ⴰⴳⵔⴰⵡ ⵏ ⵓⵙⵇⵇⵉⵎ ⵏ ⵜⵏⴱⴰⴹⵜ ⵏ ⵡⴰⵙⵙ ⵏ ⵓⴽⵡⴰⵙ 28 ⵖⵓⵛⵜ 2025

• ⴳ ⵓⵎⵣⵡⴰⵔⵓ ⵏ ⵓⴳⵔⴰⵡ ⴰⴷ, ⵉⵎⴹⴰⴽⴰⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⵉⵙⵖⵥⵏ ⴰⵙⵏⵜⵉ ⵏ ⵓⵙⵍⴳⵏ ⵓⵟⵟⵓⵏ 70.24 ⵉⵙⵏⴼⵍⵏ ⵉⵙⵖⵓⴷⴰⵏ ⴰⴹⴰⵀⵉⵔ ⴰⵛⴰⵔⵉⴼ ⵓⵟⵟⵓⵏ 1.84.177 ⵍⵍⵉ ⴷ ⵉⴼⴼⴰⵖⵏ 6 ⵎⵓⵃⴰⵕⵕⴰⵎ 1405 (2 ⵓⴽⵜⵓⴱⵕ 1984) ⵍⵍⵉ ⵉⴳⴰⵏ ⴰⵙⵍⴳⵏ ⵉⵥⵍⵉⵏ ⵙ ⵡⴰⵔⵔⴰⵣ ⵉ ⵓⵏⴳⵉⵙⵏ ⵡⵉⵍⵍⵉ ⵉⵜⵜⵢⴰⴳⴰⵙⵏ ⴳ ⵉⵏⴳⴰⵙⵏ ⴳ ⵜⵎⵙⵙⵓⴷⵓⵜⵉⵏ ⵏ ⵜⵉⵏⴰⴽⴰⵍⵉⵏ ⵉⵜⵜⴰⴼⵏ ⴰⵏⵙⵎⴰⵙⵙⵓ, ⴹⴰⵕⴰⵜ ⵍⵍⵉ ⵏⵏ ⴳⵉⵙ ⵍⵍⴰⵏⵜ ⵜⴰⵏⵏⴰⵢⵉⵏ ⴼⵍⵍⴰⵙ ⵉⵜⵜⴰⵡⵏⵏⴰⵏ, ⵉⵙⵎⵏⵉⴷ ⵜ ⵎⴰⵙⵙⴰ ⵄⴰⴱⴷⵍⵍⴰⵜⵉⴼ ⵡⴰⵀⴱⵉ, ⴰⵎⴰⵡⵙⴰⵙ ⵏ ⵜⵣⵔⴼⵜ.
  ⵉⴷⴷⴰ ⴷ ⵓⵙⵏⵜⵉ ⴰⴷ ⴳ ⵜⴰⵖⴰⵔⴰⵙⵜ ⵏ ⵜⵎⴳⴳⵉⵢⵉⵏ ⵍⵍⵉ ⵜⴳⴳⴰ ⵜⴰⵏⴱⴰⴹⵜ ⴳ ⵓⵙⵎⴰⵢⵏⵓ ⴷ ⵓⵖⵓⴷⵓ ⵏ ⵓⵖⴰⵡⴰⵙ ⴰⵏⵣⵔⴰⴼ ⵉⵎⵙⴰⵙⴰⵏ ⴰⴽⴷ ⵉⵣⵣⵉⴳⵣⵏ ⵓⵙⵍⵉⴳⵏ ⴷ ⵉⵏⴰⵎⵓⵏⵏ ⴷ ⵉⴷⴰⵎⵙⴰⵏⵏ ⴷ ⵉⵣⵔⴼⴰⵏⵏ ⵍⵍⵉ ⵉⵍⵍⴰⵏ ⴳ ⵜⵎⵓⵔⵜ ⵏⵏⵖ.
