ⵓⵔⵔⵉ ⵙ ⵜⵉⵖⵔⴷⵉⵏ

ⴰⴳⵔⴰⵡ ⵏ ⵓⵙⵇⵇⵉⵎ ⵏ ⵜⵏⴱⴰⴹⵜ ⵏ ⵡⴰⵙⵙ ⵏ ⵓⴽⵡⴰⵙ 9 ⴽⵜⵓⴱⵔ 2025

CG-09-10-2025-1.jpeg

ⵉⵜⵜⴰⵡⵙⴽⴰⵔ ⴰⵙⵙ ⵏ ⵓⴽⵡⴰⵙ 16 ⵕⴰⴱⵉⵄ ⴰⵎⴳⴳⴰⵔⵓ 1447 ⵉⵎⵙⴰⵙⴰⵏ ⴰⴽⴷ 9 ⴽⵜⵓⴱⵔ 2025 ⴰⵙⵇⵇⵉⵎ ⵏ ⵜⵏⴱⴰⴹⵜ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ. ⵉⵥⵍⵉ ⵓⴳⵔⴰⵡ ⴰⴷ ⵙ ⵓⵙⵎⵏⵉⴷ ⵏ ⵢⴰⵏ ⵓⴼⵙⵔⵙ ⴰⵣⵓⵏⴰⵏ ⴷ ⵓⵎⴹⴰⴽⴰⵕ ⵅⴼ ⵜⵓⴳⵜ ⵏ ⵉⵙⵏⵜⴰⵢ ⵏ ⵉⴹⵕⵉⵚⵏ ⵓⵙⵍⵉⴳⵏⵏ ⵙ ⵓⵎⵙⴰⵙⴰ ⴷ ⵓⵎⵏⵏⵉ ⵡⵉⵙ 92 ⵏ ⵓⴷⵓⵙⵜⵓⵔ.
ⴳ ⵜⵣⵡⴰⵔⵉ ⵏ ⵓⴳⵔⴰⵡ ⴰⴷ, ⵉⴹⴼⴰⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⵢⴰⵏ ⵓⴼⵙⵔ ⵅⴼ ⵜⵙⵜⵕⴰⵜⵉⵊⵉⵜ ⵜⴰⵏⴰⵎⵓⵔⵜ ⵏ ⵜⴳⵎⵉ ⵜⴰⵙⵓⵍⴰⵏⵜ 2035, ⵜⵙⵎⵏⵉⴷ ⵜⵙ ⵎⴰⵙⵙⴰ ⵍⴰⵢⵍⴰ ⴱⵏⵄⵍⵉ, ⵜⴰⵎⴰⵡⵙⴰⵙⵜ ⵏ ⵓⵎⵓⵜⵜⵉ ⴰⵥⴹⴰⵕⴰⵏ ⴷ ⵜⴳⵎⵉ ⵜⴰⵙⵓⵍⴰⵏⵜ. 
ⵜⵎⵍⴰ ⵎⴰⵙⵙⴰ ⵜⴰⵎⴰⵡⵙⴰⵙⵜ ⵎⴰ ⵙ ⵜⴳⴰ ⵜⵙⵜⵕⴰⵜⵉⵊⵉⵜ ⵜⴰⵏⴰⵎⵓⵔⵜ ⵏ ⵜⴳⵎⵉ ⵜⴰⵙⵓⵍⴰⵏⵜ 2035 (SNDD 2035) ⵍⵍⵉ ⵉⵙⵏⵜⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵔⵏⵓ ⵔⴱⴱⵉ ⴳ ⵓⵙⴳⴳⵯⴰⵙ ⵏ 2017 ⵢⴰⵏ ⵓⵙⴰⵜⵉ ⴰⵙⴰⵖⵓⵍ ⴰⵏⴰⵎⵓⵔ ⵏ ⵓⵙⵉⴷⴼ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵉⵙⴳⴷⴷⵏ ⵉⴷⴰⵎⵙⴰⵏⵏ ⴳ ⵜⴷⵉⵏⴰⵎⵉⵜ ⵏ ⵜⴳⵎⵉ ⵉⵕⵚⴰⵏ ⵅⴼ ⵓⵙⵓⵍ ⴷ ⵓⵙⴰⵎⵓ, ⵉⴳⴰ ⴰⵡⴷ ⵓⵡⵜⵜⴰⵙ ⵏⵏⵙ ⴰⵙⵖⵓⴷⵓ ⵏ ⵓⵎⵙⴰⵙⴰ ⵏ ⵜⵙⵔⵜⴰⵢ ⵏ ⵉⴳⵔⴰⵏ ⵉⵎⴰⵡⴰⵙⵏ ⴷ ⵜⴷⴳⴳⴰⵔⵜ ⵏ ⵓⵙⵎⵙⴰⵙⴰ ⴰⵏⴰⴽⵍⴰⵏ ⴷ ⵓⵙⵡⵓⴷⴷⵓ ⵉⴷⵓⵙⵏ ⵙ ⵜⵉⴷⵜ, ⴰⵢⵍⵍⵉ ⵔⴰⴷ ⵉⴳ ⴰⵙⵏⴼⵍ ⵓⴽⵕⵉⵥ ⴰⵙⵓⵍⴰⵏ ⴳ ⵜⵎⵓⵔⵜ ⵏⵏⵖ.
ⵜⵣⴰⵢⴷ ⵜⵏⵏⴰ ⵎⴰⵙⵙⴰ ⵜⴰⵎⵡⵙⴰⵙⵜ ⵎⴰ ⵙ ⵉⵕⵚⴰ ⵓⵏⴰⵥⴰⵕ ⴰⴷⵙⵍⴰⵏ ⵏ ⵜⵓⵙⵜⵍⵜ ⴰⴷ ⵜⴰⵎⴰⵢⵏⵓⵜ ⵏ ⵓⵙⴳⴳⵯⴰⵙ ⵏ 2025 ⵅⴼ ⵓⵙⵡⵓⴷⴷⵓ ⵏ ⵜⵖⵉⵍⵍⴰ ⵃⵎⴰ ⴷ ⴱⴰⵢⵏ ⴳ ⵜⵓⴷⵔⵜ ⵜⴰⴽⵓⵢⴰⵙⵜ ⵏ ⵉⵎⵓⵔⴰ, ⵜⵙⴷⴷⵉⴷ ⵎⴰ ⵙ ⵜⵥⵍⵉ ⵜⵙⵓⵜⵍⵜ ⴰⴷ ⵙ ⵚⴹⵉⵚ ⵏ ⵉⴳⵔⴰⵏ ⵏ ⵓⵙⵏⴼⵍ ⴰⵎⴰⴷⴷⵓⴷ ⴷ ⵙⵎⵎⵓⵙⵜ ⵏ ⵜⵉⵎⵙⵙⵉⵍⵉⵢⵉⵏ ⵉⴳⵔⵉⴳⵔⵜⵏ ⵏ ⵓⵙⵖⴰⵡⵍ ⵏ ⵜⵡⵓⵔⵉ ⵏ ⵓⵎⵓⵜⵜⵉ ⵙ ⵢⴰⵏ ⵡⴰⵏⴰⵡ ⴰⵏⴳⵎⴰⵏ ⵉⴳⴰⵏⴰ ⴱⴰⵀⵔⴰ ⴰⵙⵓⵍⴰⵏ.

