣⴰⵔⴰⵢⵏ ⵏ ⵜⵏⴰⴼⵓⵜⵉⵏ ⵜⵉⵎⵙⴰⵙⵏⵉⵏ ⴷ ⵜⵉⴷⵓⵙⴰⵏⵉⵏ ⵉ ⵡⴰⵜⵜⴰⵢ ⵏ 70.000 ⵏ ⵓⵎⵣⴷⴰⵖ ⵏ ⵜⴰⵙⴳⴰ ⵏ ⵜⵉⵣⵏⵉⵜ, ⵍⵍⵉ ⵢⵙⵎⵓⵏⵏ ⵜⴰⵙⴰⵙⴼⵔⵜ ⵜⴰⵎⴰⵜⴰⵢⵜ ⴷ ⵜⵥⵍⴰⵢⵜ, ⵜⴰⵊⵉⵕⴰⵃⵜ ⵜⴰⵎⴰⵜⴰⵢⵜ, ⵜⴰⵙⴰⵙⴼⵔⵜ ⵏ ⵜⵎⵖⴰⵔⵉⵏ ⴷ ⵓⵙⴰⵔⵓ, ⵜⴰⵙⴰⵙⴼⵔⵜ ⵏ ⵉⵎⵥⵢⴰⵏⵏ, ⵜⴰⵙⴰⵙⴼⵔⵜ ⵏ ⵓⵙⵙⵏⵜⵍ ⴷ ⵓⵙⵙⵉⵎⵙ, ⵜⴰⵙⴰⵙⴼⵔⵜ ⵏ ⵉⵥⵏⵥⴰⵕⵏ, ⵓⵍⴰ ⵜⵉⵎⵓⴹⴰⵏ ⵏ ⵜⵙⵉⵢⵉⵏⵏⴼⵙ ⴷ ⵜⵎⵓⴹⴰⵏ ⵏ ⵓⵍ ⴷ ⵉⵥⵓⵕⴰⵏ ⴷ ⵓⵙⴰⵙⴼⵔ ⵏ ⵉⵏⴼⵔⴰⴳⵏ, ⴰⴼⴰⴷ ⴰⴷ ⵉⵜⵜⵓⴹⵎⵏ ⵓⵙⵉⵍⵍⴼ ⴰⵎⴰⵜⴰⵢ ⵉ ⵉⵎⵓⴹⴰⵏ ⴷ ⵜⵎⵔⴰⵔⵓⵜ ⵅⴼ ⵉⵙⵖⴰⵡⵙⵏ ⵏⵏⵙⵏ ⵉⴷⵓⵙⴰⵏⵏ.
ⴳ ⵎⴰ ⵉⵣⴷⵉⵏ ⴷ ⵜⴷⴰⵎⵙⴰ ⵜⴰⵏⴰⵎⵓⵏⵜ ⴷ ⵜⴰⵎⵇⵇⵓⵏⵜ, ⵉⵜⵜⵓⵙⵎⵏⵉⴷ ⵉ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ, ⴰⵙⵏⴼⴰⵕ ⵏ ⵓⵙⵏⴼⵍⵓⵍ ⴷ ⵓⵙⵎⵓⵜⵜⴳ ⵏ ⵢⴰⵏ ⵓⵙⴰⵢⵔⴰⵔ ⵏ ⵓⵙⴼⵙⵔ ⴷ ⵓⵣⵏⵣⵉ ⵏ ⵢⴰⴼⵓⵜⵏ ⵏ ⵜⵉⵏⴹⵉ ⴳ ⵜⴳⵔⴰⵡⵜ ⵏ ⵜⴼⵔⴰⵡⵜ, ⴷ ⵢⴰⵏ ⵓⵙⵏⴼⴰⵕ ⵢⴰⴹⵏ ⵉⵣⴷⵉⵏ ⴷ ⵓⵙⵎⵙⴰⵙⴰ ⵏ ⵓⴳⴰⴷⴰⵣ ⵏ ⵜⵉⵏⴹⵉ, ⴰⵛⴽⵓ ⵉⵡⵜⵜⵙⵏ ⵉⵙⵏⴼⴰⵕⵏ ⴰⴷ ⴰⴷ ⵙⵉⵍⵖⵏ ⴰⵢⴷⴰ ⴰⵏⴰⵎⵓⵔ ⴷ ⵓⵙⵎⵖⵔ ⵏ ⵜⵉⵥⴹⴰⵕⵉⵏ ⵜⵉⵎⴰⵍⵍⴰⵢⵉⵏ ⵏ ⵜⵎⵏⴰⴹⵜ.