  ⵉⴳⴰ ⵓⵡⵜⵜⴰⵙ ⵏ ⵓⵙⴰⵏⵜⵉ ⵓⵙⵍⴳⵏ ⴰⴷ ⴰⵙⵖⵓⴷⵓ ⵏ ⵡⴰⵔⴰⵢ ⴰⵏⴰⵎⵓⵏ ⵏ ⵓⵏⴳⵉⵙⵏ ⵃⵎⴰ ⴰⴷ ⵢⵉⵍⵉ ⵓⵎⵙⴰⵙⴰ ⵏⴳ ⵉⵣⵔⴼⴰⵏ ⵏ ⵓⵏⴳⵉⵙⵏ ⵃⵎⴰ ⴰⴷ ⴰⵎⵥⵏ ⴰⵔⵔⴰⵣ ⵍⵍⵉ ⵙⵜⴰⵀⵍⵍⴰⵏ ⵉⵎⵙⴰⵙⴰⵏ ⴰⴽⴷ ⵜⴽⵎⵎⴰⵡⵜ ⵍⵍⵉ ⵜⵏ ⵉⴹⵕⵕⴰⵏ ⴷ ⵓⵃⵟⵟⵓ ⵏ ⵓⵙⴼⵍⵙ ⴳ ⵍⵎⵖⵔⵉⴱ, ⴰⵢⵍⵍⵉ ⵔⴰⴷ ⵢⴰⵡⵉ ⵜⵉⵔⵡⵉ ⵜⴰⴳⴷⵓⴷⴰⵏⵜ ⵉⴹⴼⴰⵔⵏ ⵉⵣⵣⵉⴳⵣⵏ ⵍⵍⵉ ⴷ ⵉⴷⴷⴰⵏ ⴳ ⵜⵓⴳⵜ ⵏ ⵉⴳⵔⴰⵏ ⴷ ⵓⵙⵎⵙⴰⵙⴰ ⴷ ⵜⴰⵏⵏⴰⵢⵉⵏ ⵍⵍⵉ ⵉⵍⵍⴰⵏ ⴳ ⵜⵓⴳⵜ ⵏ ⵉⵙⵍⴳⵏ.
  ⵉⵍⵍⴰ ⴳ ⵓⵙⴰⵜⵉ ⵏ ⵓⵙⵍⴳⵏ ⴰⴷ ⵜⵓⴳⵜ ⵏ ⵉⵙⵏⴼⵍⵏ ⵍⵍⵉ ⵎⵓ ⵉⴳⴰ ⵡⴰⵡⵜⵜⴰⵙ ⵏⵏⵙ ⴰⴷ ⴰⵍⵍⵏ ⴳ ⵡⴰⵜⵉⴳ ⵏ ⵡⴰⵔⵔⴰⵣⵏ ⵙ ⵜⵖⴰⵔⴰⵙⵜ ⵏ ⵓⵙⵉⵟⵟⵏ ⴷ ⵓⵙⵢⴰⴼⵓ ⵙ 64% ⵉⴱⴹⴰⵏ ⵅⴼ ⵉⵣⵎⴰⵣ, ⵎⴰⵢⴰⵏⵏ ⵔⴰⴷ ⵢⴰⵡⵙ ⴳ ⵓⵖⴱⵓⵖⵍⵓ ⵏ ⵡⴰⵜⵉⴳ ⵏ ⵡⴰⵔⵔⴰⵣⵏ ⴳ ⵢⴰⵏ ⵓⵣⵎⵣ ⵉⴷⵔⵓⵙⵏ ⴷ ⵓⵙⵖⵓⴷⵓ ⵏ ⵡⴰⵔⵔⴰⵣⵏ ⵏ ⵓⵏⴳⵉⵙⵏ ⴷ ⵉⵎⴽⴽⵓⵙⴰ ⴷ ⵓⵙⵎⴰⵜⴰ ⵏ ⵓⵣⵓⴳⴳⵣⵏ ⵏ ⵓⵙⵍⴳⵏ ⵃⵎⴰ ⴰⴷ ⴳⵉⵙ ⵉⵍⵉⵏ ⴰⴽⴽⵯ ⵡⴰⵏⴰⵡⵏ ⵏ ⵉⵏⴳⵉⵙⵏ ⵏ ⵉⴱⵔⴷⴰⵏ ⵍⵍⵉ ⵙⴽⴰⵔⵏⵜ ⵜⵎⵙⵙⵓⴷⵓⵜⵉⵏ ⵏ ⵜⵉⵏⴰⴽⴰⵍⵉⵏ ⵉⵜⵜⴰⴼⵏ ⴰⵏⵙⵎⴰⵙⵙⵓ ⴳ ⵓⵙⵖⵓⴷⵓ ⵏ ⵓⵃⵟⵟⵓ ⵏ ⵉⵎⴽⴽⵓⵙⴰ ⴷ ⵜⵔⵓⴱⴱⴰ ⵉ ⵍⵍⴰⵏ ⴳ ⵡⴰⴷⴷⴰⴷ ⵏ ⵓⵎⵎⵓⵄⵕⵕ.
