ⴰⴳⵔⴰⵡ ⵏ ⵓⵙⵇⵇⵉⵎ ⵏ ⵜⵏⴱⴰⴹⵜ ⵏ ⵡⴰⵙⵙ ⵏ ⵓⴽⵡⴰⵙ 14 ⵎⴰⵢⵢⵓ 2026
ⵉⵜⵜⵓⵙⴽⴰⵔ ⴰⵙⵙ ⵏ ⵓⴽⵡⴰⵙ 26 ⴷⵉⵍⵇⵉⵄⴷⴰ1447, ⵉⵎⵙⴰⵙⴰⵏ ⴷ 14 ⵎⴰⵢⵢⵓ 2026, ⵓⴳⵔⴰⵡ ⵏ ⵓⵙⵇⵇⵉⵎ ⵏ ⵜⵏⴱⴰⴹⵜ, ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⴰⵏⵙⵙⵉⵅⴼ ⵏ ⵜⵏⴱⴰⴹⵜ. ⵉⵥⵍⵉ ⵓⴳⵔⴰⵡ ⴰⴷ ⵉ ⵓⴹⴼⴼⵓⵕ ⵏ ⵢⴰⵏ ⵓⵙⵎⵏⵉⴷ ⴰⵣⵓⵏⴰⵏ, ⴷ ⵓⵎⴹⴰⴽⴰⵕ ⵏ ⵜⵓⴳⵜ ⵏ ⵉⵙⵏⵜⴰⵢ ⵏ ⵉⴹⵕⵉⵚⵏ ⵉⵣⵔⴼⴰⵏⵏ ⴷ ⵢⴰⵜ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ, ⴷ ⵓⵙⵖⵣⵏ ⵏ ⵉⵙⵓⵎⵔⵏ ⵏ ⵓⵙⵎⴰⵍ ⴳ ⵜⴼⵙⵏⵉⵡⵉⵏ ⵜⵉⵏⴰⴼⵍⵍⴰⵜⵉⵏ ⵙ ⵓⵎⵙⴰⵙⴰ ⴷ ⵓⵎⵏⵏⵉ 92 ⵏ ⵓⴷⵓⵙⵜⵓⵔ.
ⴳ ⵓⵎⵣⵡⴰⵔⵓ ⵏ ⵓⴳⵔⴰⵡ ⴰⴷ, ⵉⴹⴼⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⵢⴰⵏ ⵓⵙⴼⵙⵔ ⵅⴼ ⵓⵙⵎⵓⵜⵜⴳ ⵏ ⵜⴼⴰⵙⴽⴰ ⵜⴰⵎⵇⵇⵔⴰⵏⵜ ⵏ ⵓⵙⴳⴳⵯⴰⵙ 1447 (ⵎⴰⵢⵢⵓ 2026), ⵉⵙⵎⵏⵉⴷ ⵜ ⵎⴰⵙⵙ ⴰⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵎⵔⵜ ⵜⴰⵢⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ.
ⴳ ⵓⵙⴰⵜⵉ ⴰⴷ, ⵉⵙⴷⴷⵉⴷ ⵎⴰⵙⵙ ⴰⵎⴰⵡⵙⴰⵙ ⵉⵙ ⵜⵙⵡⵊⴰⴷ ⵜⵎⴰⵡⴰⵙⵜ, ⵙ ⵓⵎⵢⴰⵡⴰⵙ ⴷ ⵉⵎⴷⵔⴰⵡⵏ ⴰⴽⴽⵯ, ⵢⴰⵏ ⵓⵖⴰⵡⴰⵙ ⵉⵎⵓⵏⵏ ⵉ ⵓⵙⵎⵓⵜⵜⴳ ⵏ ⵜⴼⴰⵙⴽⴰ ⵜⴰⵎⵇⵇⵔⴰⵏⵜ, ⴰⴼⴰⴷ ⴰⴷ ⵜⵉⵍⵉ ⵜⵓⴳⵜ ⵏ ⵉⵣⵉⵎⵎⵔⵏ ⴷ ⵜⵉⵖⴰⴹⵉⵏ ⴳ ⵉⴳⴰⴷⴰⵣⵏ ⵉⵏⴰⵎⵓⵔⵏ, ⴷ ⵓⴹⴼⴼⵓⵕ ⵏ ⵡⴰⴷⴷⴰⴷ ⴰⴷⵡⴰⵙⴰⵏ ⵏ ⵉⵎⵓⴷⴰⵔ ⴷ ⵓⵙⴷⵓⵙ ⵏ ⵜⵓⴳⴳⴰⵙ ⵏ ⵓⴹⵓⴼ.