ⴳ ⵓⵎⵏⵉⴷ ⴰⴷ, ⵉⵔⵣⴼ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴰⵙⵏⴼⴰⵕ ⵏ ⵜⵓⵚⴽⴰ ⵏ ⵓⴳⴰⴷⴰⵣ ⴰⵏⵉⵎⴰⵍ ⴷ ⵓⴳⴰⴷⴰⵣ ⵏ ⵉⵎⵓⴷⴰⵔ ⵍⵍⵉ ⵉⵍⵍⴰⵏ ⵅⴼ ⵢⴰⵜ ⵜⵊⵓⵎⵎⴰ ⵜⴰⵎⴰⵜⴰⵢⵜ ⵉⵣⵔⵉⵏ 16 ⵏ ⵉⴼⴹ ⵏ ⵓⵎⵉⵜⵔⵓ ⴰⵎⴽⴽⵓⵥ, ⵏⵏⴰ ⵔⴰⴷ ⵢⴰⵡⵙ ⴳ ⵓⵙⵏⴼⵍⵓⵍ ⵏ ⵜⵉⵎⴰⴹ ⵏ ⵉⵣⵎⴰⵣ ⵏ ⵜⵡⵓⵔⵉ, ⴷ ⵓⵙⵉⵍⵖ ⵏ ⵉⵢⴰⴼⵓⵜⵏ ⵉⴷⵖⴰⵔⴰⵏⵏ, ⴷ ⵓⵙⴷⵓⵙ ⵏ ⵜⵖⵔⴰⴷ ⵏ ⵉⴽⵙⵙⴰⴱⵏ ⵉⴷⵖⴰⵔⴰⵏⵏ, ⴷ ⵓⵙⵃⴷⵔ ⵓⵎⵓⴷⴷⵓ ⵙ ⵜⵉⵣⵏⵉⵜ ⴷ ⵓⴳⴰⴷⵉⵔ ⵉ ⵓⵙⵖⴷⵉ ⴰⵏⵉⵎⴰⵍ.
ⵖⵉⴽⵍⵍⵉ ⵉⴱⵉⴷⴷ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵅⴼ ⵓⵙⵏⴼⴰⵕ ⵏ ⵜⵓⵚⴽⴰ ⵏ ⵜⴳⵣⵣⴰⵔⵜ ⵜⴰⵎⴰⵢⵏⵓⵜ ⵙ ⵜⵎⴰⵎⴽⵉⵏ ⵜⵉⵜⵔⴰⵔⵉⵏ ⴳ ⵜⴳⵔⴰⵡⵜ ⵏ ⵜⴼⵔⴰⵡⵜ, ⵍⵍⵉ ⵔⴰⴷ ⵢⴰⵡⵙ ⴳ ⵓⵙⵃⴷⵔ ⵏ ⵏ ⴰⵢⵍⵍⵉ ⵉⵅⵙⵙⵔⵏ ⴳ ⵡⴰⵏⴰⵡⵏ ⵏ ⵉⴼⵉⵢⵢⵉ ⵍⵍⵉ ⵉⵍⴽⴽⵎⵏ ⴰⵔ 20 % ⴳ ⵜⵉⵎⵉⴹⵉ, ⴷ ⵓⴹⴰⴽⴰⵍ ⵏ ⵜⵕⵡⵉ ⵜⴰⴷⵓⵙⴰⵏⵜ ⵏ ⵓⴼⴰⵔⵙ ⵉⵜⵜⵓⵙⴼⵙⵔⵏ ⴳ ⵉⴳⴰⴷⴰⵣⵏ ⵙ ⵢⴰⵜ ⵜⵉⴹⴰⴼ ⵜⴰⴱⵉⵟⴰⵔⵉⵜ ⵜⴰⵙⵓⵍⴰⵏⵜ.