• ⴹⴰⵕⴰⵜ ⵎⴰⵢⴰⴷ, ⵉⵎⴹⴰⴽⴰⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⵉⵙⵖⵥⵏ ⴰⵙⵏⵜⵉ ⵏ ⵓⵎⵕⵙⵓⵎ ⵓⵟⵟⵓⵏ 2.25.490 ⵉⵙⵖⵓⴷⴰⵏ ⴰⵎⵕⵙⵓⵎ ⵓⵟⵟⵓⵏ 2.03.201 ⵍⵍⵉ ⴷ ⵉⴼⴼⴰⵖⵏ ⴳ 22 ⵔⴰⴱⵉⵄ ⴰⵎⵣⵡⴰⵔⵓ 1427 (21 ⵉⴱⵔⵉⵍ 2006) ⵉⵥⵍⵉⵏ ⵙ ⵓⵙⴷⴷⵉ ⵏ ⵜⵎⵔⵙⴰⵍ ⵏ ⵓⵙⵍⵎⴷ ⴰⵏⴰⴼⵍⵍⴰ ⵍⵍⵉ ⵓⵔ ⵉⴹⴼⴰⵕⵏ ⵉ ⵜⵙⴷⴰⵡⵉⵏ, ⵉⵙⵎⵏⵉⴷ ⵜ ⵎⴰⵙⵙ ⵄⴰⵣⴷⴷⵉⵏ ⵎⵉⵕⴰⵡⵉ, ⴰⵎⴰⵡⵙⴰⵙ ⵏ ⵓⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵍⵍⵡⵉ.
  ⵉⴷⴷⴰ ⴷ ⵓⵙⵏⵜⵉ ⴰⴷ ⴳ ⵜⴰⵖⴰⵔⴰⵙⵜ ⵏ ⵓⵙⵡⵓⴷⴷⵓ ⵏ ⵓⵙⵍⴳⵏ 01.00 ⵉⵥⵍⵉⵏ ⵙ ⵓⵙⵏⵎⴰⵍⴰ ⵏ ⵓⵙⵍⵎⴷ ⴰⵏⴰⴼⵍⵍⴰ, ⵖ ⵉⵍⵍⴰ ⴰⴷ ⵢⵉⵍⵉ ⵓⵙⵓⵙⵙⵏ ⵏ ⵓⵙⵍⵎⴷ ⴰⵏⴰⴼⵍⴰ ⴳ ⵜⵙⴷⴰⵡⵉⵏ ⴷ ⵜⵎⵔⵙⴰⵍ ⵏⵓⵙⵍⵎⴷ ⴰⵏⴰⴼⵍⵍⴰ ⵓⵔ ⵉⴳⵉⵏ ⴳ ⵜⵙⴷⴰⵡⵉⵏ ⴷ ⵓⵙⵡⵓⴷⴷⵓ ⵏ ⵓⴳⵟⵟⵓⵎ ⴰⵎⴰⴳⴳⴰⵔⵓ ⵏ ⵓⵎⴰⴳⵔⴰⴷ 25 ⵏ ⵓⵙⵍⴳⵏ ⴰⴷ, ⵍⵍⵉ ⵉⵎⵎⴰⵍⴰⵏ ⴰⵙⴷⴷⵉ ⵏ ⵜⵎⵔⵙⴰⵍ ⵍⵍⵉ ⵓⵔ ⵉⴹⴼⴰⵔⵏ ⵉ ⵜⵙⴷⴰⵡⵉⵏ ⵙ ⵓⵎⵕⵙⵓⵎ ⵓⵟⵟⵓⵏ 2.03.201 ⵍⵍⵉ ⴷ ⵉⴼⴼⴰⵖⵏ ⴳ ⵉⴱⵔⵉⵍ 2006.