ⵉⵙⴱⴰⵢⵏ ⴰⵡⴷ ⵎⴰⵙⵙ ⴰⵎⴰⵡⵙⴰⵙ ⵎⴰ ⵙ ⵔⴰⴷ ⵜⴰⵙⵓⵎⵔⵜ ⵏ ⵓⵙⴳⴳⵯⴰⵙ ⴰⴷ ⵔⴰⴷ ⵜⴰⵜⵜⵓⵢ ⵅⴼ ⵓⵙⵓⵜⵔ, ⵙ ⵓⵙⵔⴰⴳ ⵏ ⵓⵖⴰⵡⴰⵙ ⵏ ⵓⵙⵎⴰⵢⵏⵓ ⵏ ⵓⵎⵓⴷⵔ ⴰⵏⴰⵎⵓⵔ ⵏⵏⴰ ⵉⴷⴷⴰⵏ ⵙ ⵜⵉⵏⵎⵍⴰⴷⵉⵏ ⵜⵉⴳⵍⴷⴰⵏⵉⵏ ⵢⴰⵜⵜⵓⵢⵏ, ⴷ ⵓⵙⴼⵓⵍⴽⵉ ⵏ ⵡⴰⴷⴷⴰⴷ ⵏ ⵓⵏⵣⵡⵉ, ⵎⴰ ⵢⴰⴷ ⵢⵓⵊⵊⴰⵏ ⵉⵎⵓⴷⴰⵔ ⵉⵏⴰⵎⵓⵔⵏ ⴰⴷ ⵍⴽⵎⵏ ⴰⵣⴰⵍ ⵏ 40 ⵎⵍⵢⵓⵏ ⵏ ⵉⵅⴼ. ⵉⵏⵏⴰ ⵓⵍⴰ ⵉⵙ ⴰⵎⴹⴰⵏ ⵏ ⵉⵣⵉⵎⵎⵔⵏ ⴷ ⵜⵉⵖⴰⴹⵉⵏ ⵉⵥⵍⵉⵏ ⵉ ⵜⴼⴰⵙⴽⴰ ⵉⴳⴰ ⴳⵔ 8 ⴷ 9 ⵎⵍⵢⵓⵏ ⵏ ⵉⵅⴼ, ⴳ ⵡⴰⴽⵓⴷ ⵏⵏⴰ ⴳ ⵉⴳⴰ ⵓⵙⵓⵜⵔ ⴳⵔ 6 ⴷ 7 ⵎⵍⵢⵓⵏ.
- ⴷⴼⴼⵉⵔ ⵏ ⵎⴰⵢⴰⴷ, ⵉⵎⴹⴰⴽⴰⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⵉⵙⵖⵣⵏ ⴰⵙⵏⵜⵉ ⵏ ⵓⵙⵍⴳⵏ ⵓⵟⵟⵓⵏ 47.25 ⵉⵥⵍⵉⵏ ⵙ ⵓⵏⴳⵔⴰⵡ ⴰⵙⵉⵍⴰⵏ ⵏ ⵉⵎⵙⵡⵓⵔⵉⵏ ⵏ ⵜⴷⴱⵍⵜ ⵏ ⵜⴳⵔⴰⵡⵉⵏ ⵜⵉⴽⴰⵍⴰⵏⵉⵏ, ⵏⵏⴰ ⵉⵙⵎⵏⵉⴷ ⵎⴰⵙⵙ ⴰⵎⴰⵡⵙⴰⵙ ⵏ ⵓⴳⵯⵏⵙⵓ.
- ⵉⵎⴹⴰⴽⴰⵕ ⴰⵡⴷ ⵓⵙⵇⵇⵉⵎ ⵉⵙⵖⵣⵏ ⴰⵙⵏⵜⵉ ⵏ ⵓⵙⵍⴳⵏ ⵓⵟⵟⵓⵏ 69.24 ⵉⵥⵍⵉⵏ ⵙ ⵓⵙⵔⵓⵙ ⴷ ⵓⵙⵓⴷⵙ ⵏ ⵜⵎⵔⵙⵍⵜ ⵏ ⵉⵏⴳⵉⵜⵏ ⵜⵉⵏⴰⵎⵓⵏⵉⵏ ⵉ ⵉⵎⵙⵡⵓⵔⵉⵏ ⵏ ⵜⵙⵏⵢⴰⵏⵜ ⵜⴰⵏⴰⵎⵓⵔⵜ ⵏ ⵓⵃⵟⵟⵓ ⴰⴽⴰⵍⴰⵏ ⴷ ⵜⴽⴰⴷⴰⵙⵜⵔⵉⵜ (ANCFCC), ⵉⵙⵎⵏⵉⴷ ⵜ ⴰⵡⴷ ⵎⴰⵙⵙ ⴰⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵎⵔⵜ ⵜⴰⵢⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ.