ⵜⴳⴰ ⵡⴰⵔⵣⴰⴼ ⴰⴷ ⵓⵍⴰ ⵢⴰⵜ ⵜⵎⵍⴷⴰ ⵏ ⵓⵙⵎⵏⵉⴷ ⵏ ⵎⵏⵏⴰⵡ ⵉⵙⵏⴼⴰⵕⵏ ⵉⵜⵜⵓⵖⴰⵡⴰⵙⵏ, ⴳⵉⵙⵏ ⴰⵙⴰⴷⵊⵉ ⴰⵖⵔⵎⴰⵏ ⴷ ⵓⵙⵎⵓⵜⵜⴳ ⵏ ⵉⴷⵓⵕⴰⵏ ⵍⵍⵉ ⵓⵔ ⵉⵟⵟⴰⴼⵏ ⴰⵎⴰⵡⴰⴹ, ⴷ ⵓⵙⵏⴼⵍⵓⵍ ⵏ ⵢⴰⵏ ⵓⵙⴰⵢⵔⴰⵔ ⴰⵣⴳⵣⴰⵡ ⵍⵍⵉ ⵉⵙⵎⵓⵏⵏ ⵉⵙⴰⵢⵔⴰⵔⵏ ⵏ ⵓⵔⴰⵔⵏ ⵏ ⵉⵎⵥⵢⴰⵏⵏ ⴷ ⵓⵙⵏⴼⴰⵕ ⵏ ⵜⵓⵚⴽⴰ ⵏ ⵜⴳⵎⵎⵉ ⵏ ⵓⵎⵃⴹⴰⵕ. ⵢⵉⵍⵉ ⴰⵡⴷ ⵓⵙⵏⴼⴰⵕ ⵏ ⵜⵓⵚⴽⴰ ⵏ ⵢⴰⵏ ⵓⵙⴰⵢⵔⴰⵔ ⵏ ⵓⵙⵏⵎⴰⵍⴰ ⴰⴳⵜⵙⵡⵓⵔⵉⵡⵉⵏ, ⴷ ⵓⵙⵏⴼⴰⵕ ⵉⵣⴷⵉⵏ ⴷ ⵜⵓⵚⴽⴰ ⵏ ⵢⴰⵜ ⵜⵎⵕⵉⵚⵉⵜ ⴷ ⵢⴰⵏ ⵓⵙⵖⵉⵎ ⴰⵎⴰⵢⵏⵓ ⵏ ⵜⴳⵔⴰⵡⵜ ⵏ ⵜⴼⵔⴰⵡⵜ. ⵖⵉⴽⵍⵍⵉ ⵉⵥⵕⴰ ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⴳ ⵡⴰⵔⵣⴰⴼ ⵏⵏⵙ ⵉ ⵜⴼⵔⴰⵡⵜ, ⴰⵙⵏⴼⴰⵕ ⵏ ⵓⵙⵎⵙⴰⵙⴰ ⵏ ⵓⴱⴰⵔⴰⵣ ⴰⴳⵔⴰⵡⴰⵏ ⵍⵍⵉ ⵔⴰⴷ ⵉⵜⵜⵓⵙⵎⵓⵜⵜⴳ ⵙ ⵜⵓⴳⴰ ⵜⴰⵙⵏⵎⵍⴰⵏⵜ, ⴷ ⵎⵏⵏⴰⵡⵜ ⵜⵏⵓⴼⴰ ⵏ ⵜⵓⵏⵏⵓⵏⵜ ⴷ ⵜⵉⵏ ⵜⴷⵓⵙⵉ ⵍⵍⵉ ⴷ ⵉⵇⵇⴰⵏ.