  ⵉⴳⴰ ⵓⵡⵜⵜⴰⵙ ⵏ ⵓⵙⵏⵜⵉ ⵏ ⵓⵎⵕⵙⵓⵎ ⴰⴷ ⴰⵙⵉⴷⴼ ⵏ ⵓⵙⵉⵏⴰⴳ ⴰⵏⴰⵎⵓⵏ ⴰⵏⴰⴼⵍⵍⴰ ⵏ ⵓⵥⴰⵡⴰⵏ ⴷ ⵜⵥⵓⵕⵉ ⵏ ⴽⵓⵍⵉⴳⵕⴰⴼⵉ ⴳ ⵓⵙⴷⴷⵉ ⵏ ⵜⵎⵔⵙⴰⵍ ⵏ ⵓⵙⵍⵎⴷ ⴰⵏⴰⴼⵍⵍⴰ ⵓⵔ ⵉⴹⴼⴰⵕⵏ ⵉ ⵜⵙⴷⴰⵉⵏ ⵉⵍⵍⴰⵏ ⴳ ⵓⵎⵕⵙⵓⵎ ⴰⴷ.
• ⴹⴰⵕⴰⵜ ⵎⴰⵢⴰⵏⵏ, ⵉⵎⴹⴰⴽⴰⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⵉⵙⵖⵥⵏ ⴰⵙⵏⵜⵉ ⵏ ⵓⵎⵕⵙⵓⵎ ⵓⵟⵟⵓⵏ 
  2.25.550 ⵉⵙⵏⴼⵍⵏ ⵉⵙⵖⵓⴷⴰⵏ ⴰⵎⵕⵙⵓⵎ ⵓⵟⵟⵓⵏ 2.23.76 ⵍⵍⵉ ⴷ ⵉⴼⴼⴰⵖⵏ ⴳ 15 ⵎⵓⵃⴰⵕⵕⴰⵎ 1445 (2 ⵖⵓⵛⵜ 2023) ⵉⵙⵡⵓⴷⴷⵓⵏ ⴰⵢⵍⵍⵉ ⴷ ⵉⴷⴷⴰⵏ ⴳ ⵓⵙⵍⴳⵏ ⵓⵟⵟⵓⵏ 2.00 ⵉⵥⵍⵉ ⵙ ⵉⵣⵔⴼⴰⵏ ⵏ ⵉⵎⴳⴰⵢⵏ ⴷ ⵉⵣⵔⴼⴰⵏ ⵉⵎⴽⴽⴰⵙⴰⵏ ⵉⵥⵍⵉⵏ ⵙ ⵓⵙⵉⴳⴳⵣ ⵏⵖ ⴷ ⵓⵏⵖⵉⵍ ⴰⵎⵓⵍⴰⴼ, ⵉⵙⵎⵏⵉⴷ ⵜ ⵎⴰⵙⵙ ⵎⵓⵃⵎⵎⴰⴷ ⵎⵀⴷⵉ ⴱⵏⵙⵄⵉⴷ, ⴰⵎⴰⵡⵙⴰⵙ ⵏ ⵜⴷⵍⵙⴰ ⴷ ⵜⵄⵄⵓⵔⵎⴰ ⴷ ⵓⵎⵢⴰⵡⴰⴹ.
  ⵉⴷⴷⴰ ⴷ ⵓⵙⵏⵜⵉ ⴰⴷ ⵉⵎⵙⴰⵙⴰ ⴰⴽⴷ ⵓⵙⴰⵜⵉ ⴰⵎⴰⴷⴷⴰⵙ ⵏ ⵜⵏⵓⴷⴰⴼ ⵏ ⵓⵙⵉⴳⴳⵣ ⵏⵖ ⴷ ⵓⵏⵖⵉⵍ ⴰⵎⵓⵍⴰⴼ ⵉⵎⵙⴰⵙⴰⵏ ⴷ ⵜⵉⴷⵜ ⵜⴷⴰⵎⵙⴰⵏⵜ ⴷ ⴰⴷ ⵉⵔⴰⵔ ⵅⴼ ⵉⴱⵓⵖⵍⵓⵜⵏ ⵍⵍⵉ ⵉⵍⵍⴰ ⴳ ⵉⵎⴰⵙⵙⵏ ⵏ ⵓⵙⵉⴳⴳⵣ ⴷ ⵜⵥⵕⵉⴳⵜ ⴳ ⵡⴰⵏⴰⵡ ⵏ ⵉⵎⴰⵙⵙⵏ ⴷ ⵜⵖⴰⵡⵙⵉⵡⵉⵏ ⵏⵏⵙ ⵜⵉⵜⵇⵏⵉⵏ ⴳ ⵎⴰ ⵉⵥⵍⵉⵏ ⵙ ⵉⵙⵙⴰⵔⵓⵜⵏ ⵉⵥⵍⵉⵏ ⵙ ⵡⴰⵙⵙⴰⵖ ⵏⵏⵙⵏ.