  • ⴹⴰⵕⴰⵜ ⵎⴰⵢⴰⴷ, ⵉⵎⴹⴰⴽⴰⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⵉⵙⵖⵥⵏ ⴰⵙⵏⵜⵉ ⵏ ⵓⵙⵍⴳⵏ ⵓⵟⵟⵓⵏ 71.24 ⵉⵙⵏⴼⵍⵏ ⵉⵙⵖⵓⴷⴰⵏ ⴰⵙⵍⴳⵏ 15.95 ⵉⵥⵍⵉⵏ ⵙ ⵓⵙⵍⴳⵏ ⵏ ⵜⵙⴱⴱⴰⴱⵜ, ⵉⵙⵎⵏⵉⴷ ⵜ ⵎⴰⵙⵙ ⵄⴱⴷⵍⵍⴰⵜⵉⴼ ⵡⵀⴰⴱⵉ, ⴰⵎⴰⵡⵙⴰⵙ ⵏ ⵜⵣⵔⴼⵜ.
  • ⴹⴰⵕⴰⵜ ⵎⴰⵢⴰⵏⵏ, ⵉⵎⴹⴰⴽⴰⵕ ⵓⵙⵇⵇⵉⵎ ⵏ ⵜⵏⴱⴰⴹⵜ ⵉⵙⵖⵥⵏ ⴰⵙⵏⵜⵉ ⵏ ⵓⵎⵕⵙⵓⵎ ⵓⵟⵟⵓⵏ 2.25.441 ⵉⵙⵏⴼⵍⵏ ⵉⵙⵖⵓⴷⴰⵏ ⴰⵎⵕⵙⵓⵎ ⵓⵟⵟⵓⵏ 2.22.224 ⵍⵍⵉ ⴷ ⵉⴼⴼⴰⵖⵏ ⴳ 10 ⵕⴰⵎⴰⴹⴰⵏ 1443 (12 ⵉⵔⴱⵔⵉⵍ 2022) ⵉⵥⵍⵉⵏ ⵙ ⵡⴰⵍⵍⴰⵙ ⵏ ⵓⵙⵏⵎⴰⵍⴰ ⴷ ⵓⵙⵡⵓⴷⴷⵓ ⵏ ⵓⵙⵉⵏⴰⴳ ⴰⵏⴰⵎⵓⵔ ⵏ ⵜⵥⵓⵕⵉⵡⵉⵏ ⵉⴼⵓⵍⴽⵉⵏ, ⵉⵙⵎⵏⵉⴷ ⵜ ⵎⴰⵙⵙ ⵎⵓⵃⵎⵎⴰⴷ ⵎⵀⴷⵉ ⴱⵏⵙⵄⵉⴷ, ⴰⵎⴰⵡⵙⴰⵙ ⵏ ⵜⵄⵄⵓⵔⵎⴰ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ.
  • ⵉⵎⴹⴰⴽⴰⵕ ⴰⵡⴷ ⵓⵙⵇⵇⵉⵎ ⵏ ⵜⵏⴱⴰⴹⵜ ⵉⵙⵖⵥⵏ ⴰⵙⵏⵜⵉ ⵏ ⵓⵎⵕⵙⵓⵎ ⵓⵟⵟⵓⵏ 2.25.605 ⵉⵙⵡⵓⴷⴷⵓⵏ ⵏ ⴰⵎⴰⴳⵔⴰⴷ ⵡⵉⵙ 7 ⵏ ⵓⵙⵍⴳⵏ ⵓⵟⵟⵓⵏ 65.15 ⵉⵥⵍⵉⵏ ⵙ ⵜⵎⵔⵙⴰⵍ ⵏ ⵡⴰⵔⴰⵢ ⴰⵏⴰⵎⵓⵏ, ⵜⵙⵎⵏⵉⴷ ⵜ ⵎⴰⵙⵙⴰ ⵏⴰⵄⵉⵎⴰ ⴱⵏ ⵢⴰⵃⵢⴰ, ⵜⴰⵎⵡⵙⴰⵙⵜ ⵏ ⵜⵔⵡⵉⵣⵉ ⴷ ⵓⵙⵉⴷⴼ ⴰⵏⴰⵎⵓⵏ ⴷ ⵜⵡⵓⵊⴰ.
  • ⵉⵎⵎⴰⵜⵜⵉ ⵓⵙⵇⵇⵉⵎ ⵏ ⵜⵏⴱⴰⴹⵜ ⵉⵙⵖⵥⵏ ⵙⵉⵏ ⵉⵙⵏⵜⴰⵢ ⵏ ⵉⵎⵕⵙⵓⵎⵏ ⵉⵥⵍⵉⵏ ⵙ ⵓⵙⴽⴰⵔ ⵏ ⵜⵙⴳⴳⵉⵡⵉⵏ ⵏ ⵓⵖⴰⵡⵍ ⴰⵎⴳⵓⵔⵉ, ⵉⵙⵎⵏⵉⴷ ⵜⵏ ⵎⴰⵙⵙ ⵕⵢⴰⴹ ⵎⵣⵡⵔ, ⴰⵎⴰⵡⵙⴰⵙ ⵏ ⵜⵎⴳⵓⵔⵉ ⴷ ⵜⵙⴱⴱⴰⴱⵜ. ⵥⵍⵉⵏ ⵙ :
    • ⴰⵙⵏⵜⵉ ⵏ ⵓⵎⵕⵙⵓⵎ ⵓⵟⵟⵓⵏ 2.25.799 ⵉⵣⵍⵉⵏ ⵙ ⵓⵙⴽⴰⵔ ⵏ ⵜⵙⴳⴰ ⵏ ⵖⴰⵡⵍ ⴰⵎⴳⵓⵔⵉ ⵏ ⴼⴰⵙ ⴱⵏⵙⵓⴷⴰ ;
    • ⴰⵙⵏⵜⵉ ⵏ ⵓⵎⵕⵙⵓⵎ ⵓⵟⵟⵓⵏ 2.25.800 ⵉⵣⵍⵉⵏ ⵙ ⵓⵙⴽⴰⵔ ⵏ ⵜⵙⴳⴰ ⵏ ⵖⴰⵡⵍ ⴰⵎⴳⵓⵔⵉ ⵏ ⵚⵚⵅⵉⵔⴰⵜ.
       