- ⵖⵉⴽⵍⵍⵉ ⵉⵎⴹⴰⴽⴰⵕ ⵉⵙⵖⵣⵏ ⵓⵙⵇⵇⵉⵎ ⴰⵙⵏⵜⵉ ⵏ ⵓⵎⵕⵚⵓⵎ ⵓⵟⵟⵓⵏ 2.26.395 ⵉⵥⵍⵉⵏ ⵙ ⵓⵕⵥⵥⵓⵎ ⵏ ⵉⵙⴰⴳⴳⵯⵏ ⵉⵎⴰⵢⵏⵓⵜⵏ ⵉ ⵜⵎⵙⴰⵙⵏⵜ ⵜⴰⵎⴰⵜⴰⵢⵜ.
ⵉⴹⴼⴰⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⵜⵉⵡⵓⵔⵉⵡⵉⵏ ⵏⵏⵙ ⵙ ⵓⵎⴹⴰⴽⴰⵕ ⵅⴼ ⵢⴰⵜ ⵜⵎⵢⴰⵇⵇⴰⵏⵜ ⵉⵥⵍⵉⵏ ⵙ ⵓⵙⵙⵓⵎⵓ ⵉⵎⵙⵏⴼⴰⵍ ⵏ ⵜⵓⴳⴳⵉⵡⵉⵏ ⵏ ⵓⵏⴷⴰⵀ ⴳⵔ ⵜⵏⴱⴰⴹⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⵏⴱⴰⴹⵜ ⵏ ⴱⵓⵔⴽⵉⵏⴰⴼⴰⵙⵓ, ⵏⵏⴰ ⵉⵜⵜⵓⵙⴳⵎⴰⴹⵏ ⴳ ⵡⴰⴳⴰⴷⵓⴳⵓ ⴰⵙⵙ ⵏ 10 ⴷⵓⵊⴰⵏⴱⵉⵔ 2025, ⵉⵙⵎⵏⵉⴷ ⵜ ⵎⴰⵙⵙ ⴰⵎⴰⵡⵙⴰⵙ ⵏ ⵡⴰⵙⵙⴰⵢ ⴷ ⵓⵍⵓⵊⵉⵙⵜⵉⴽ ⵙ ⵉⵙⵎ ⵏ ⵓⵎⴰⵡⴰⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷⵓⵎⵢⴰⵡⴰⵙ ⵏ ⵉⴼⵔⵉⵇⵢⴰ ⴷ ⵉⵎⵖⵉⴱⵉⴱⵉⵏ ⵉⵎⵣⴷⴰⵖ ⵏ ⴱⵕⵕⴰ.
ⵉⵙⵎⴷ ⵓⵙⵇⵇⵉⵎ ⵏ ⵜⵏⴱⴰⴹⵜ ⵜⴰⵡⵓⵔⵉ ⵏⵏⵙ ⵙ ⵓⵎⴹⴰⴽⴰⵕ ⴷ ⵓⵙⵖⵣⵏ ⵏ ⵉⵙⵓⵎⵔⵏ ⵏ ⵓⵙⵎⴰⵍ ⴳ ⵜⴼⵙⵏⵉⵡⵉⵏ ⵜⵉⵏⴰⴼⵍⵍⴰⵜⵉⵏ ⵙ ⵓⵎⵙⴰⵙⴰ ⴷ ⵓⵎⵏⵏⵉ 92 ⵏ ⵓⴷⵓⵙⵜⵓⵔ:
- ⴳ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵍⵎⴷ ⴰⵎⵏⵣⵓ ⴷ ⵜⵓⵏⵏⵓⵏⵜ, ⵉⵜⵜⵓⵙⵎⴰⵍ:
- ⵎⴰⵙⵙ ⵙⴰⵄⵉⴷ ⵍⵄⴰⵍⵍⴰⵎ, ⴰⵏⵎⵀⴰⵍ ⵏ ⵡⴰⵎⵎⴰⵙ ⵏ ⵓⵙⵎⵓⵜⵜⴳ ⵏ ⵉⵎⴳⴳⵉⵡⵙⵏ ⵏ ⵓⵙⵍⵎⴷ.