  ⵉⴳⴰ ⵓⵡⵜⵜⴰⵙ ⵏ ⵓⵙⵏⵜⵉ ⵏ ⵓⵎⵕⵙⵓⵎ ⴰⴷ ⴰⵙⵏⴼⵍ ⵏ ⵓⵎⴰⴳⴰⵔⴰⴷ ⵡⵉⵙ ⴽⵕⴰⴹ ⴳ ⵓⵎⵕⵙⵓⵎ ⵓⵟⵟⵓⵏ 2.23.76 ⵙ ⵓⵣⵣⵔⴰⵢ ⵏ ⵓⵏⴳⵔⴰⵡ ⵏ ⵖⵉⵍⴰⴷ ⵖ ⵉⵍⵍⴰ ⵡⴰⵜⵉⴳ ⵉⵕⵚⴰⵏ ⵏ ⵜⵏⵓⴷⴰⴼ ⵏ ⵓⵙⵉⴳⴳⵣ ⵏⵖ ⴷ ⵓⵏⵖⵉⵍ ⴰⵎⵓⵍⴰⴼ ⴳ 10% ⴳ ⵡⴰⵜⵉⴳ ⵏ ⵉⵎⴰⵙⵙⵏ ⵍⵍⵉ ⵉⵜⵜⵓⵙⴽⴰⵔⵏ ⵖ ⵖⵉⴷ, ⵙ ⵓⵔⵓⵙ ⵏ ⵢⴰⵏ ⵓⵏⴳⵔⴰⵡ ⴰⵎⴰⵢⵏⵓ ⵉⵎⵙⴰⵙⴰⵏ ⴰⴽⴷ ⴰⵜⵉⴳ ⵏ ⵉⵎⴰⵙⵙⵏ ⵉⵥⵍⵉⵏ ⵓⵙⵉⴳⴳⵣ ⵏⵖ ⴷ ⵓⵏⵖⵉⵍ ⴰⵎⵓⵍⴰⴼ ⵃⵎⴰ ⴰⴷ ⵜⵉⵍⵉ ⵜⵣⵔⴼⵜ ⴳ ⵜⵉⴽⴽⵉⵜ ⵏ ⵜⵏⵓⴷⴰⴼ. 
   

ⵉⴽⵎⵎⵍ ⵓⵙⵇⵇⵉⵎ ⵏ ⵜⵏⴱⴰⴹⵜ ⵜⵡⵓⵔⵉⵡⵉⵏ ⵏⵏⵙ ⵙ ⵓⵙⵓⵙⵙⵏ ⵏ ⵜⵎⵢⴰⵇⵇⴰⵏⵜ ⵏ ⵜⵡⵉⵙⵉ ⵜⴰⵏⵣⵔⴰⴼⵜ ⴳ ⵉⴳⵔ ⵏ ⵓⵣⵏⵉⵔⵏ ⵏⴳⵔ ⵜⵏⴱⴰⴹⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⴷⵓⴷⴰⵏⵜ ⵏ ⴽⴰⵥⴰⵅⵉⵙⵜⴰⵏ, ⵉⵜⵜⵓⵙⴳⵎⴰⴹⵏ ⴳ ⵕⵕⴱⴰⵟ ⴳ 12 ⴷⵓⵊⴰⵏⴱⵉⵔ 2024, ⴷ ⵓⵙⴰⵜⵉ ⵏ ⵓⵙⵍⴳⵏ ⵓⵟⵟⵓⵏ 29.25 ⵍⵍⵉ ⵉⵙⵖⵥⵏ ⵜⴰⵎⴰⵢⴰⵇⵇⴰⵏⵜ ⴰⴷ, ⵉⵙⵎⵏⵉⴷ ⵜⵏ ⵎⴰⵙⵙ ⵎⴰⵙⵙⴰ ⵄⴰⴱⴷⵍⵍⴰⵜⵉⴼ ⵡⴰⵀⴱⵉ, ⴰⵎⴰⵡⵙⴰⵙ ⵏ ⵜⵣⵔⴼⵜ ⵙ ⵉⵙⵎ ⵏ ⵎⴰⵙⵙ ⵏⴰⵚⵕ ⴱⵓⵕⵉⵟⴰ, ⴰⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⵏ ⵉⴼⵕⵉⵇⵢⴰ ⴷ ⵉⵎⵖⵔⵉⴱⵉⵏ ⵉⵎⵣⴷⴰⵖ ⵏ ⴱⵕⵕⴰ.