ⵉⴽⵎⵎⵍ ⵓⵙⵇⵇⵉⵎ ⵏ ⵜⵏⴱⴰⴹⵜ ⵜⵡⵓⵔⵉⵡⵉⵏ ⵏⵏⵙ ⵙ ⵓⵙⵓⵙⵙⵏ ⵏ ⵜⵎⵢⴰⵇⵇⴰⵏⵜ ⵏ ⵜⵉⴽⴽⵉ ⵏ ⵉⵏⴱⴽⴰⴹⵏ ⵏⴳⵔ ⵜⵏⴱⴰⴹⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⵏⴱⴰⴹⵜ ⵏ ⵜⴳⴷⵓⴷⴰⵏⵜ ⵏ ⴽⴰⵥⴰⵅⵉⵙⵜⴰⵏ, ⵉⵜⵜⵓⵙⴳⵎⴰⴹⵏ ⴳ ⵕⵕⴱⴰⵟ ⴳ 12 ⴷⵓⵊⴰⵏⴱⵉⵔ 2024, ⴷ ⵓⵙⴰⵜⵉ ⵏ ⵓⵙⵍⴳⵏ ⵓⵟⵟⵓⵏ 43.25 ⵍⵍⵉ ⵉⵙⵖⵥⵏ ⵜⴰⵎⴰⵢⴰⵇⵇⴰⵏⵜ ⴰⴷ, ⵜⵙⵎⵏⵉⴷ ⵜⵏ ⵎⴰⵙⵙⴰ ⵎⴰⵙⵙ ⵄⴱⴷⵍⵍⴰⵜⵉⴼ ⵡⵀⴰⴱⵉ, ⴰⵎⴰⵡⵙⴰⵙ ⵏ ⵜⵣⵔⴼⵜ ⵙ ⵉⵙⵎ ⵏ ⵎⴰⵙⵙ ⵏⴰⵚⵕ ⴱⵓⵕⵉⵟⴰ, ⴰⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⵏ ⵉⴼⵕⵉⵇⵢⴰ ⴷ ⵉⵎⵖⵔⵉⴱⵉⵏ ⵉⵎⵣⴷⴰⵖ ⵏ ⴱⵕⵕⴰ.

ⴰⵙⵉⵡⴹ ⴰⵏⵖⵎⴰⵙ ⵙ ⵜⵓⵜⵍⴰⵢⵜ ⵜⴰⵄⵕⴰⴱⵜ

ⵜⴰⴱⵔⴰⵜ ⵜⴰⵏⵖⵎⴰⵙⵜ